វិចារណកថា

អរគុណថ្នាក់ដឹកនាំបញ្ចភាគីកាលពីថ្ងៃទី២៨ ខែកក្កដា ឆ្នាំ២០២៥ ដែលបានអោយតម្លៃដល់ការសន្ទនានិងការទូតដើម្បីឈានទៅបញ្ចប់ការប៉ះទង្គិចប្រដាប់អាវុធដ៏សាហាវនៅព្រំដែនកម្ពុជាថៃដែលបានផ្ទុះតាំងពីថ្ងៃព្រហស្បតិ៍សប្តាហ៍មុន។

នៅពេលដែលកងកម្លាំងជួរខាងមុខបានកំពុងតែជាប់ដៃនៅក្នុងសមរភូមិដ៏ក្តៅគគុក អ្នកដែលនៅសមរភូមិក្រោយត្រូវតែពង្រឹងការទទួលខុសត្រូវ ហើយកុំបង្កបញ្ហាណាមួយ ឲ្យល្អក់ កករ រាំងស្ទះដំណើរការប្រក្រតីភាពនៃសង្គម ។ យើងត្រូវតែលើកកំពស់ការខិតខំប្រឹងប្រែងទាំងអស់គ្នា ដោយការទទួលខុសត្រូវនិងមានស្មារតីខ្ពស់។

សង្រ្គាមព្រំដែនរវាងកម្ពុជានិងថៃបានកំពុងតែផ្ទុះពេញបន្ទុក ហើយទំហំនិងរូបភាពនៃសង្រ្គាមគឺធំនិងធ្ងន់ធ្ងរជាងកាលពីសង្រ្គាមធ្លាប់ផ្ទុះកន្លងនៅចន្លោះឆ្នាំ២០០៨ ដល់ ឆ្នាំ២០១១​។​

ស្ថានភាពនៃទំនាក់ទំនងរវាងកម្ពុជានិងថៃបានឈានដល់កម្រិតធ្លាក់ចុះទាបបំផុត ក្រោមលេសដែលសាមញ្ញបំផុតគឺយកករណីទាហានខ្លួនរបួសរឿងជាន់មីនធ្វើជាដើមចម។

បងប្អូនខំប្រឹងប្រែងទទួលទានគ្រឿងស្រវឹងបន្ថែមទៀតទៅ ដើម្បីកុំអោយអ្នកនាំចូលគ្រឿងស្រវឹង ក៏ដូចជាអ្នកផលិតគាត់ក្រ ហើយមន្ទីរពេទ្យស្ងាត់មិនមានអ្នកចូល។​

ការ​ប្រឡង​សញ្ញាបត្រ​មធ្យម​សិក្សា​ទុតិយភូមិហៅថា បាក់ឌុបសម្រាប់ឆ្នាំសិក្សា​២០២៤-២០២៥​នឹងមកដល់នៅថ្ងៃទី ១៨ ខែសីហា នៅក្នុងពេលដ៏ខ្លីខាងមុខដូច្នេះយើងសង្ឃឹមថា បងប្អូនពិតជាបានខំប្រឹងប្រែងរៀនសូត្រត្រៀមបម្រុងរួចរាល់ហើយ។

សមត្ថកិច្ចជំនាញខាងធ្វើអត្តសញ្ញាណប័ណ្ណគួរតែពន្លឿនការធ្វើអត្តសញ្ញាណប័ណ្ណជូនប្រជាពលរដ្ឋឲ្យបានលឿនពីព្រោះការងារអាចច្រើនណាស់។ ប្រសិនបើអស់លោកមិនប្រញាប់ប្រញាលទេប្រយ័ត្នការងារគរជាន់គ្នា​ច្រើនទៅៗរងការស្តីបន្ទោសពីថ្នាក់ដឹកនាំនិងពលរដ្ឋ។

បងប្អូនយើង​ដែលបានកំពុងតែបម្រើការងារនៅតាមកន្លែងមួយចំនួនដើម្បីដូរប្រាក់ខែ សូម​ប្រុងប្រយ័ត្ន​ជាពិសេសកន្លែងដែលសង្ស័យថា ពាក់ព័ន្ធនឹងឧក្រិដ្ឋកម្មអនឡាញ។

ចង់ឫមិនចង់ទោះបីជាកម្ពុជាប្រឹងតាំងខ្លួនជាប្រទេសកសិកម្មយ៉ាងណាក៏ដោយក៏វិស័យកសិកម្មនៅក្នុងប្រទេស​ទំនងជានៅពីក្រោយវិស័យឧស្សាហកម្មហើយ ប៉ុន្តែដើម្បីរក្សាជន្ទលសេដ្ឋកិច្ចនិងទប់លំនឹងកុំភ្លេចគិតគូពង្រឹងកសិកម្មផង ។​

មកដល់ពេលនេះសមត្ថកិច្ចបានចុះអនុវត្តកម្មវិធីអប់រំដល់ប្អូនៗនិងក្មួយៗសិស្សានុសិស្សអំពីគ្រឿងញៀនគឺកាន់តែមានច្រើន និងបានធ្វើជាបន្តបន្ទាប់ ប៉ុន្តែទោះបីជាយ៉ាងណាក៏ដោយយើងខ្ញុំគិតថា ការចុះគួរតែបន្ថែមទៀត។

តាមប្រសាសន៍របស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា នៅព្រឹកថ្ងៃទី​១៤ ខែកក្កដា ឆ្នាំ២០២៥ ក្រោយពេលដែលបង្កើតនៅឆ្នាំ២០០៦ ច្បាប់កាតព្វកិច្ចយោធានឹងត្រូវអនុវត្តនៅក្នុងឆ្នាំ២០២៦ខាងមុខ។​

ជនបរទេសរូបណាក៏ដោយដែលចូលមកកាន់កម្ពុជាហើយធ្វើអំពើខុសច្បាប់ ដោយរួមទាំងមកដណ្តើមការងារពលរដ្ឋឫដណ្តើមមុខរបររបស់ពលរដ្ឋដោយមិនមានការអនុញ្ញាតគឺចាំបាច់ត្រូវតែមានវិធានការណ៍ផ្លូវច្បាប់ដោយមិនមានការលើកលែង។

ករណីឆ្លងរាលដាលនៃជំងឺគ្រុនឈាមនៅឆមាសទី១ ឆ្នាំ២០២៥ កម្ពុជាមានប្រមាណជាជាង៧ពាន់ករណី ហើយអ្នកស្លាប់មានតែ១៥នាក់ គឺមានការថយចុះ៨នាក់ ប៉ុន្តែកុំធ្វេសប្រហែសវានៅតែជាជំងឺដែលអាចសម្លាប់ជីវិតមនុស្សបានគ្រប់ពេលជាពិសេសគឺកុមារ​។​

យុវវ័យនានាមិនគួរនាំគ្នាលេងសើច ហើយធ្វើសកម្មភាពបំផ្លិចបំផ្លាញអ្វីៗ​ដែលជា​សម្បត្តិ​សាធារណៈនោះឡើយ ផ្ទុយទៅវិញ គួរតែជួយការពារ​និងថែរក្សា​វាឲ្យគង់វង្ស​ឬប្រើប្រាស់ឲ្យ​បាន​យូរ​ដើម្បីជាប្រយោជន៍ សម្រាប់ខ្លួន​ឯងនិងសាធារណៈជននានា។

ជាការពិតពន្ធបដិការថ្មីដែលជាលទ្ធផលចេញពីការខិតខំប្រឹងប្រែងចរចារបស់អ្នកជំនាញកម្ពុជាបានទម្លាក់ពី ៤៩ភាគរយមកនៅ៣៦ភាគរយ គឺជាជោគជ័យមួយដែរ ប៉ុន្តែទោះបីជាយ៉ាងណាក៏ដោយ វានៅតែខ្ពស់ ជាងប្រទេសខ្លះដដែល ។

ក្រសួងធនធានទឹកនឹងឧតុនិយមបានព្រមានថា បាតុភូតធម្មជាតិអាក្រក់ដែលមានដូចជាភ្លៀង​ផ្គររន្ទះ និង ខ្យល់កន្រ្តាក់អាចនឹងកើតមានសឹងតែគ្រប់ខេត្តនិងរាជធានីពី ២៥ទៅ៣០ភាគរយ ដូច្នេះការប្រុងប្រយ័ត្ន សូមលើកកំពស់ឲ្យបានគ្រប់ៗគ្នា។

មួយរយៈពេលនេះព័ត៌មានក្លែងក្លាយសំបូរណាស់ ដូច្នេះនៅពេលដែលយើងលេងឬប្រើប្រាស់បណ្តាញសង្គមនានា មិនថាហ្វេសបុក តេឡេក្រាម តិកតក់ ឬ យូធូបនោះទេសូមលើកកំពស់ការប្រុងប្រយ័ត្នផង ដើម្បីកុំឲ្យយមានភយន្តរាយផ្សេងៗដែលអាចកើតមានជាយថាហេតុ។

ការប្រយុទ្ធប្រឆាំងនឹងគ្រឿងញៀនដែលកម្ពុជាបានកំពុងតែធ្វើគឺបានបង្ហាញលទ្ធផលជាបន្តបន្ទាប់ ដោយពីមួយឆមាសទៅមួយឆមាសជនសង្ស័យដែលពាក់ព័ន្ធនឹងគ្រឿងញៀនកាន់តែច្រើនត្រូវបានបង្រ្កាប ខណៈដែលគ្រឿងញៀននិងសារធាតុពាក់ព័ន្ធក៏បន្តរឹបអូសនិងបំផ្លាញចោល ។

គុ្រនផ្តាសសាយបក្សីមកពីមេរោគ H5N1 បានរកឃើញជាបន្តបន្ទាប់៦ខែកន្លងមកនេះ ហើយនៅក្នុងខែមិថុនានេះ គឺផ្ទុះច្រើនករណីតែម្តង ដូច្នេះសូមកុំប្រហែស ហើយអ្នកដែលហូបសាច់បក្សី សូមចម្អិនអោយឆ្អិនល្អ ដោយឡែកអ្នកធ្វើគួរតែសំអាតដៃនិងអនាម័យខ្លួនប្រាណឲ្យល្អដែរ។​

សព្វថ្ងៃនេះអ្នកបង្កើតមាតិកានៅលើបណ្តាញសង្គមមានច្រើន ហើយអ្នកដែលកំពុងតែរកលុយតាមអនឡាញដែលគេច្រើននិយាយថា ក្រុមអ្នក MMO ក៏មានច្រើន ដូច្នេះប្រសិនបើអាចគួរតែជួយសង្គមបន្តិច តាមរយៈមាតិកាដែលខ្លួនបង្កើត​។