CMAC កំពុងស្រាវជ្រាវ និងបោសម្អាតទីតាំងដែលរងផលប៉ះពាល់ ដោយសារការទម្លាក់គ្រាប់បែកទម្លាក់ពីយន្តហោះ នៅទិសឧត្តរមានជ័យមានចំនួន១ ៥៤៩គ្រាប់

លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) បានបញ្ជាក់ឱ្យដឹងថា អង្គភាព CMAC កំពុងដំណើរការស្រាវជ្រាវ​ ដាក់ស្លាកសញ្ញា និងបោសម្អាតទីតាំងដែលរងផលប៉ះពាល់ ដោយសារការទម្លាក់គ្រាប់បែក​ និងគ្រាប់កាំភ្លើងធំគ្រប់ប្រភេទ របស់ថៃ​ ដើម្បីធានាសុខសុវត្ថិភាពជូនប្រជាពលរដ្ឋ។

លោក ហេង រតនា បានឱ្យដឹងថា នៅថ្ងៃអាទិត្យ​ ទី១០​ ខែសីហា​ ឆ្នាំ២០២៥នេះ​ នៅចំនុចគ្រាប់បែកទម្លាក់ពីយន្តហោះប្រភេទ MK-84 ស្ថិតនៅភូមិថ្មដូន​ ឃុំគោកមន​ ស្រុកបន្ទាយអំពិល​ ខេត្តឧត្តរមានជ័យ​ មានមន្ត្រីអនុពន្ធ័យោធា​ចំនួន ១៤រូប​ ជាតំណាងមកពីប្រទេសចំនួន៩​ រួមមានអូស្ត្រាលី​ កាណាដា​ អង់គ្លេស​ ចិន​ ជប៉ុន​ កូរ៉េខាងត្បូង​ បារាំង​ ឡាវ និងវៀតណាម​ បានចុះពិនិត្យទីតាំងនិងគ្រាប់បែក MK-84 នោះជាក់ស្តែង។

បើតាមការបញ្ជាក់របស់លោក ហេង រតនា, គ្រាប់បែក MK-84 នេះ​ មានទម្ងន់ជិតមួយតោន​ មានបណ្តោយប្រមាណ៣.៥ម៉ែត្រ​ ទំហំអង្កត់ផ្ចិតជិតកន្លះម៉ែត្រ​ ផលិតនៅឆ្នាំ១៩៩៦។ នៅចំនុចទីតាំងតែមួយនេះ​ ពួកសៀមបានទម្លាក់គ្រាប់បែកចំនួន១០គ្រាប់​ ហើយផ្ទុះចំនួន៤គ្រាប់​ រីឯ ៦គ្រាប់មិនផ្ទុះ​ដោយរួមទាំងគ្រាប់បែក MK-84​ ដែលបានឃើញនេះផងដែរ។

លោកបញ្ជាក់ទៀតថា បើផ្អែកតាមព័ត៌មានកំណត់ត្រា​សឹកសង្គ្រាម នៅទិសខេត្តឧត្តរមានជ័យនេះ​ មានគ្រាប់បែកទម្លាក់ពីយន្តហោះនៅទិសឧត្តរមានជ័យនេះមានចំនួន ១ ៥៤៩គ្រាប់។​ អង្គភាព CMAC កំពុងដំណើរការស្រាវជ្រាវ​ ដាក់ស្លាកសញ្ញា និងបោសម្អាតទីតាំងដែលរងផលប៉ះពាល់ដោយសារការទម្លាក់គ្រាប់បែក​ និងគ្រាប់កាំភ្លើងធំគ្រប់ប្រភេទ​ ដើម្បីធានាសុខសុវត្ថិភាពជូនប្រជាពលរដ្ឋ៕