ក្រុមលោកអភិបាលព្រះសហគមន៍នៅ​ឥណ្ឌូនេស៊ី​ជំរុញ​ឲ្យ​មាន​វិធានការ​យ៉ាង​ម៉ឺងម៉ាត់​ដើម្បី​ការពារ​សេរីភាព​ខាង​សាសនា

ក្រុមលោកអភិបាលនៃព្រះសហគមន៍កាតូលិកនៅប្រទេសឥណ្ឌូនេស៊ី បានជំរុញឱ្យរដ្ឋាភិបាលនៅទីក្រុងហ្សាកាតា ចាត់វិធានការយ៉ាងម៉ឺងម៉ាត់ប្រឆាំងនឹងគ្រប់ទម្រង់នៃការមិនអត់ឱន ជាពិសេសអំពើហិង្សា បន្ទាប់ពីការវាយប្រហារជាបន្តបន្ទាប់លើកន្លែងគោរពបូជា និងស្ថាប័នគ្រីស្តសាសនា។

ក្រុមលោកអភិបាលនៃព្រះសហគមន៍កាតូលិកនៅប្រទេសឥណ្ឌូនេស៊ីបានអំពាវនាវឱ្យរដ្ឋាភិបាលកណ្តាលនៅទីក្រុងហ្សាកាតាចាត់វិធានការយ៉ាងម៉ឺងម៉ាត់ប្រឆាំងនឹងគ្រប់ទម្រង់នៃការមិនអត់ឱន ដែលពួកគេបានសង្កត់ធ្ងន់ថាជាបទល្មើសព្រហ្មទណ្ឌ។

ដូចដែលបានរាយការណ៍ដោយវ៉ាទីកង់ញូវ ក្រុមលោកអភិបាលបានទទូចថា "គ្មាននរណាម្នាក់ គួរទទួលការពិន័យទេប្រសិនបើពួកគេមិនប្រព្រឹត្តអំពើអនាធិបតេយ្យជាពិសេសប្រសិនបើពួកគេផ្តោតលើសកម្មភាពអធិស្ឋាននិងការគោរពបូជានៅក្នុងផ្នែកណាមួយនៃប្រទេសឥណ្ឌូនេស៊ី"។

សេចក្តីថ្លែងការណ៍រួមរំលឹកថា សេរីភាពខាងសាសនា និងការគោរពប្រណិប័តន៍មានចែងនៅក្នុងរដ្ឋធម្មនុញ្ញឆ្នាំ ១៩៤៥ របស់ប្រទេសឥណ្ឌូនេស៊ី ហើយត្រូវបានធានានៅក្រោមមាត្រា ២៨ និង ២៩  ដូច្នេះ វាបញ្ជាក់ពីកាតព្វកិច្ចរបស់រដ្ឋ តាមរយៈការអនុវត្តច្បាប់ និងអាជ្ញាធរមូលដ្ឋានក្នុងការ ធ្វើអន្តរាគមន៍យ៉ាងម៉ឺងម៉ាត់ ដើម្បីធានាថាអំពើហិង្សានឹង មិនកើតឡើងម្តងទៀត។

ឧប្បត្តិហេតុថ្មីៗរួមមានការបំផ្លិចបំផ្លាញកន្លែងគោរពបូជារបស់គ្រិស្តបរិស័ទមួយចំនួន និងការវាយឆ្មក់ទៅលើសាលានិកាយប្រូតេស្តង់។ សេចក្តីអំពាវនាវនេះ បានអំពាវនាវឱ្យសមត្ថកិច្ចអនុវត្តច្បាប់ និងអាជ្ញាធរ​តុលាការ ទប់ស្កាត់ និងស៊ើបអង្កេតឱ្យបានហ្មត់ចត់ រាល់អំពើហិង្សា ការបដិសេធ ការរារាំង ឬការបំផ្លិចបំផ្លាញទីកន្លែងដែលប្រើប្រាស់សម្រាប់ការបន់ស្រន់៕