លោកដូណាល់ ត្រាំ គំរាមនឹងវាយប្រហារកាន់តែខ្លាំងក្លាលើអ៊ីរ៉ង់ ប្រសិនបើទីក្រុងតេអេរ៉ង់ មិនទទួលស្គាល់ការបរាជ័យ
ប្រធានាធិបតីសហរដ្ឋអាម៉េរិក លោកដូណាល់ ត្រាំ មិនកំពុងលេងល្បិចទេ លោកត្រៀមរួចជាស្រេចនឹងបង្កើតឋាននរក។ អ្នកនាំពាក្យសេតវិមាន លោកស្រី ការ៉ូលីន លីវីត បាននិយាយ ក្នុងអំឡុងសន្និសីទកាសែតមួយថា ៖ “អ៊ីរ៉ង់មិនគួរធ្វើខុសម្តងទៀតឡើយ”។
អ្នកនាំពាក្យសេតវិមានអាម៉េរិក លោកស្រីការ៉ូលីន លីវីត បានថ្លែងថា សហរដ្ឋអាម៉េរិកបានផ្ញើសារកាលពីថ្ងៃពុធ ទី២៥ ខែមីនា នូវការព្រមានដ៏ធ្ងន់ធ្ងរសម្រាប់អ៊ីរ៉ង់ និងប្រកាសថា ប្រធានាធិបតីអាម៉េរិក លោកដូណាល់ ត្រាំ នឹងវាយប្រហារកាន់តែខ្លាំងថែមទៀត ប្រសិនបើទីក្រុងតេអេរ៉ង់មិនទទួលស្គាល់ការបរាជ័យខាងយោធារបស់ខ្លួន។
ក្នុងអំឡុងសន្និសីទកាសែតមួយឆ្លើយតបទៅនឹងអ្នកកាសែត លោកស្រីការ៉ូលីន លីវីត បាន ថ្លែងថា ៖ “ប្រធានាធិបតីអាម៉េរិកមិនកំពុងលេងល្បិចទេ លោកត្រៀមរួចជាស្រេចនឹងបង្កើត ឋាននរក។ ហើយអ៊ីរ៉ង់មិនត្រូវបន្លំម្តងទៀតឡើយ។” លោកស្រីបានថ្លែងថា ៖ “ប្រសិនបើអ៊ីរ៉ង់ បដិសេធមិនទទួលស្គាល់សច្ចៈភាពនៃស្ថានភាពសព្វថ្ងៃ ប្រសិនបើគេមិនយល់ថា គេបានចាញ់ខាងយោធា ហើយគេបន្តការប្រយុទ្ធ ប្រធានាធិបតីត្រាំ នឹងធ្វើរហូតដល់ការវាយប្រហារកាន់តែធ្ងន់ធ្ងរឡើងថែមទៀតដែលមិនធ្លាប់មាន។”
កាលពីថ្ងៃសៅរ៍ ចុងសប្តាហ៍មុន ប្រធានាធិបតីត្រាំ បានកំណត់ឱសនាវាទ ៤៨ម៉ោង ក្រោយមកតម្លើងដល់ ៥ថ្ងៃ សម្រាប់អ៊ីរ៉ង់ ដើម្បីបើកច្រកសមុទ្រអ័រមូស និងគំរាមថា លោកនឹងកម្ទេចចោលទាំងស្រុងនូវបណ្តាញអគ្គីសនីអ៊ីរ៉ង់។ លុះមកដល់ថ្ងៃចន្ទ ដើមសប្តាហ៍ លោកសម្តែងក្តីរីករាយ ដោយលើកឡើងអំពីការបោះជំហានទៅមុខជាមួយទីក្រុងតេអេរ៉ង់លើចំនុចនៃកិច្ចព្រមព្រៀង។ អ្នកនាំពាក្យប្រធានាធិបតីអាម៉េរិក ក៏បានបន្តថា កិច្ចចរចាជាមួយទីក្រុងតេអេរ៉ង់នៅបន្ត។ កិច្ចចរចាហុចផ្លែផ្កា ដូចដែលប្រធានាធិបតីបាននិយាយកាលពីថ្ងៃចន្ទ ការចរចានឹងនៅតែបន្ត។ យោងតាមអ្នកសារព័ត៌មាន ដែលបានចោទសួរអំពីផែនការមួយដែលមាន ១៥ចំនុច ដែលទីក្រុងវ៉ាស៊ីនតុនបានបញ្ជូនទៅ លោកស្រីការ៉ូលីន លីវីត បញ្ជាក់ថា សេតវិមានមិនដែលបានបញ្ជាក់អំពីរឿងនេះទេ។ វាមានធាតុពិតខ្លះៗ ប៉ុន្តែក៏មានអ្វីៗដែលលោកស្រីបានអាន ដែលពួកវាមិនមែនជាការពិតទាំងស្រុង។
ទីក្រុងវ៉ាស៊ីនតុន បានបញ្ជូនសារនានាទៅកាន់ទីក្រុងតេអេរ៉ង់តាមរយៈអន្តរការីផ្សេងៗ គ្នា ទោះបីជាយ៉ាងណា រដ្ឋមន្ត្រីការបរទេសអ៊ីរ៉ង់ លោកអាបបាស អារ៉ាជី បានបដិសេធថា អ៊ីរ៉ង់មិនមានចេតនាចង់រៀបចំការចរចាណាមួយរវាងភាគីទាំងពីរនោះទេ។
នៅតាមកញ្ចក់ទូរទស្សន៍រដ្ឋ លោកបានបន្ថែមថា អាជ្ញាធរជាន់ខ្ពស់បំផុតរបស់អ៊ីរ៉ង់កំពុងសិក្សាសំណើរដែលបានស្នើឡើង។ លោករដ្ឋមន្រ្តីការបរទេសអ៊ីរ៉ង់ ទទូចថា ទោះជាយ៉ាងណា ការឆ្លងឆ្លើយសារតាមរយៈអន្តរការី មិនមែនមានន័យថា ជាការចរចាជាមួយសហរដ្ឋអាម៉េរិកទេ។ លោកបានច្រានចោលការគិតបែបនេះ។ ទីក្រុងតេអេរ៉ង់ មិនមានប្រាថ្នារៀបចំកិច្ចសន្ទនាជាមួយទីក្រុងវ៉ាស៊ីនតុននោះទេ។ លោកបន្ថែមថា ៖“ទីក្រុងវ៉ាស៊ីនតុនបានបរាជ័យលើគោលដៅសង្រ្គាមរបស់ខ្លួន និងមិនទទួលបានជោគជ័យរហ័ស និងទាំងមិនបានផ្លាស់ប្តូររបបនៅទីក្រុងតេអេរ៉ង់ផងដែរ។ សហរដ្ឋអាម៉េរិក ក៏បានបរាជ័យក្នុងការការពារសម្ព័ន្ធមិត្តរបស់ខ្លួនទោះបីមានវត្តមានមូលដ្ឋានយោធាអាម៉េរិកនៅក្នុងតំបន់ក៏ដោយ”។
លោកអាបបាស អារ៉ាជី និយាយថា បានផ្ញើសារទៅកាន់ប្រទេសជិតខាងរបស់អ៊ីរ៉ង់។ សូមនៅឲ្យឆ្ងាយពីអាម៉េរិក។ លោកក៏បាននិយាយថា អ៊ីរ៉ង់បានបង្ហាញទៅកាន់ពិភពលោកថា មិនមានប្រទេសណាមួយអាចគំរាមកំហែងសន្តិសុខរបស់ខ្លួននោះទេ។ ទីក្រុងតេអេរ៉ង់ មិនចង់បានសង្គ្រាមទេ ប៉ុន្តែចង់ឲ្យមានការបញ្ចប់ជាអចិន្ត្រៃយ៍នៃជម្លោះ និងទារប្រាក់សំណងសម្រាប់ការបំផ្លាញ ដែលបណ្តាលមកពីការបំផ្ទុះគ្រាប់បែករបស់អ៊ីស្រាអែល-អាម៉េរិក។
Daily Program
