ព្រះមហាក្សត្រកម្ពុជា« ការអភិរក្ស និងអភិវឌ្ឍន៍បេតិកភណ្ឌវប្បធម៌ គឺជាបេសកកម្មដែលមិនចេះចប់មិនចេះហើយ»

ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានសង្កត់ធ្ងន់ថា ការអភិរក្ស និងការអភិវឌ្ឍបេតិកភណ្ឌវប្បធម៌របស់កម្ពុជា គឺជា «បេសកកម្មដែលមិនចេះចប់មិនចេះហើយ» ដែលទាមទារឱ្យមានការចូលរួមយ៉ាងសកម្មពីគ្រប់វិស័យនៅក្នុងសង្គម ទាំងក្នុងជាតិ និងអន្តរជាតិ ជាពិសេសគឺយុវជនជំនាន់ក្រោយ។

ព្រះរាជសាររបស់ព្រះករុណាជាអម្ចាស់ជីវិតលើត្បូង ត្រូវបានឡាយព្រះហស្តលេខានៅថ្ងៃទី៧ ខែកក្កដា ដើម្បីអបអរសាទរខួបលើកទី៩ នៃការដាក់បញ្ចូលតំបន់ប្រាសាទសំបូរព្រៃគុក ទៅក្នុងបញ្ជីបេតិកភណ្ឌពិភពលោករបស់អង្គការយូណេស្កូ (៨ កក្កដា ២០១៧ - ៨ កក្កដា ២០២៦)។

នៅក្នុងព្រះរាជសារនោះ ព្រះមហាក្សត្របានសម្តែងនូវព្រះរាជហឫទ័យរីករាយយ៉ាងជ្រាលជ្រៅ និងបានអបអរសាទរចំពោះទិវាដ៏វិសេសវិសាលនេះ ព្រមទាំងបានកោតសរសើរយ៉ាងខ្ពង់ខ្ពស់ចំពោះការបន្តអភិរក្ស និងការគ្រប់គ្រងប្រកបដោយចីរភាពនៅតំបន់សំបូរព្រៃគុក ដោយព្រះអង្គបានចាត់ទុកស្ថានភាពជាបេតិកភណ្ឌពិភពលោកនេះថា ជាប្រភពនៃមោទនភាពសម្រាប់កម្ពុជា និងជាសក្ខីភាពមួយបង្ហាញពីការប្តេជ្ញាចិត្តរបស់ប្រទេសជាតិក្នុងការការពារមរតកវប្បធម៌ដ៏សម្បូរបែបរបស់ខ្លួន។

ព្រះករុណាជាអម្ចាស់ជីវិតលើត្បូង ក៏បានសម្តែងនូវព្រះព្រហ្មវិហារធម៌នឹកគុណូបការៈដ៏ខ្ពង់ខ្ពស់ថ្វាយចំពោះ ព្រះបរមរតនកោដ្ឋ សម្តេចព្រះ នរោត្តម សីហនុ សម្រាប់ការលះបង់ពេញមួយព្រះជន្មរបស់ព្រះអង្គក្នុងការការពារបេតិកភណ្ឌវប្បធម៌កម្ពុជា ដោយទ្រង់បានទទួលស្គាល់នូវព្រះរាជវិភាគទានដ៏ឧត្តុង្គឧត្តមមិនចេះរីងស្ងួតក្នុងការថែរក្សាអត្តសញ្ញាណប្រវត្តិសាស្ត្រ និងវប្បធម៌របស់ជាតិ។

បន្ថែមពីនេះ ព្រះមហាក្សត្របានសម្តែងនូវការកោតសរសើរចំពោះប្រជាពលរដ្ឋកម្ពុជា និងបានទទួលស្គាល់នូវកិច្ចខិតខំប្រឹងប្រែងរបស់រាជរដ្ឋាភិបាលអាណត្តិមុនៗក្នុងការសម្រេចបាននូវការទទួលស្គាល់ជាអន្តរជាតិសម្រាប់ទ្រព្យសម្បត្តិវប្បធម៌របស់កម្ពុជា។ ព្រះអង្គបានកោតសរសើរចំពោះការដឹកនាំរបស់អតីតនាយករដ្ឋមន្ត្រី សម្តេចអគ្គមហាសេនាបតីតេជោ ហ៊ុន សែន និងនាយករដ្ឋមន្ត្រីបច្ចុប្បន្ន សម្តេចមហាបវរធិបតី ហ៊ុន ម៉ាណែត ចំពោះតួនាទីរបស់សម្តេចទាំងពីរក្នុងការលើកកម្ពស់ និងថែរក្សាបេតិកភណ្ឌវប្បធម៌ និងប្រវត្តិសាស្ត្ររបស់ប្រទេសជាតិសម្រាប់ជំនាន់ក្រោយៗ។

ព្រះករុណាក៏បានថ្លែងអំណរគុណផងដែរចំពោះ រាជរដ្ឋាភិបាល, ក្រសួងវប្បធម៌ និងវិចិត្រសិល្បៈ, អាជ្ញាធរជាតិសំបូរព្រៃគុក, គណៈកម្មាធិការសម្របសម្រួលអន្តរជាតិសម្រាប់ការគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រសំបូរព្រៃគុក (ICC-Angkor/Sambor Prei Kuk) ដែលដឹកនាំរួមគ្នាដោយតំណាងប្រទេសបារាំង និងជប៉ុន ព្រមទាំងដៃគូជាតិ និងអន្តរជាតិទាំងអស់ សម្រាប់ការបន្តគាំទ្រក្នុងការការពារ និងអភិវឌ្ឍន៍តំបន់បុរាណវត្ថុវិទ្យាមួយនេះ។

គួររំលឹកផងដែរថា ប្រាសាទសំបូរព្រៃគុក ត្រូវបានដាក់បញ្ចូលក្នុងបញ្ជីបេតិកភណ្ឌពិភពលោករបស់អង្គការយូណេស្កូ កាលពីថ្ងៃទី៨ ខែកក្កដា ឆ្នាំ២០១៧ ក្នុងសម័យប្រជុំលើកទី៤១ នៃគណៈកម្មាធិការបេតិកភណ្ឌពិភពលោក ដែលបានប្រព្រឹត្តទៅនៅទីក្រុងក្រាកូវ (Kraków) ប្រទេសប៉ូឡូញ។