ស្របពេលដែលវិស័យហិរញ្ញវត្ថុនៅកម្ពុជា កំពុងរីកលូតលាស់ និងមានការប្រកួតប្រជែងខ្លាំងក្នុងរយៈពេលចុងក្រោយនេះ ក៏មានគ្រឹះស្ថានមីក្រូហិរញ្ញវត្ថុនៅកម្ពុជាមួយចំនួនបានលក់ភាគហ៊ុនរបស់ខ្លួនទៅឱ្យធនាគារបរទេស និងខ្លះ បានរួមបញ្ជូលគ្នាជាមួយធនាគារបរទេស និងបានវិវត្តខ្លួនទៅជាធនាគារពាណិជ្ជ ដើម្បីពង្រីកវិសាលភាពរបស់ខ្លួនឱ្យកាន់តែល្អប្រសើរ។
តាមរយៈការវិវត្តទាំងនេះ តើនៅពេលអនាគត គ្រឹះស្ថានមីក្រូហិរញ្ញវត្ថុនៅកម្ពុជា អាចនឹងបាត់ចេញពីទីផ្សារដែរឬយ៉ាងណា?
លោក កាំង តុងងី អ្នកនាំពាក្យសមាគមមីក្រូហិរញ្ញាវត្ថុ បានអោយដឹងថា វិស័យមីក្រូហិរញ្ញាវត្ថុមានប្រវត្តិជាប់ទាក់ទងនឹងបរទេសតាំងពីដើមមកហើយ តាំងពីការចាប់ផ្តើមក្នុងទសវត្សឆ្នាំ១៩៩០មកម្ល៉េះ ដែលវាជាទម្រង់អភិវឌ្ឍរបស់ម្ចាស់ជំនួយ របស់អង្គការធំៗដែលបានចូលរួមជួយកម្ពុជា។
លោក កាំង តុងងី បានបន្តថា ៖ «ចាប់តាំងពីឆ្នាំ២០០០មក គម្រោងទាំងអស់បានវិវត្តមកជាក្រុមហ៊ុនឯកជន ហើយមួយចំនួនមានភាគហ៊ុនបរទេសតាំងតែពីដើម ហើយមួយចំនួនទៀតជាភាគហ៊ុនរបស់ខ្មែរ។ នៅពេលដែលវិស័យមីក្រូហិរញ្ញាវត្ថុកើនឡើងខ្ពស់ ផ្សំជាមួយសេ្ថរភាពនយោបាយ ហើយចាប់ពីឆ្នាំ២០១០មក យើងឃើញមានធនាគារឯកជនលើពិភពលោក ចាប់ផ្តើមចូលមកទិញភាគហ៊ុន ទិញទាំងស្រុង ឬចូលរួមវិនិយោគបន្ថែមលើវិស័យមួយនេះ»។
លោកបានបន្ថែមថា ៖ «យើងឃើញគ្រឹះស្ថានមីកូ្រហិរញ្ញាវត្ថុស្ថាបនា ក្រោមមកត្រូវបានធនាគារទិញ គ្រឹះស្ថានក្រេឌីត ត្រូវបានធនាគារហ្វីលីពទិញ ក៏ដូចជាគ្រឹះស្ថានមីក្រូហិរញ្ញាវត្ថុផ្សេងៗទៀតមួយចំនួនទិញ ដូចជាក្រុមហ៊ុនមកពីចិន កូរ៉េ សឹង្ហបុរី ជប៉ុនអីជាដើម ដោយសារតែគាត់មើលឃើញពីកំណើននៃសេដ្ឋកិច្ចកម្ពុជា»។
លោក កាំង តុងងី បានបន្តថា នេះជានិនា្នការធម្មតាដូចតែនៅក្នុងប្រទេសផ្សេងៗ ដែលនៅពេលប្រទេសកំពុងអភិវឌ្ឍតួអង្គក្នុងស្រុកខិតខំកសាងទីផ្សារ ហើយនៅពេលដែលទីផ្សាររឹងមាំហើយនឹងចាប់ផ្តើមមានអ្នកវិនិយោគអន្តរជាតិចូលមកវិនិយោគក្នុងវិស័យនេះ កម្ពុជាក៏ងាកទៅរកនិន្នាការនេះដូចគ្នាដែរ។
លោកថា ៖ «យើងមើលឃើញថានេះជាការវិវត្តល្អទេសម្រាប់ទីផ្សារ នៅពេលដែលអ្នកផ្តល់សេវាច្រើនការប្រកួតប្រជែងកាន់តែខ្លាំង អ្នកដែលចំណេញគឺអតិថិជនទេ ហើយអ្នកដែលប្រកួតប្រជែងលើទីផ្សារគាត់ត្រូវផ្តល់ទៅលើគុណភាពនៃសេវា ដើម្បីធានាបាននូវប្រសិទ្ធភាពការផ្តល់សេវារបស់គាត់ ដែលគ្រឹះស្ថានក្នុងស្រុកគាត់ចាប់ដៃគូរជាមួយនិងគ្រឹះស្ថានអន្តរជាតិ»។
លោកបញ្ជាក់បន្ថែមថា ៖ «ទី១ គាត់មានលទ្ធភាពទទួលបានទុនវិនិយោគពីប្រទេសអភិវឌ្ឍទាំងអស់ណឹង ជាទូទៅមានអត្រាការប្រាក់ថោកជាងទុនដែលប្រមូលពីទីផ្សារអន្តរជាតិ ឬទុនដែលប្រមូលពីទីផ្សារក្នុងស្រុក។ ទី២ គ្រឹះស្ថានអន្តរជាតិទាំងនោះ គេមានបច្ចេកវិទ្យាខ្ពស់ដែលអាចយកមកចែករំលែកជាមួយគ្រឹះស្ថាននៅក្នុងស្រុកពេលដែលគេទិញយកហើយណឹង។ ទី៣ គេមានបច្ចេកទេសល្អៗជាច្រើន ដែលគេយកមកជួយពង្រឹងនូវប្រសិទ្ធភាពនៃការផ្តល់សេវារបស់គ្រឹះស្ថាននៅក្នុងស្រុកដែលគេទិញយកណឹង»។
ការចូលប្រឡូករបស់គ្រឹះស្ថានអន្តរជាតិទាំងអស់នេះ វានឹងរឹតតែធ្វើអោយទីផ្សាររបស់កម្ពុចជា កាន់តែមានភាពទាក់ទាញ ការប្រកួតប្រជែងកាន់តែល្អ នាំអោយមានប្រសិទ្ធភាពប្រតិបត្តិការកាន់តែខ្ពស់ តម្លៃសេវាកាន់តែមានភាពថយចុះ។ លោក កាំង តុងងីបន្ថែម។
យ៉ាងណាក៏ដោយចុះ អ្នកជំនាញរូបនេះ អះអាងថា មកទល់ពេលនេះ វិស័យធនាគារ និងហិរញ្ញវត្ថុកម្ពុជា បានដើរដល់ចំណុចមួយដែលមានបរិមាណគ្រប់គ្រាន់ហើយ ដែលជាពេលវេលាដែលត្រូវពង្រឹងគុណភាពឱ្យបានល្អ ដើម្បីប្រកួតប្រជែងនៅក្នុងទីផ្សារ។ ដូច្នេះហើយសម្រាប់គ្រឹះស្ថានមីក្រូហិរញ្ញវត្ថុណា ដែលមិនមានគុណភាពសេវា និងប្រសិទ្ធភាពនៃប្រតិបត្តិការល្អទេនោះ គឺអាចប្រឈមមុខនឹងការដកខ្លួនចេញពីក្នុងទីផ្សារហិរញ្ញវត្ថុជាក់ជាមិនខាន។
លោក កាំង តុងងី បានបន្ថែមថា ស្របពេលគ្រឹះស្ថានហិរញ្ញវត្ថុមានចំនួនច្រើន និងមានការប្រកួតប្រជែងផងនោះ លោកជឿជាក់ថា ចំនួនគ្រឹះស្ថានមីក្រូហិរញ្ញវត្ថុនៅកម្ពុជា នៅពេលអនាគត នឹងមានការថយចុះជាងមុន ដោយសារគ្រឹះស្ថានហិរញ្ញវត្ថុតូចៗអាចនឹងត្រូវរួមបញ្ជូលគ្នា ដើម្បីពង្រឹងគុណភាពសេវាកម្ម និងកាត់បន្ថយថ្លៃដើមរបស់ខ្លួន ដើម្បីប្រកួតប្រជែងក្នុងទីផ្សារ។
បើតាមលោក កាំង តុងងី បច្ចុប្បន្នកម្ពុជា មានគ្រឹស្ថានធនាគារចំនួនប្រមាណ៦០ស្ថាប័ន គ្រឹះស្ថានមីក្រូហិរញ្ញវត្ថុចំនួនប្រមាណ៨០ស្ថាប័ន ក្រុមហ៊ុនភតិសន្យាប្រមាណជាង១០ស្ថាប័ន និងគ្រឹះស្ថានឥណទានជនបទជាង១០០ស្ថាប័នផង៕
Daily Program
