អំពើជួញដូរមនុស្សនិងការកេងប្រវ័ញ្ចផ្លូវភេទនៅតែមាន! សូមយកចិត្តទុកដាក់

នៅសម័យនេះអំពើជួញដូរមនុស្សនិងការកេងប្រវ័ញ្ចផ្លូវភេទនៅតែមាននៅកម្ពុជា ដែលយើងគប្បីប្រយុទ្ធប្រឆាំងនឹងករណីនេះឲ្យដាច់ខាតថែមទៀត ដើម្បីធានានិងការពារសេចក្តីថ្លៃថ្នូរបស់មនុស្សជាតិនិងយុត្តិធម៌សម្រាប់មនុស្សទាំងអស់។

តាមសេចក្តីរាយការណ៍របស់សារព័ត៌មានមួយចំនួនកាលពីឆ្នាំ២០២៥ កម្ពុជា​បាន​បង្ក្រាប​ករណី​ជួញដូរ​មនុស្ស និង​ការកេងប្រវ័ញ្ច​ផ្លូវភេទ​សរុប​ចំនួន ២៧២ ករណី​ពោលគឺមាន ​កើនឡើង ៣៧ ភាគរយ​បើធៀប​នឹង​ឆ្នាំមុន។

បើតាមរបាយការណ៍នៅក្នុងករណីបង្រ្កាបអំពើផ្ទុយនឹងច្បាប់នេះអាជ្ញាធរ​បាន​ចាប់ខ្លួន​ជនសង្ស័យ​សរុប​ចំនួន ៤១០ នាក់ រួមទាំង​ជនបរទេស​ចំនួន ៤៣ នាក់​ផងដែរ ហើយក្រោយពេលដែលបង្រ្កាបជនរងគ្រោះសរុប​ចំនួន ៩៩៤ នាក់​ត្រូវបាន​ជួយសង្គ្រោះ ។

អ្វីដែលគួរឲ្យកត់សំគាល់និងយកចិត្តទុកដាក់ទៅទៀតនោះគឺថា ក្នុងចំណោម​ជនរងគ្រោះទាំងអស់នោះគឺ​មានអនីតិជនក្រោមអាយុ១៨ឆ្នាំដល់ទៅ ២០៩ នាក់ ដូច្នេះវាគឺជាឧក្រិដ្ឋកម្មដែលយើងត្រូវតែបន្តពង្រឹងនូវការអនុវត្តច្បាប់ឲ្យកាន់តែមានប្រសិទ្ធភាពដើម្បីធានាថា ប្រទេសយើងពិតជាយកចិត្តទុកដាក់នឹងបញ្ហានេះ ហើយប្រទេសយើងគឺជាប្រទេសដែលស្អប់ខ្ពើមនឹងឧក្រិដ្ឋកម្មនេះ។​

ជាទូទៅករណី​ជួញដូរ​មនុស្សទាំងនេះ​ត្រូវរកឃើញថា វាត្រូវក្រុមឧក្រិដ្ឋជនអូសទាញនិងបាន​ផ្សារភ្ជាប់ពួកគេទៅនឹង ​ឧក្រិដ្ឋកម្ម​ក្លែងបន្លំ ជម្លោះ​ការងារ ការងារ​ និង​អន្តោប្រវេសន៍​ខុសច្បាប់​ជាដើម ហើយពួកគេខ្លះគឺជាជនបរទេសថែមទៀត។

មកដល់ពេលនេះដើម្បីបំពេញតាមការ ​សន្យា​លុបបំបាត់​ការជួញដូរ​មនុស្ស ការកេងប្រវ័ញ្ច​ផ្លូវភេទ និង​ការឆបោក​តាម​អ៊ីនធឺណិត​គ្រប់​ប្រភេទ និងក៏ដើម្បី​បង្កើន​ការគោរព​សិទ្ធិមនុស្ស សេចក្តីថ្លៃថ្នូរ និង​យុត្តិធម៌​សង្គម យើងទាំងអស់គ្នាចាំបាច់ត្រូវតែមានការប្តេជ្ញាចិត្តឲ្យខ្ពស់ ហើយក៏ខិតខំពង្រឹងច្បាប់ឲ្យបានហ្មត់ចត់ ជាទីបំផុត។

ក្រៅពីនោះពលរដ្ឋយើងក៏ត្រូវតែមានការប្រុងប្រយ័ត្នខ្ពស់ ហើយដាច់ខាតក៏កុំលង់ខ្លួននឹងការអន្ទងដោយយកការងារ ប្រាក់ចំណូល ឫ ក៏ភាពឡូយឆាយជីវិតហ៊ឺហា។ អ្វីដែលគេបង្ហាញគឺគ្រាន់តែជាអន្ទាក់ ដែលគេរាយជាមួយនឹងនុយ ដើម្បីឲ្យយើងចូល។ នៅពេលដែលយើងចូលទៅបានដឹងថា វាគឺជាអន្ទាក់វាហួសពេល ហើយទម្រាំដល់មានការសង្រ្គោះជីវិតយើងកិត្តិយសយើង អនាគតយើងក៏វាទៅតាមនោះផងដែរ ដូច្នេះក្រៅពីគេជួយយើងក៏ត្រូវតែចេះជួយនិងចេះការពារខ្លួនឯងផងដែរ៕