អាហារបរទេសទទួលទានចុះ ប៉ុន្តែកុំញឹកញាប់ពេក!

ដើម្បីសុវត្ថិភាព សន្សំសំចៃ លើកកំពស់សមត្ថភាពសេដ្ឋកិច្ច ហើយជាពិសេស គឺលើកស្ទួយផលិតផលនៅក្នុងស្រុកយើងទាំងអស់គ្នា គួរតែទទួលទានអ្វីដែលប្រជាពលរដ្ឋកម្ពុជាយើងផលិតនិង​ផ្គត់ផ្គង់​នៅក្នុងស្រុកដោយខ្លួនឯងមិននាំចូលពីក្រៅ។

ដោយសារតែស្រុកទេសយើងសន្តិភាព មានទំនាក់ទំនងល្អជាមួយនឹងប្រទេសនានា  ផលិតផលដែលបម្រើការហូបចុកទទួលទានកាន់តែសម្បូណ៍បែប ហើយប្លែកៗសឹងតែគ្រប់ទិសទីនៅលើពិភពលោក ដែលត្រូវបានគេនាំចូលមកបម្រើសេចក្តីត្រូវការនៅក្នុងស្រុក។

ជាទូទៅផលិតផលប្លែកៗដែលនាំចូលពីប្រទេសទាំងនេះមានតម្លៃថ្លៃ ហើយនៅតែមានអ្នកដែលទទួលទាន​ជាហូរហែរ។ អ្នកខ្លះព្រោះតែចង់ស្គាល់ចង់ដឹងរសជាតិក៏បានសន្សែសន្សំលុយហើយទទួលទាន​នឹងគេផងដែរ។​

ហូបម្តងម្កាលចុះ ប៉ុន្តែកុំញឹកញាប់ពេក។ ការហូបចុករបស់ប្លែកហើយថ្លៃនេះ ជាទូទៅគឺនាំឲ្យយើងខាតបង់ ពោលគឺយើងខ្លួនឯងអស់លុយ លើការហូបចុកបែបហ៊ឺហារនេះ។ ហើយអ្វីដែលសំខាន់ទៅទៀតនោះ ព្រោះតែចង់យកចំណេញខ្លាំង អាចមានក្រុមឈ្មួញខិលខូចលួចបន្លំយកផលិតផលស្រុកគេដែលមានបញ្ហាដូចជា ផលិតផលហួសកាលបរិច្ឆេទ ផលិតផលដែលមានសាធាតុប៉ះពាល់ដល់សុខភាពជាដើម។

ជាក់ស្តែងថ្មីៗកន្លងទៅនេះ សមត្ថកិច្ចបានរកឃើញត្រីសាម៉ុនដែលដឹកតាមឡានក្រុង​១គ្រឿងមានបរិមាណដល់ទៅ ១៤០ កេស  ស្មើនឹង ៣.០១០គីឡូក្រាម គឿងក្នុងសត្វមាន់ ចំនួន ២១០កេស ស្មើនឹង ២.៥២០គីឡូក្រាម ទឹកស៊ីអ៊ីវ ចំនួន ១០០ប៊ីដុង ស្មើនឹង ៤០០លីត្រ វ៉ាសាប៊ិ ចំនួន ២កេស ស្មើនឹង ១០០គីឡូក្រាម សរុបចំនួន ៥.៦៣០គីឡូក្រាម និង ៤០០លីត្រ។

ជាលទ្ធផល ក្រោយពីមន្រ្តីជំនាញធ្វើការត្រួតពិនិត្យ​បានរកឃើញថា ទំនិញទាំងអស់ត្រូវបានខូចគុណភាព ដោយសារការដឹកជញ្ជូន និងការរក្សាទុក ពុំត្រឹមត្រូវតាមលក្ខខណ្ឌ​ បច្ចេកទេស។ ហេតុនេះ ព្រះរាជអាជ្ញារង​ក៏បានអនុញ្ញាតឱ្យរឹបអូស​ដើម្បីម្ទេចចោលទៅតាមនីតិវិធី។

នេះគឺករណីសមត្ថកិច្ចរកឃើញ ចុះបើរកមិនឃើញផលិតផលនាំចូលទាំងនេះ នឹងលេចធ្លាយទៅទីផ្សារ ដូច្នេះអ្នកដែលទទួលទានក្រៅពីហូបចុករបស់ដែលគ្មានសុវត្ថិភាព គឺចំណាយប្រាក់ដោយឥតប្រយោជន៍ និងនាំ​ឲ្យ​សុខភាព​មិនល្អថែមទៀត។

ករណីដូចជាត្រីសាលម៉ុន​ជាដើម គឺមានតម្លៃដល់ទៅ ៣០ទៅ៤០ ដុល្លារ ខណៈដែលត្រីចិញ្ចឹមនិងត្រីធម្មជាតិមួយគីឡូ ២ម៉ឺនរៀល គឺពលរដ្ឋរអ៊ូ ដូច្នេះតើយើងខាតបង់ប៉ុណ្ណា។ ករណីនេះគឺដូចជាករណីដែលបានលើកឡើងខាងលើ គឺក្រៅពីចំណាយច្រើនហើយ គឺបានផលិតផលដែលមិនមានគុណភាពថែមទៀត ដូច្នេះវាគឺជាការខាត់បង់ខ្លាំងណាស់ ដែលយើងទាំងអស់គ្នាគប្បីត្រូវតែយកចិត្តទុកដាក់លើបញ្ហានេះ។​

សរុបទៅ​ប្រសិនបើយកល្អ គឺគួរតែទម្លាប់ជាតិនិយមបន្តិច ពោលគឺហូបចុកទទួលទានតែនៅលើផលិតផលនៅក្នុងស្រុក ដើម្បីលើកកំពស់កម្រិតជីវភាពរបស់អ្នកដែលពាក់ព័ន្ធ ហើយសង្ឃឹមថា អ្វីៗនឹងប្រសើរឡើងនៅពេលអនាគត៕