បញ្ចប់ការធ្វើសមយុទ្ធរបស់ចិននៅជុំវិញកោះតៃវ៉ាន់ លោកស៊ី ជីនពីង ព្រមានថា ការបង្រួបបង្រួមគឺមិនអាចឈប់បានទេ
លំហាត់សមយុទ្ធរបស់ចិននៅជុំវិញកោះតៃវ៉ាន់បានបញ្ចប់កាលពីថ្ងៃពុធ ទី៣១ ខែធ្នូ ឆ្នាំ២០២៥។ ទីក្រុងប៉េកាំង បានវាយតម្លៃអំពីភាពជោគជ័យនៃសមយុទ្ធដែលសំដៅធ្វើក្លែងការបិតកំពង់ផែ តៃវ៉ាន់។ ទីក្រុងតៃប៉ិ បានថ្កោលទោសសមយុទ្ធរយៈពេល ២ថ្ងៃនេះ និងចាត់ទុកថា វាជាការបង្កហេតុច្បាស់ៗប្រឆាំងនឹងសន្តិសុខក្នុងតំបន់ និងសណ្តាប់ធ្នាប់ពិភពលោក។
ប្រទេសចិនបានបញ្ជាក់ថាបានជោគជ័យក្នុងការធ្វើសមយុទ្ធយោធា ដែលចាប់ផ្តើមតាំងពីថ្ងៃចន្ទ នៅជុំវិញកោះតៃវ៉ាន់ ដែលរួមមានការបាញ់គ្រាប់ពិតដែលសំដៅធ្វើក្លែងការបិទកំពង់ផែនៃកោះ និងការវាយប្រហារប្រឆាំងនឹងគោលដៅយោធានៅតាមសមុទ្រ។
នៅអំឡុងការថ្លែងសន្ទរកថាចំពោះជាតិនាពេលចូលឆ្នាំសកលថ្មី ក្រោយពីការប្រកាសដោយទីក្រុងប៉េកាំងនៃការបញ្ចប់ធ្វើសមយុទ្ធយោធា ប្រធានាធិបតីចិន លោកស៊ី ជីងពីន បានថ្លែងថា ការបង្រួបបង្រួមប្រទេសគឺមិនអាចបញ្ឈប់បានទេ។
អ្នកនាំពាក្យ និងជាមេបញ្ជាការនាវា លោកលី ស៊ី ក៏បានរៀបរាប់ថា ៖ ”បញ្ជាការភូមិភាគបូព៌ានៃ PLA កងទ័ពរំដោះប្រជាជនចិន បានបញ្ចប់ដោយជោគជ័យនៃលំហាត់យោធា ដែលហៅថា បេសកកម្មយុត្តិធម៌ឆ្នាំ២០២៥។” លោកបន្ថែមថា ទាហាននឹងបន្តការ ហ្វឹកហ្វឺនរបស់ពួកគេដើម្បីទប់ស្កាត់យ៉ាងដាច់ខាតនូវគំនិតប៉ុនប៉ងបំបែកខ្លួនដែលគាំទ្រឯករាជ្យភាពរបស់តៃវ៉ាន់ និងការជ្រៀតជ្រែកពីខាងក្រៅ។
ឆ្មាំឆ្នេររបស់កោះតៃវ៉ាន់ បានបញ្ជាក់ថា នាវាចិនដែលបានធ្វើការចល័តនៅសប្តាហ៍នេះ នៅ ជុំវិញកោះតៃវ៉ាន់ នៅអំឡុងលំហាត់យោធា ក្នុងទ្រង់ទ្រាយធំ បានដកថយពីតៃវ៉ាន់។
មានយន្តហោះចម្បាំងរាប់សិបគ្រឿង នាវាចម្បាំង និងកប៉ាលឆ្មាំឆ្នេរ ដែលត្រូវបានបញ្ជូនដោយទីក្រុងប៉េកាំង ដើម្បីឡោមព័ទ្ធកោះតៃវ៉ាន់ កាលពីថ្ងៃចន្ទ និងអង្គារ នៅក្នុងក្របខណ្ឌនៃការធ្វើសមយុទ្ធដែលក្លែងបិទកំពង់ផែយុទ្ធសាស្រ្តរបស់តៃវ៉ាន់ ព្រមទាំងការវាយប្រហារលើគោលដៅ តាមសមុទ្រផងដែរ។
ចំណែកទីក្រុងតៃប៉ិ បានថ្កោលទោសលំហាត់យោធាពីរថ្ងៃនេះ និងនិយាយថា វាជាការបង្កហេតុឲ្យឃើញច្បាស់ៗប្រឆាំងនឹងសន្តិសុខតំបន់ និងសណ្តាប់ធ្នាប់ពិភពលោក។ ប្រទេសចិនកុំមុយនីស្តមិនដែលគ្រប់គ្រងតៃវ៉ាន់ទេ ប៉ុន្តែចាត់ទុកកោះនេះជាផ្នែកនៃដែនដីរបស់ខ្លួន និង គំរាមប្រើប្រាស់កម្លាំងដើម្បីដណ្តើមយកការគ្រប់គ្រងលើកោះតៃវ៉ាន់។
លំហាត់សមយុទ្ធយោធាដែលកើតមានឡើងនៅជុំវិញកោះតៃវ៉ាន់ បានបង្កឲ្យមានរលកនៃការថ្កោលទោសដ៏សម្បើម។
កាលពីថ្ងៃពុធដែរ ប្រទេសជប៉ុនបានវាយតម្លៃថា ការធ្វើសមយុទ្ធរបស់ទីក្រុងប៉េកាំង ធ្វើឲ្យមានភាពតានតឹងរឹតតែធ្ងន់ធ្ងរ នៅក្នុងតំបន់ និងសម្តែងនូវការព្រួយបារម្ភ នៅពេលដែលអូស្រ្តាលី បានថ្កោលទោសលំហាត់សមយុទ្ធយោធាដែលធ្វើឲ្យអស្ថិរភាព។
ចំណែកសហភាពអឺរ៉ុប អាឡឺម៉ង់ និងបារាំង ក៏បានសម្តែងនូវក្តីព្រួយបារម្ភ និងថ្លែងការណ៍ដោយចងភ្ជាប់ខ្លួនជាមួយនឹងស្ថិរភាពអន្តរជាតិ។
រីឯហ្វីលីពីន បានចូលរួមចំណែកក្នុងក្តីព្រួយបារម្ភដ៏ជ្រាលជ្រៅ និងវាយតម្លៃថា លំហាត់យោធារបស់ចិន នៅជុំវិញកោះតៃវ៉ាន់ បានផ្តល់ហានិភ័យធ្វើឲ្យខ្សោយដល់សន្តិភាព និងស្ថិរភាពនៅក្នុងតំបន់។
ប៉ុន្តែទីក្រុងប៉េកាំងក៏បានស្តីបន្ទោសសម្រាប់ការរិះគន់ដែលគ្មានការទទួលខុសត្រូវរបស់ប្រទេសខ្លះ ចំពោះសកម្មភាពចាំបាច់ និងជាភាពត្រឹមត្រូវយុត្តិធម៌ដែលធ្វើឡើងដោយប្រទេសចិនដើម្បីការពារអធិបតេយ្យភាពជាតិរបស់ខ្លួន។ លោកលីន ជៀន អ្នកនាំពាក្យនៃក្រសួងការបរទេសចិន បានថ្លែងថា ៖ “ប្រទេសទាំងនេះ បិទភ្នែកចំពោះកងកម្លាំងបំបែកខ្លួននៅតៃវ៉ាន់ដែលព្យាយាមទទួលបានឯករាជ្យដោយមធ្យោបាយយោធា”។
Daily Program
