នាយករដ្ឋមន្ត្រីកម្ពុជា ជំរុញឱ្យភាគីថៃបន្តការងារខណ្ឌសីមាព្រំដែនឡើងវិញ តាមរយៈគណៈកម្មការចម្រុះខណ្ឌសីមាព្រំដែនគោក (JBC)
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវសាជាថ្មីម្តងទៀត ដល់ភាគីថៃ ឱ្យសហការជាមួយកម្ពុជា ក្នុងការពន្លឿនការបន្តការងារវាស់វែង និងខណ្ឌសីមាព្រំដែនឡើងវិញជាបន្ទាន់ តាមរយៈគណៈកម្មការចម្រុះខណ្ឌសីមាព្រំដែនគោក (JBC) ដើម្បីដោះស្រាយឫសគល់នៃជម្លោះ និងឈានទៅសម្រេចបាននូវសន្តិភាពយូរអង្វែង។
ការអំពាវនាវនេះត្រូវបានធ្វើឡើងក្នុងអំឡុងពេលចូលរួមកិច្ចប្រជុំកំពូលអាស៊ីបូព៌ា លើកទី២១ នៅទីក្រុងម៉ានីល ប្រទេសហ្វីលីពីន នេះបើយោងតាមការបញ្ជាក់របស់លោក ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ក្នុងសន្និសីទសារព័ត៌មាននៅអាកាសយានដ្ឋានអន្តរជាតិតេជោ នាល្ងាចថ្ងៃទី១៧ ខែវិច្ឆិកា បន្ទាប់ពីសម្តេចនាយករដ្ឋមន្ត្រីបានអញ្ជើញវិលត្រឡប់មកពីកិច្ចប្រជុំកំពូលវិញ។
ពាក់ព័ន្ធនឹងជម្លោះព្រំដែនកម្ពុជា-ថៃ សម្តេចធិបតីបានថ្លែងអំណរគុណចំពោះថ្នាក់ដឹកនាំក្នុងតំបន់ ដែលបានគាំទ្រដល់ដំណោះស្រាយដោយសន្តិវិធី ស្របតាមច្បាប់អន្តរជាតិ។
បើតាមលោក ហ្សង់ ហ្វ្រង់ស័រ តាន់ សម្តេចនាយករដ្ឋមន្ត្រីបានសង្កត់ធ្ងន់ថា ទោះបីជាការប្រយុទ្ធគ្នាបានបញ្ចប់ទៅជិតមួយឆ្នាំមកហើយក្តី ក៏ឫសគល់នៃជម្លោះនៅតែមិនទាន់ត្រូវបានដោះស្រាយនៅឡើយ ពោលគឺបញ្ហាខ្សែបន្ទាត់ព្រំដែនដែលមិនទាន់ច្បាស់លាស់។ ដោយហេតុផលនេះហើយ ទើបសម្តេចបានអំពាវនាវជាថ្មីឱ្យភាគីថៃធ្វើការជាមួយកម្ពុជា ដើម្បីបន្តការងារវាស់វែង និងខណ្ឌសីមាព្រំដែនឡើងវិញជាបន្ទាន់ តាមរយៈគណៈកម្មការ JBC។
មន្ត្រីជាន់ខ្ពស់រូបនេះបានបន្ថែមថា សំណើរបស់កម្ពុជាគឺស្របតាមខ្លឹមសារនៃកិច្ចព្រមព្រៀងនានា ដែលប្រទេសទាំងពីរបានចុះហត្ថលេខារួមគ្នា រួមមាន សេចក្តីថ្លែងការណ៍ទីក្រុងគូឡាឡាំពួ ចុះថ្ងៃទី២៦ ខែតុលា ឆ្នាំ២០២៥ និងជាពិសេស សេចក្តីថ្លែងការណ៍រួម ចុះថ្ងៃទី២៧ ខែធ្នូ ឆ្នាំ២០២៥។
ការអំពាវនាវរបស់សម្តេចនាយករដ្ឋមន្ត្រី បានគូសបញ្ជាក់ពីសារៈសំខាន់នៃការបន្តដំណើរការខណ្ឌសីមាព្រំដែនឡើងវិញ ដែលជាមធ្យោបាយដោះស្រាយភាពខ្វែងគំនិតគ្នាដោយសន្តិវិធី និងស្របតាមច្បាប់អន្តរជាតិ។ កិច្ចខិតខំប្រឹងប្រែងទាំងនេះ នឹងត្រួសត្រាយផ្លូវឆ្ពោះទៅរកដំណោះស្រាយរយៈពេលវែងចំពោះបញ្ហាព្រំដែនកម្ពុជា-ថៃ និងនាំមកនូវសន្តិភាពប្រកបដោយចីរភាពសម្រាប់ប្រជាជាតិទាំងពីរ។
