គ្រីស្តបរិស័ទ ៨០ នាក់ រួមគ្នាបង្កើតដំណោះស្រាយឌីជីថលសម្រាប់ព្រះសហគមន៍កាតូលិក

គ្រីស្តបរិស័ទដែលជាសមាជិកព្រះសហគមន៍កាតូលិកប្រហែល ៨០ នាក់ ដែលមានអាយុចន្លោះពី ១៧ ទៅ ៦១ ឆ្នាំ បានចូលរួមក្នុងព្រឹត្តិការណ៍មួយនៅក្នុងព្រះសហគមន៍កាតូលិកលើកដំបូងនៅសិង្ហបុរី ចាប់ពីថ្ងៃទី ៩ ដល់ថ្ងៃទី ១១ ខែតុលា ដើម្បីបង្កើតដំណោះស្រាយឌីជីថលឆ្លើយតបទៅនឹងតម្រូវការប្រកាសដំណឹងល្អ។

ព្រឹត្តិការណ៍រយៈពេលបីថ្ងៃនេះត្រូវបានរៀបចំឡើងដោយការិយាល័យព្រះសហគមន៍ឌីជីថល (DCO) នៃអគ្គភូមិភាគសិង្ហបុរី ដើម្បីដោះស្រាយបញ្ហាប្រឈមនានាដែលលើកឡើងដោយគណៈកម្មការអគ្គភូមិភាគសម្រាប់សាលារៀនកាតូលិក មូលនិធិកាតូលិក ការិយាល័យអប់រំជំនឿ និងការិយាល័យសម្រាប់ការប្រកាសដំណឹងល្អ លើការកែលម្អបញ្ហាឌីជីថលនៅក្នុងព្រះសហគមន៍។​

លោកបូជាចារ្យ តេរ៉េន កេសាវាន (Terence Kesavan) នាយកខាងវិញ្ញាណនៃការិយាល័យបច្ចេកវិទ្យាព័ត៌មានរបស់អគ្គភូមិភាគនេះ បានជំរុញឱ្យអ្នកចូលរួមបន្តប្រើប្រាស់ជំនាញរបស់ពួកគេដើម្បីបម្រើព្រះសហគមន៍កាតូលិក។ លោកបូជាចារ្យបានប្រៀបធៀបឌីជីថលទៅនឹងការឆ្លើយតបរបស់ព្រះសហគមន៍ចំពោះបច្ចេកវិទ្យាថ្មីៗដែលកំពុងលេចឡើង។

លោកបូជាចារ្យបានកត់សម្គាល់ថា ជំងឺរាតត្បាតកូវីដ-១៩ បានជំរុញឱ្យមានការប្រើប្រាស់ឧបករណ៍ឌីជីថលកាន់តែឆាប់រហ័ស រួមទាំងពិធីអភិបូជាតាមអ៊ីនធឺណិត និងការបង្រៀនជំនឿតាមប្រព័ន្ធអនឡាញ ទោះបីជាមានការប្រឆាំងពីមុនមកក៏ដោយ។

ដោយយោងទៅលើលិខិតរបស់សម្ដេចប៉ាប ឡេអូទី១៤ ដែលនិយាយអំពីបញ្ញាសិប្បនិម្មិត និងផលប៉ះពាល់ផ្នែកសីលធម៌របស់វា លោកបូជាចារ្យបានលើកទឹកចិត្តឱ្យគ្រីស្តបរិស័ទកាតូលិកប្រើប្រាស់បច្ចេកវិទ្យាប្រកបដោយការទទួលខុសត្រូវ ព្រមទាំងការពារសេចក្ដីថ្លៃថ្នូររបស់មនុស្សជាតិ។ លោកបានមានប្រសាសន៍ថា បច្ចេកវិទ្យាមិនមែនត្រឹមតែជាមធ្យោបាយ ឬឧបករណ៍នោះទេ តែវាក៏ជាបញ្ហានៃដំណើរការប្រកាសដំណឹងល្អដែរ ប្រសិនបើខ្វះការកំណត់គោលដៅច្បាស់លាស់។