ព្រះសហគមន៍មួយនៅហ្វីលីពីន ប្រកាសបើកដំណើរការការរិយាល័យជំនួយផ្លូវច្បាប់សម្រាប់ជនក្រីក្រ

ព្រះសហគមន៍កាតូលិកមួយនៅក្នុងប្រទេសហ្វីលីពីន គឺព្រះសហគមន៍ Kalookan បានចាប់ផ្តើមបើកដំណើរការកម្មវិធីជំនួយផ្នែកច្បាប់ថ្មីមួយ ដើម្បីជួយសហគមន៍ក្រីក្រ ឲ្យទទួលបានសិទ្ធិនិងភាពយុត្តិធម៌។

ការប្រកាសបើកកម្មវិធី និងការិយាល័យជំនួយផ្នែកច្បាប់នេះ គឺធ្វើឡើងតាមការផ្តល់អនុសាសន៍ដោយលោកកាឌីណាល់ ប៉ាប្លូ វ័ជីលីអូ ដេវីដ (Pablo Virgilio David) អគ្គអភិបាលនៃព្រះសហគមន៍កាតូលិកភូមិភាគនេះ និង ជាប្រធានក្រុមអន្តរសភាលោកអភិបាលព្រះសហគមន៍កាតូលិកនៃប្រទេសហ្វីលីពីន។ លោកកាឌីណាល់​បាន​សម្តែង​ការ​ព្រួយ​បារម្ភ​ថា ពលរដ្ឋ​ហ្វីលីពីន​ក្រីក្រ​ជា​ច្រើន​នៅ​តែ​ងាយ​រង​គ្រោះ​ក្នុង​ប្រព័ន្ធ​យុត្តិធម៌ ដោយសារ​តែ​ខ្វះ​តំណាង​ផ្លូវ​ច្បាប់​ត្រឹមត្រូវ។

លោកកាឌីណាល់បាននិយាយថា លោកបានកំពុងតែអំពាវនាវឲ្យមេធាវីចូលរួមជាមួយនឹងការិយាល័យនេះ ដើម្បីរួមគ្នាជួយអ្នកក្រីក្រដែលត្រូវការជំនួយផ្នែកច្បាប់។​

កម្មវិធីនេះត្រូវបានបង្កើតឡើងដើម្បីឆ្លើយតបទៅនឹងការកើនឡើងនៃចំនួនបុគ្គលក្រីក្រដែលកំពុងប្រឈមមុខនឹងការចោទប្រកាន់ព្រហ្មទណ្ឌដោយគ្មានការណែនាំផ្លូវច្បាប់។ ពួកគេជាច្រើនបានកត់សម្គាល់ថា មិនដឹងអំពីសិទ្ធិរបស់ពួកគេ មិនអាចមានលទ្ធភាពធានាបាននៅក្រៅឃុំ និងខ្វះលទ្ធភាពទទួលបានជំនួយផ្នែកច្បាប់ទាន់ពេលវេលា៕