កម្លាំងពហុជាតិសាសន៍ ត្រៀមបើកសមយុទ្ធ «កូអាលីកចា» នៅប្រទេសប៉ូឡូញដើម្បីជាខែលការពារសន្តិភាពអ៊ុយក្រែនក្រោយបញ្ចប់សង្គ្រាម
កងកម្លាំងពហុជាតិសាសន៍សម្រាប់អ៊ុយក្រែន (MNF-U) ដែលដឹកនាំដោយប្រទេសបារាំង និង ចក្រភពអង់គ្លេស គ្រោងនឹងរៀបចំលំហាត់សមយុទ្ធយោធាយ៉ាងធំសម្បើមដំបូងបង្អស់ ដែល មានឈ្មោះថា «កូអាលីកចា» (Coalitcha) នៅលើទឹកដីនៃប្រទេសប៉ូឡូញ ចាប់ពីថ្ងៃទី៩-២២ ខែវិច្ឆិកា ខាងមុខនេះ។ ការធ្វើសមយុទ្ធដែលមានទាហានប្រមាណ ២៨០០នាក់មកពី ១០ ប្រទេសចូលរួមនេះ មានគោលដៅសាកល្បងសមត្ថភាព និងភាពទាក់ទិននៃប្រតិបត្តិការ រួមគ្នា ដើម្បីត្រៀមខ្លួនដាក់ពង្រាយកម្លាំងជាបន្ទាន់ក្នុងការរក្សាសន្តិសុខ និងសន្តិភាពឡើងវិញ នៅពេលដែលសង្គ្រាមរវាងរុស្ស៊ី និងអ៊ុយក្រែនត្រូវបញ្ចប់ជាផ្លូវការ។
ការប្រមូលផ្តុំកម្លាំងយោធាយ៉ាងសន្ធឹកសន្ធាប់នៅក្បែរព្រំដែន
យោងតាមការប្រកាសរួមគ្នាកាលពីថ្ងៃទី៣ ខែវិច្ឆិកា ពីសំណាក់អាជ្ញាធរក្រុងឡុងដ្រ៍ និងក្រុង ប៉ារីស លំហាត់សមយុទ្ធ «កូអាលីកចា» នឹងប្រព្រឹត្តទៅនៅក្នុងទីក្រុងណូវ៉ា ដឺបា ដែលជា តំបន់ហ្វឹកហ្វឺនយោធាដ៏សំខាន់មួយស្ថិតនៅភាគអាគ្នេយ៍នៃប្រទេសប៉ូឡូញ មានចម្ងាយត្រឹម តែប្រមាណ ១០០ គីឡូម៉ែត្រប៉ុណ្ណោះពីព្រំដែនអ៊ុយក្រែន។
ព្រឹត្តិការណ៍នេះនឹងប្រមូលផ្តុំយោធិនមកពី ១០ប្រទេសជាសម្ព័ន្ធមិត្ត រួមមាន អាឡឺម៉ង់ ប៊ែលហ្ស៊ិក អេស្ប៉ាញ អេស្តូនី បារាំង លីទុយអានី ហូឡង់ ប៉ូឡូញ ចក្រភពអង់គ្លេស និង ស៊ុយអែត។ ក្នុងនោះ ប្រទេសបារាំងនឹងបញ្ជូនទាហានចំនួន ១១០០នាក់ ខណៈចក្រភព អង់គ្លេសរួមចំណែកចំនួន ៣០០នាក់។ បន្ថែមពីនេះ ក្រសួងការពារជាតិបារាំងបាន គូស បញ្ជាក់ថា ប្រទេសទួរគី ក្នុងនាមជាអ្នកដឹកនាំផ្នែកកងកម្លាំងជើងទឹកនៃសម្ព័ន្ធមិត្តចម្រុះ ក៏មាន ផែនការដាក់ពង្រាយកម្លាំង និងដឹកនាំការធ្វើសមយុទ្ធក្លែងធ្វើប្រតិបត្តិការធានាសន្តិសុខនៅ ដែនសមុទ្រខ្មៅនាពេលអនាគតផងដែរ។
បេសកកម្មគន្លឹះ និងការស្តារឡើងវិញក្រោយសង្គ្រាម
កងកម្លាំងពហុសាសន៍ (MNF-U) ត្រូវបានបង្កើតឡើង កាលពីខែមីនា ឆ្នាំ២០២៥ ដោយមានបេសកកម្មស្នូល ក្នុងការដាក់ពង្រាយកម្លាំងយ៉ាងឆាប់រហ័សភ្លាមៗ បន្ទាប់ពីមានការចុះហត្ថលេខាលើកិច្ចព្រមព្រៀងបទឈប់បាញ់រវាងភាគីជម្លោះ។ គោលដៅធំបំផុត គឺដើម្បីជួយអ៊ុយក្រែនក្នុងការទប់ស្កាត់ការឈ្លានពានជាថ្មីណាមួយពីសំណាក់ប្រទេសរុស្ស៊ីនាពេលអនាគត។
ក្រៅពីភារកិច្ចការពារព្រំដែន កងកម្លាំងនេះនឹងដើរតួនាទីយ៉ាងសំខាន់ក្នុងការជួយចាប់ផ្តើមដំណើរការសេដ្ឋកិច្ចរបស់អ៊ុយក្រែនឡើងវិញ តាមរយៈការធានាសន្តិសុខលើផ្លូវទឹកនៅសមុទ្រខ្មៅដើម្បីសម្រួលដល់ការនាំចេញផលិតផលកសិកម្ម និងការបើកដំណើរការដែនអាកាសឡើងវិញដោយសុវត្ថិភាព។ ថ្វីបើកិច្ចពិភាក្សាសន្តិភាពដើមឡើយត្រូវបានកកស្ទះចាប់តាំងពីខែកុម្ភៈមកក្តី ប៉ុន្តែកងកម្លាំងសម្ព័ន្ធមិត្តនៅតែប្រកាន់ជំហររៀបចំខ្លួនជាស្រេច។
យុទ្ធសាស្ត្រត្រៀមលក្ខណៈ និងការឆ្លើយតបចំពោះហានិភ័យ
លោកឧត្តមសេនីយ៍អង់គ្លេស ថម បាតឺម៉ាន មេបញ្ជាការកងកម្លាំងពហុជាតិសាសន៍ បានបញ្ជាក់ថា សន្តិភាពប្រកបដោយយុត្តិធម៌ និងចីរភាព គឺទាមទារឱ្យអ៊ុយក្រែនមានសមត្ថភាពការពារអធិបតេយ្យភាពរបស់ខ្លួន បូករួមនឹងការធានាសន្តិសុខដែលអាចជឿទុកចិត្តបាន។ លោកបានបន្ថែមថា ការត្រៀមលក្ខណៈ ការសម្របសម្រួល និងការរៀបចំផែនការដឹកជញ្ជូន ដោយមិនអាចរង់ចាំរហូតដល់សង្គ្រាមបញ្ចប់ ទើបចាប់ផ្តើមនោះឡើយ។
ជាមួយគ្នានេះ ឧត្តមសេនីយ៍បារាំងអាម៉េល ឌីរូ បានចាត់ទុកសមយុទ្ធនេះថា គឺជា «ដំណាក់កាលគន្លឹះ» ក្នុងការបង្ហាញពីសមត្ថភាពពិតប្រាកដរបស់កម្លាំងនេះ។ ទន្ទឹមនឹងនេះ ទីក្រុងប៉ារីស និងទីក្រុងឡុងដ្រ៍ បានបញ្ជាក់យ៉ាងច្បាស់ថា កងកម្លាំងពហុជាតិសាសន៍ មិនមែនជាកងកម្លាំងរបស់អង្គការណាតូ (NATO) ឡើយ ហើយសមយុទ្ធនេះក៏មិនមែនជាបេសកកម្មប្រយុទ្ធ ឬការបង្អួតឥទ្ធិពលនោះដែរ។
ទន្ទឹមគ្នានេះដែរ កងកម្លាំងពហុជាតិសាសន៍ ក៏បានត្រៀមខ្លួនរួចជាស្រេចក្នុងការទប់ទល់នឹងការវាយប្រហារផ្នែកព័ត៌មាន ឬការវាយប្រហារបែបកូនកាត់ (Hybrid threat) ពីសំណាក់រុស្ស៊ីផងដែរ។
Daily Program
