វូងដំរីព្រៃមួយវូងដែលមានចំនួនសរុប៦ក្បាល ក្នុងនោះមានកូនតូចមួយក្បាល ត្រូវបានកត់ត្រាទុកនៅជិតតំបន់ព្រៃកែងស្រឡៅ ក្នុងដែនជម្រកសត្វព្រៃឆែប-ព្រះរការ ដែលស្ថិតនៅក្នុងស្រុកត្បែងមានជ័យ ខេត្តព្រះវិហារ។
ក្រសួងបរិស្ថានបានឱ្យដឹងនៅក្នុងសេចក្តីប្រកាសព័ត៌មាននាថ្ងៃទី២៤ ខែសីហា ថា ក្រុមការងារបានចុះស្រាវជ្រាវដល់ទីតាំងផ្ទាល់ និងបានប្រើប្រាស់បច្ចេកវិទ្យាដ្រូន (Drone) ដើម្បីតាមដានតំបន់នោះ ដោយបានរកឃើញវូងដំរីស្ថិតនៅប្រហែល ៣គីឡូម៉ែត្រពីភូមិនៃប្រជាពលរដ្ឋក្នុងមូលដ្ឋាន។ វូងដំរីនេះបានផ្លាស់ទី និងសម្រាកនៅទីតាំងអូរស្រឡៅ ដែលហាក់ដូចជាជម្រកធម្មតារបស់ពួកវា ដោយមិនបានបង្កបញ្ហាណាមួយដល់មនុស្សឡើយ។
មានរបាយការណ៍ពីប្រជាពលរដ្ឋក្នុងមូលដ្ឋានបានសម្តែងការព្រួយបារម្ភអំពីការខូចខាតដំណាំបន្តិចបន្តួចនៅក្នុងតំបន់នោះ។ ទោះជាយ៉ាងណាក៏ដោយ ក្រុមការងារបាននិងកំពុងតាមដានស្ថានការណ៍យ៉ាងយកចិត្តទុកដាក់ និងបានចុះអប់រំផ្សព្វផ្សាយដល់ប្រជាពលរដ្ឋដែលរស់នៅក្បែរនោះ។
ក្រសួងបានបន្តថា ការចុះអប់រំផ្សព្វផ្សាយនេះមានគោលបំណងលើកកម្ពស់ការយល់ដឹង បំផុសការចូលរួមក្នុងការការពារ និងអភិរក្ស ប្រឆាំងការបរបាញ់ និងបង្ការជម្លោះរវាងមនុស្ស និងដំរីអាស៊ី ដែលជាប្រភេទសត្វកម្រ និងកំពុងរងគ្រោះថ្នាក់ជិតផុតពូជ ខណៈពេលដែលធានាថាវូងដំរីអាចត្រឡប់ចូលទៅក្នុងព្រៃជ្រៅវិញដោយសុវត្ថិភាព។
ការស្រាវជ្រាវបានបង្ហាញថា ចំនួនប្រជាសាស្ត្រដំរីព្រៃនៅក្នុងដែនជម្រកសត្វព្រៃឆែប-ព្រះរការ មានចន្លោះពី ១៥ ទៅ ២០ក្បាល ដោយទទួលបានការយកចិត្តទុកដាក់កម្រិតអទិភាពខ្ពស់ និងការការពារអភិរក្សយ៉ាងម៉ឺងម៉ាត់។ ដំរីអាស៊ីជាប្រភេទសត្វរងគ្រោះថ្នាក់ជិតផុតពូជនៅលើពិភពលោក ប៉ុន្តែពួកវានៅតែបន្តមានវត្តមាននៅក្នុងប្រទេសកម្ពុជា។
យោងតាមទិន្នន័យស្រាវជ្រាវពីមន្ត្រីជំនាញនៃក្រសួងបរិស្ថាន និងដៃគូរស្ទើរគ្រប់តំបន់ការពារធម្មជាតិ បានឱ្យដឹងថា ដំរីព្រៃអាស៊ីរស់នៅជាវូង ដោយបានសង្កេតឃើញមានកូនតូចៗជាច្រើន។ ប្រជាសាស្ត្រដំរីសរុបនៅទូទាំងប្រទេស ត្រូវបានប៉ាន់ប្រមាណថានៅសល់ចន្លោះពី ៤០០ ទៅ ៦០០ក្បាល។
ការបន្តប្រទះឃើញវូងដំរីបាននាំមកនូវក្តីសង្ឃឹមដល់អ្នកអភិរក្ស ដែលបង្ហាញពីប្រសិទ្ធភាពនៃការការពារព្រៃឈើ ការថែរក្សាជម្រកដំរី និងការរស់រានមានជីវិតនៃប្រភេទសត្វរងគ្រោះថ្នាក់ជិតផុតពូជនៅលើពិភពលោក ព្រមទាំងជួយរក្សាសមតុល្យបរិស្ថានវិទ្យា និងបេតិកភណ្ឌធម្មជាតិផងដែរ។
Daily Program
