អត្ថាធិប្បាយគម្ពីរដំណឹងល្អថ្ងៃទី១៦ ខែមករាឆ្នាំ២០២៤ តាមម៉ាកុស ២,២៣-២៨អត្ថាធិប្បាយដោយលោកបូជាចារ្យ រឿង ឆ័ត្រសិរី
បងប្អូនជាទីស្រឡាញ់!
នៅថ្ងៃនេះ យើងស្តាប់ព្រះបន្ទូលដំណើរជីវិតរបស់យើងទៅជាមួយព្រះយេស៊ូ ដែលព្រះអង្គចាប់ ផ្តើមបេសកកម្មរបស់ព្រះអង្គនៃការទេសនា គឺការធ្វើដំណើរប្រកាសដំណឹងល្អ។ ព្រះយេស៊ូបានធ្វើដំណើរជាមួយក្រុមសាវ័កឆ្លងកាត់ស្រែស្រូវសាលី ជាស្រូវសម្រាប់យកទៅធើ្វជានំប៉័ង ប៉ុន្តែដោយសារតែពួកសាវ័កអស់កម្លាំងនិងឃ្លានបាយផង ដោយពុំមានមានកន្លែងលក់ចំណី ឬម្ហូបអាហារដូចសម័យនេះ ហេតុដូច្នេះពេលដែលគាត់ដើរកាត់ស្រែក៏បានបូតគួស្រូវបន្តិចមកកិន ហើយពិសារដើម្បីបន្ធូរភាពអត់ឃ្លាននៅពេលនោះ ។
បាទ! បងប្អូនសម្រាប់ច្បាប់របស់ជនជាតិយូដា ជាពិសេសថ្ងៃសប្ប័ទទីមួយគឺ ហាមធ្វើដំណើរ ទីពីរ ហាមធ្វើការ ហើយការកិនស្រូវនេះចាត់ទុកថា ស្មើហ្នឹងការធ្វើការ។ ដូច្នេះពេលដែលពួកផារ៉ាស៊ីបានឃើញពួកសាវ័កធ្វើរបៀបនោះ ហាក់ដូចជាមិនសប្បាយចិត្ត ដោយសារពួកគាត់ធ្វើខុសវិន័យ។
បាទ! បងប្អូន ប៉ុន្តែព្រះយេស៊ូបានបង្រៀនពួកគាត់វិញថា អ្វីដែលមានអត្ថន័យនៃថ្ងៃបុណ្យសម្ប័ទគឺជាថ្ងៃដែលយើងត្រូវការសម្រាក ដើម្បីលើកស្ទួយតម្លៃនៃជីវិតមនុស្ស មិនមែនធ្វើការក្លាយជាទាសករការងារ តែត្រូវមានពេលវេលាមួយសម្រាក មិនគ្រាន់តែជួយសុខភាពជីវិតខាងផ្លូវកាយឱ្យល្អប៉ុណ្ណោះទេ។ មិនតែប៉ុណ្ណោះវាក៏បានជំរុញឲ្យយើងមានពេលវេលាស្មឹងស្មាធិ៍រិះគិតទៅព្រះជាម្ចាស់ ហេតុនេះ ថ្ងៃសប្ប័ទគឺជាថ្ងៃដែលគេតែងតែទៅធម្មសាលា ដើម្បីទៅអធិដ្ឋាន ទៅស្តាប់ព្រះបន្ទូលព្រះជាម្ចាស់ដោយសារការប្រកាន់ទំលាប់ និងគំនិតដូចនេះហើយ ទើបការអនុវត្តនេះបានចូលមកព្រះសហគមន៍បច្ចុប្បន្នរបស់យើង គ្រាន់តែថាគ្រីស្តបរិស័ទកាលពីដើមបានយកថ្ងៃសប្ប័ទ ជាថ្ងៃដែលត្រូវទៅធម្មសាលា តែយើងយកថ្ងៃអាទិត្យដោយសារជាថ្ងៃរបស់ព្រះអម្ចាស់យេស៊ូគ្រីស្តបានរស់ឡើងវិញ។
ទោះបីនេះជាវិន័យបុរាណមួយ ក្នុងចំណោមវិន័យទាំង១០ប្រការក៏ដោយ តែយើងយកមកអនុវត្តបាន ត្បិតវាគឺជាថ្ងៃរបស់ព្រះជាម្ចាស់ ជាវេលាដែលត្រូវឈប់ធ្វើការដើម្បីថ្វាយបង្គំព្រះអង្គ។
ដូច្នេះថ្ងៃរបស់ព្រះជាម្ចាស់សម្រាប់យើងគឺថ្ងៃអាទិត្យ! តែសព្វថ្ងៃនេះបងប្អូនដឹងហើយថា យើងមានរបៀបច្រើនដែលយើងអាចខកខានទៅថ្វាយអភិបូជា ដោយសារតែយើងមានធុរៈនៅស្រុក មានសម្ពាធការងារត្រូវតែធើ្វ ទោះនោះជាថ្ងៃអាទិត្យក៏ដោយ។ ខ្ញុំសុំឲ្យបងប្អូនខកខានមិនបានមកវិហារ ព្រោះតែការងារដើម្បីចិញ្ចឹមជីវិត ប៉ុន្តែផ្ទុយទៅវិញមិនមកព្រោះតែភាពខ្ជិលរបស់យើង មិនទៅថ្វាយបង្គំ ឬក៏សំអាងនេះសំអាងនោះហើយមិនទៅ ជាកត្តាមួយនាំឲ្យជំនឿបាត់បង់បន្តិចម្តងៗ និងយូរៗទៅក្លាយជាអំពើបាប។
ដូច្នេះអ្វីដែលយើងអាចធ្វើបានពេលដែលយើងមិនបានមកព្រះវិហារ យើងអាចអានព្រះបន្ទូលថ្ងៃអាទិត្យ ត្បិតសព្វថ្ងៃនេះយើងមានមធ្យោបាយលើបណ្តាញសង្គម social Media ច្រើនដែលយើងអាចទាញយកអត្ថបទព្រះគម្ពីរមកអាន និងអធិដ្ឋានចូលនៅក្នុងថ្ងៃអាទិត្យហ្នឹងបានក៏ល្អដែរ តែត្រូវរកពេលវេលាដើម្បីទៅវិហារឲ្យបានច្រើនបំផុតតាមដែលអាចធ្វើទៅបាន។
បាទ! ដូច្នេះលោកពុកជឿថាថ្ងៃសប្ប័ទរបស់យើង ទោះបីយើងធ្វើការតែសុំឱ្យទឹកចិត្តរបស់យើងផ្តោតលើព្រះជាម្ចាស់តាមកន្លែងធ្វើការងារ តាមស្ថានភាពដែលយើងមិនអាចទៅព្រះវិហារបាន តែប្រសិនបើពេលណាមួយយើងមានពេលសម្រាក សូមបងប្អូនយកពេលនោះទៅថ្វាយអភិបូជាដោយតាំងចិត្តថា ទោះបីខ្ញុំមិនមកថ្ងៃអាទិត្យក៏ខ្ញុំសុំថ្វាយអភិបូជានេះជំនួសថ្ងៃរបស់ព្រះជាម្ចាស់ ដោយសារទឹកចិត្តរបស់យើងស្រឡាញ់ព្រះជាម្ចាស់ ពិតណាស់ព្រះជាម្ចាស់យោគយល់យើងដែរ។
បាទ! ដូច្នេះសុំឱ្យជីវិតរបស់យើងជាគ្រីស្តបរិស័ទយោងទៅគោលដៅនៃថ្ងៃរបស់ព្រះជាម្ចាស់យ៉ាងពិតប្រាកដ។
សូមព្រះជាម្ចាស់ប្រទានពរឱ្យបងប្អូន ហើយសុំឱ្យរាល់ថ្ងៃជាថ្ងៃដែលយើងអាចលើកចិត្តរបស់យើងទៅព្រះជាម្ចាស់គ្រប់ពេលវេលា។ អាម៉ែន៕
Daily Program
