ថ្ងៃទី២៩ ខែឧសភា ឆ្នាំ២០២៥ អត្ថបទគម្ពីរ (យ៉ូហាន១៦,១៦-២០)អត្ថាធិប្បាយគម្ពីរ លោកបូជាចារ្យ ហ្វ្រង់ស័រ អេមេល្សដាល
៤០ថ្ងៃក្រោយពេលព្រះយេស៊ូបានរស់ឡើងវិញ ឬ៤០ថ្ងៃក្រោយបុណ្យចម្លង និង១០ថ្ងៃមុនបុណ្យព្រះវិញ្ញាណយាងមក គឺថ្ងៃដែលព្រះអម្ចាស់យេស៊ូយាងឡើងស្ថានបរមសុខ! ព្រះយេស៊ូនៅលើផែនដីនេះអស់រយៈពេលប្រហែល៣៣ឆ្នាំ ហើយព្រះអង្គបានបង្រៀនអស់រយៈពេល៣ឆ្នាំពេលអាយុ៣០ដល់៣៣។ ឥឡូវនេះក្រោយពេលព្រះអង្គបានបំពេញបេសកកម្មរបស់ព្រះអង្គ និងបានធ្វើតាមព្រះហឫទ័យគ្រប់ប្រការរបស់ព្រះជាម្ចាស់ ព្រះអង្គឡើងទៅស្ថានបរមសុខរួមរស់ជាមួយព្រះជាម្ចាស់។
ហេតុអ្វីព្រះយេស៊ូធ្វើដូច្នេះ? ពីព្រោះព្រះយេស៊ូជឿទុកចិត្តលើយើងម្នាក់ៗឱ្យយើងបន្តកិច្ចការ និងការប្រៀនប្រដៅរបស់ព្រះអង្គចំពោះអ្នកដទៃ។ យើងដូចជាវត្តមានរបស់ព្រះយេស៊ូនៅក្នុងលោកនេះ ព្រះសហគមន៍ក៏ជាព្រះកាយរបស់ព្រះយេស៊ូ! ជាដៃ ជាជើងនិងជាមាត់របស់ព្រះអង្គចំពោះអ្នកដទៃ។ ព្រះយេស៊ូមានព្រះបន្ទូលនៅថ្ងៃនេះឱ្យយើងទៅប្រកាសដំណឹងល្អ និងធ្វើពិធីជ្រមុជទឹកឱ្យអស់អ្នកជឿ។
ដូច្នេះពិតជាអស្ចារ្យមែនព្រះយេស៊ូជឿទុកចិត្តលើក្រុមគ្រីស្តទូត ទោះបីក្រុមគ្រីស្តទូតលះបង់ចោលព្រះយេស៊ូនៅពេលដែលព្រះអង្គត្រូវគេឆ្កាង ប៉ុន្តែព្រះយេស៊ូបានលើកលែងទោសឱ្យគេ និងបានប្រោសប្រទានសេចក្តីសុខសាន្ត ហើយជឿទុកចិត្តលើគេ។ ព្រះអង្គមិនបោះបង់យើងចោលទេ! តាមពិតព្រះយេស៊ូមានព្រះបន្ទូលសន្យាថានឹងប្រោសប្រទានកម្លាំងដែលចុះពីស្ថានបរមសុខគឺព្រះវិញ្ញាណដ៏វិសុទ្ធ។ ព្រះវិញ្ញាណដ៏វិសុទ្ធដែលជាព្រះអង្គទីបីម្យ៉ាងនៃព្រះត្រៃឯកព្រះអង្គដែលជួយការពារ ជួយប្រៀនប្រដៅឱ្យយើងស្គាល់ព្រះជាម្ចាស់កាន់តែច្បាស់ និងប្រោសឱ្យយើងជាជនដ៏វិសុទ្ធ បង្រៀនយើងពីខាងក្នុងឱ្យយើងស្គាល់ព្រះជាម្ចាស់ ផ្តល់កម្លាំងឱ្យយើងស្រឡាញ់ដូចព្រះជាម្ចាស់ និងប្រោសឱ្យយើងក្លាយជាជនដ៏វិសុទ្ធ។
ម្យ៉ាងទៀតព្រះយេស៊ូជឿទុកចិត្តយើង ព្រោះព្រះជាម្ចាស់នឹងធ្វើអ្វីៗទាំងអស់សម្រាប់យើង ព្រះជាម្ចាស់បានចាប់ផ្តើមអ្វីៗទាំងអស់ឱ្យយើងទទួលការសង្គ្រោះ ប៉ុន្តែយើងត្រូវតែជួយខ្លួនឯងដែរគឺយើងត្រូវតែចូលរួមនៅក្នុងការសង្គ្រោះរបស់ខ្លួនឯងដូចសន្តអូគូស្ទីនធ្លាប់និយាយថា ព្រះជាម្ចាស់បានបង្កើតយើង ប៉ុន្តែអត់បានសុំយោបល់ពីយើង ហើយព្រះជាម្ចាស់មិនសង្គ្រោះអ្នកប្រសិនបើអ្នកមិនចង់ទទួលការសង្គ្រោះ។
ដូច្នេះជីវិតរបស់យើងមានអត្ថន័យមានគោលដៅច្បាស់លាស់ ពីព្រោះយើងជាបុត្រធីតារបស់ព្រះជាម្ចាស់ និងមានតួនាទីជួយរៀបចំព្រះរាជ្យរបស់ព្រះជាម្ចាស់ដែលមានព្រះវិញ្ញាណដ៏វិសុទ្ធជួយគាំទ្រ៕
Daily Program
