ថ្ងៃទី២៨ ខែមីនា ឆ្នាំ២០២៥ អត្ថបទគម្ពីរ (ម៉ាថាយ៥,១៧-១៩)អត្ថាធិប្បាយគម្ពីរដោយ៖ លោកបូជាចារ្យ ផាន បូរី

នៅក្នុងអត្ថបទដំណឹងល្អនៅក្នុងថ្ងៃនេះគេបានសួរល្បងព្រះយេស៊ូគឺគេសួរព្រះយេស៊ូថា តើវិន័យណាសំ​ខាន់​ជាគេ? សំណួររបស់គេតាមពិតគេដឹងហើយ ប៉ុន្តែគេចង់រកមធ្យោបាយចាប់​កំហុស​ព្រះ​យេស៊ូ។ ព្រះយេ​ស៊ូ​ព្យាយាមឆ្លើយនឹងសំណួររបស់គេ ព្រះអង្គបានឆ្លើយថា៖ ជនជាតិអ៊ី​ស្រា​អែល​អើយ! ​ចូរ​ស្តាប់! ត្រូវគោរពព្រះជាម្ចាស់ជាព្រះរបស់អ្នកឱ្យអស់ពីកម្លាំងកាយ អស់ពីកម្លាំងចិត្ត អស់​ពី​ស្មារ​តី និង​វិន័យ​ទីពី​រ​ត្រូវ​ស្រឡាញ់បងប្អូនឯៗទៀតឱ្យដូចស្រឡាញ់ខ្លួនឯង។

នៅក្នុងវិន័យទីមួយ​ព្រះយេស៊ូ​បា​នរំលឹកអស់អ្នកជឿទាំងឡាយឱ្យជឿថា ព្រះជាម្ចាស់ជាព្រះដែល​បង្កើត​អ្វីៗ​ទាំងអស់​នៅក្នុងពិភ​ព​​លោកនេះ សូម្បីតែជីវិតរបស់យើងក៏ជាស្មាមព្រះហស្តដ៏អស្ចារ្យរបស់​ព្រះជា​ម្ចាស់​ដែល​ ​ព្រះអង្គបាន​បង្កើត​យើងឱ្យមានរូបមានរាង ហេតុនេះពេលព្រះជាម្ចាស់បានបង្កើតអ្វីៗទាំង​អស់​ឱ្យ​យើង​មាន​រូបមាន​រាងត្រូវតែអរព្រះគុណព្រះជាម្ចាស់ និងត្រូវតែស្រឡាញ់ព្រះជាម្ចាស់ដូចបងប្អូន​គ្រីស្តបរិស័ទបងប្អូន​តែង​តែទៅព្រះវិហារ។  

បងប្អូនតែងតែអធិដ្ឋាន និង​យកពេលអានព្រះបន្ទូលគឺដោយសារបង​ប្អូនជឿ​លើ​ព្រះជាម្ចាស់!  ហេតុនេះ​វិន័យ​ទីមួយគឺស្រឡាញ់ព្រះជាម្ចាស់!  ព្រះអង្គគឺជាស្នូលនៃជំនឿរបស់យើង។ បង​​ប្អូនគ្រីស្តបរិស័ទ ​បង​ប្អូន​ត្រូវ​ដឹងថា ប្រសិនបើបងប្អូនជឿលើព្រះជាម្ចាស់! បងប្អូនត្រូវតែ​ខិតខំចូល​រួមថ្វាយ​អភិបូជា ​​ចូលរួមអធិដ្ឋាន បង្ហាញធម៌មេត្តាករុណា និងរស់នៅឱ្យបានល្អ​ក្នុងឋានៈអ្ន​កជឿ​លើព្រះជាម្ចាស់។ ប្រសិនបើបងប្អូន​ទៅ​ព្រះវិហារ ដោយពឹងលើអ្វីមួយផ្សេងក្រៅពី​ព្រះ​​ជាម្ចាស់​ជំនឿរបស់បងប្អូនមិនមាំមួនទេ។ ប៉ុន្តែប្រសិន​បើយើង​ស្រឡាញ់ព្រះជាម្ចាស់ និងជាប់ជាមួយ​ព្រះអង្គទោះ​បីមានឧបសគ្គ​យ៉ាងណា​ក៏ដោយ​យើង​នៅ​តែ​ស្រឡាញ់ព្រះជាម្ចាស់ យើងនៅតែថ្វាយ​បង្គំ​ព្រះ​ជាម្ចាស់ និងនៅតែស្វែងរកព្រះជាម្ចាស់។

វិន័យទីពីរត្រូវស្រឡាញ់បងប្អូនឯៗទៀត​ឱ្យបា​នដូច​ស្រឡាញ់​ខ្លួន​ឯង!  វិន័យនេះនៅពេល​ខ្លះស្រួល​និ​យាយ ក៏ប៉ុន្តែនៅពេលយើងចាប់ផ្តើមអនុវត្តពិតជា​មិនងាយ​ស្រួល​ដូច​ការ​និយាយទេ ជូនកាលយើងខឹងគេ ជូនកាលយើងស្អប់គេ ជូនកាលយើងមិនចូលចិត្តអ្នកនេះ អ្នកនោះដែលនាំឱ្យពិភពលោ​ករបស់យើងមាន​សង្គ្រាម មានអំពើហឹង្សាដែលកំពុងតែ​កើត​​មានឡើងកាប់សម្លាប់គ្នា ដោយសារយើងមាន​ចិត្តអាត្មា​និយម​។ ពេលណាយើងមានចិត្តអាត្មា​និយម​នាំឱ្យយើងអត់មានសេចក្តីសុខ គឺយើងគិតតែអំពីខ្លួនឯង។

ហេតុនេះសុំឱ្យគ្រីស្តបរិស័ទទាំងអស់យក​វិន័យពីរនេះដែលជាឫសគល់សំខាន់​ សម្រាប់ជីវិត​របស់​យើង​គឺ​ត្រូវ​ស្រឡាញ់ព្រះជាម្ចាស់ជាព្រះរបស់យើងឱ្យអស់ពីកម្លាំងកាយកម្លាំងចិត្ត និងអស់ពីស្មារតីរបស់យើង។ សុំទុកពេលសម្រាប់ព្រះជាម្ចាស់ និង​ស្រឡាញ់​បងប្អូនឯទៀតៗទោះបីពិបាកសូ​មឱ្យយើង​ចេះខិត​ខំស្រ​ឡាញ់​អ្នកដទៃ និងចំណុចចុងក្រោយ​ដែលលោកពុកចង់ចែកគឺសូមឱ្យយើង​ជាគ្រីស្តបរិស័ទ​ចេះ​រស់​នៅ​ដោយ​​​ពឹងទៅលើព្រះជាម្ចាស់ ហើយ​ឱ្យ​ជំនឿរបស់ខ្ញុំមានការរីកចម្រើន ហើយឱ្យខ្ញុំចេះ​មានទំនាក់​ទំនង​រវាង​ខ្ញុំ និងព្រះជាម្ចាស់។

ហេតុនេះយើង​ទូល​អង្វរព្រះបិតា​ ព្រះបុត្រា និងព្រះវិញ្ញាណដ៏វិសុទ្ធសូមព្រះអង្គគង់នៅជាមួយយើង ដើម្បី​ឱ្យ​យើងមាន​កម្លាំង​ស្រឡាញ់ព្រះអង្គ និងស្រឡាញ់បងប្អូនឯទៀតៗឱ្យបានដូចស្រ​ឡាញ់ខ្លួនឯ​ងដែរ​។  អាម៉ែន៕