ថ្ងៃទី២៤ ខែកក្កដា ឆ្នាំ២០២៥ អត្ថបទគម្ពីរ (ម៉ាថាយ ១៣,១០-១៧)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល

ថ្ងៃនេះព្រះយេស៊ូដូចជាឌឺដល់អ្នកដែលស្តាប់ព្រះអង្គ! ព្រះអង្គមានព្រះបន្ទូលថា៖ “ទោះបីអ្នករាល់​គ្នាខិត​ខំ​ប្រឹង​​ប្រែងស្តាប់ ខិតខំប្រឹងប្រែងមើលឃើញក៏អ្នករាល់គ្នាមើលមិនឃើញ នឹងស្តាប់មិនឮដែរ”  ព្រះយេស៊ូ​និយាយ​​ដូច្នេះដើម្បីជំរុញយើងឲ្យខិតខំមែនទែន។ ព្រះយេស៊ូដូចជានិយាយផ្ទុយ ដើម្បីដាស់តឿន និង​ជំរុញ​យើ​ង ប្រសិនបើយើងមិនខិតខំមិនរវីរវល់ទេ យើងមិនយល់អំពីព្រះជាម្ចាស់ និងមិនយល់​អំពី​អត្ថ​ន័យ​នៃ​ជីវិត ហើយមិនយល់អំពីខ្លួនឯងពិតប្រាកដមែន។

ដូច្នេះព្រះយេស៊ូមានព្រះហឫទ័យសង្គ្រោះយើងមែនទែនទើបព្រះអង្គជំរុញយើង។ ជារបៀបរបស់​ព្រះយេ​ស៊ូ​​ដំបូង យើងអាចមិនយល់ ប៉ុន្តែតាមពិតជារបៀបត្រឹមត្រូវមួយ​ព្រោះពេលខ្លះ​យើងធ្វើ​ដូច​ជា​មិន​យល់​អំពី​ព្រះ​បន្ទូលរបស់ព្រះជាម្ចាស់។ ព្រះបន្ទូលរបស់ព្រះជាម្ចាស់ដូចជាដាវចាក់ទម្លុះនៅក្នុងចិត្ត​របស់យើង​ដែល​ធ្វើឱ្យ​យើងភ្ញាក់ខ្លួនដើម្បីសង្រ្គោះយើង។ ដូច្នេះប្រសិនបើព្រះបន្ទូលរបស់ព្រះជាម្ចាស់រំខាន​បងប្អូន​គឺ​ជា​ការ​ល្អ​ មានន័យថាពេលនោះបងប្អូនបានយកចិត្តទុកដាក់ នឹងចង់កែប្រែចិត្តគំនិត។

ដូច្នេះសុំកុំខ្លាចដែល​ឱ្យព្រះបន្ទូលរំខានយើង ពីព្រោះយើងមិនទាន់ជាសន្តសន្តីបុគ្គលទេ!​យើងត្រូវតែកែ​ប្រែ​ចិត្តគំនិតជានិច្ច ដើម្បីគាប់ព្រះហឫទ័យរបស់ព្រះជាម្ចាស់ជាព្រះបិតាដ៏ជាទី​ស្រឡាញ់របស់​យើង​អាម៉ែន​៕