ថ្ងៃទី២០ ខែមីនា ឆ្នាំ២០២៥អត្ថបទគម្ពីរ (លូកា ១៦,១៩-៣១) អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល

បងប្អូនជាទីស្រឡាញ់! យើងបន្តរួមជាមួយព្រះយេស៊ូ ឆ្ពោះទៅទុក្ខលំបាករបស់ព្រះយេស៊ូនៅឈើឆ្កាង អត្ថបទថ្ងៃនេះរំលឹកយើងថា យើងត្រូវមើលឃើញទុក្ខវេទនារបស់អ្នកដែលរងទុក្ខលំបាក។ អ្ន​ក​មាន​នៅ​ក្នុង​អត្ថបទដំណឹងល្អនៅថ្ងៃនេះធ្លាក់នរកមិនមែនមកពីគាត់ធ្វើអាក្រក់ចំពោះលោកឡាសា គឺ​មកពីគាត់​មិន​ចាប់​អារម្មណ៍លោកឡាសា។ ដូច្នេះយើងគួរមានសំណួរមួយពេលរដូវអប់រំពិសេសនេះ តើខ្ញុំបាន​ធ្វើអ្វី​ខ្លះ​ចំពោះអ្នកដទៃ ចំពោះអ្នកដែលនៅជាមួយខ្ញុំ និងកំពុងជួបប្រទះនឹងបញ្ហាណាមួយ?

ចូរកុំធើ្វដូចជាមិនដឹងមិនឃើញ តាមពិតព្រះយេស៊ូសុំឱ្យយើងបើកភ្នែក បើក​ត្រចៀក​ចាប់អារម្មណ៍​ចំពោះ​អ្នកដទៃ! ដែលនេះជាអំពើបាបរបស់អ្នកមានព្រោះគាត់គិតតែពីខ្លួនឯង។ ​សូម្បីតែពេល​គាត់​នៅ​ក្នុង​នរក​​គាត់នៅតែគិតតែពីបងប្អូនរបស់ខ្លួន គាត់មិនគិតពីអ្នកដទៃ គាត់​សុំឱ្យលោ​កអាប្រាហាំ​ចាត់​ម្នាក់​ឱ្យ​ទៅ​ជម្រាប​បងប្អូនរបស់គាត់ថា ត្រូវតែកែប្រែចិត្តគំនិត ។

​ប្រយ័ត្ន! កុំឱ្យយើងមានចិត្តរឹងរួសដូចគាត់ កុំឱ្យយើងទៅជាមនុស្សខ្វាក់ សូមឲ្យយើង​ចាប់​អារម្មណ៍​អ្នក​ដទៃ សូមជួយសម្រាលទុក្ខរបស់គេតាមរបៀបណាក៏បាន នោះយើងនឹងទទួល សេចក្តី​សុខ​សាន្ត​នៅ​ក្នុ​ង​ចិត្ត និងជីវិតអស់កល្បជានិច្ច។

ដូច្នេះក្នុងរដូវអរប់រំពិសេសនេះជាឱកាសដើម្បីកែប្រែចិត្តគំនិត និងជួយអ្នក​ដទៃ សុំបងប្អូនធើ្វ​តាម​របៀប​ដែល​យើង​អាច​ធ្វើបាន តាមសមត្ថភាពរបស់យើង។ អាម៉ែន៕