ថ្ងៃទី១០ ខែឧសភា ឆ្នាំ២០២៥អត្ថបទគម្ពីរ (យ៉ូហាន ៦,៦០-៦៩)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

ជម្រាបសួរបងប្អូនជាទីស្រឡាញ់! ខ្ញុំមានសេចក្តីសោមន្ស​រីករាយនឹងលើកយកពី​សាររបស់​សម្តេច​ប៉ាប​ហ្វ្រង់​ស៊ីស្កូដែលលោកទើបនឹងបានចែកឋានមរណៈភាពថ្មីៗនេះ សម្តេចប៉ាបមានព្រះបន្ទូលថា សេចក្តី​ស្រឡាញ់ និងជំនឿនាំឱ្យយើងរស់នៅភាព​សាមញ្ញដោយសម្តែងមេត្តាករុណា​ដល់បងប្អូនឯទៀតៗ។ នេះ​​ជាភាពសាមញ្ញរបស់សម្តេចប៉ាបដែលព្រះអង្គមានព្រះហឫទ័យសប្បុរសស្រឡាញ់ ដោយសារតែជំនឿ​ធ្វើ​ឱ្យយើងប្រតិបត្តិមេត្តាករុណាដល់បងប្អូនឯទៀតៗ។

ថ្ងៃនេះលោកសិលាសួរព្រះយេស៊ូថា តើខ្ញុំទៅរកណា? ព្រះអង្គជាព្រះបុត្រារបស់ព្រះជាម្ចាស់ ជាព្រះបន្ទូល​ដែល​ផ្តល់ជីវិត។ ចំណុចនេះនាំឱ្យយើងឃើញថា ព្រះយេស៊ូបានមកក្នុងលោកនេះព្រះអង្គ​បានប្រទា​ន​ជំ​នឿ និងសេចក្តីសង្ឃឹមដល់សាវ័ករបស់ព្រះអង្គដល់ពិភពលោក ប៉ុន្តែមានមនុស្សជាច្រើននៅតែមានកា​រ​សង្ស័យ​នៅព្រះបន្ទូលរបស់ព្រះអង្គ និងកិច្ចការដែលព្រះអង្គធ្វើ។

ហេតុនេះបានជាលោកសិលាប្រកាសជំនឿលើព្រះអង្គ កិច្ចការដែលលោកសិលាបានធើ្វក្នុងនាមជាមេនៃ​ក្រុមគ្រីស្តទូតទាំង១១នាក់ លោកបានប្រកាសជំនឿហើយក៏បានបំពេញកិច្ចការ ដូចជាការសួរសុខទុក្ខ ការ​អប់​រំ ការណែនាំជំនឿលើព្រះជាម្ចាស់។ ជំនឿនេះហើយធ្វើឱ្យឃើញថាព្រះយេស៊ូមានការ​អស្ចារ្យ​ដែល​លោក​​សិលាបានប្រោសអ្នកជំងឺឱ្យជា ហើយក៏បានណែនាំឱ្យមនុស្សជាច្រើនវិលមក​រកព្រះជាម្ចា​ស់​វិញ។

នៅពេលណាមានការសង្ស័យមានមនុស្សជាច្រើននូវមិនទាន់យល់មិនទាន់ដឹង ដូច្នេះចូរយើងខិតខំណែ​នាំ​អប់រំ ជាពិសេសបម្រើបងប្អូន ដើម្បីបង្ហាញថាអ្វីដែលព្រះយេស៊ូបានធ្វើ អ្វីដែលពួកគាត់មាន ​បទ​ពិសោធន៍ទទួលបានពីព្រះយេស៊ូជាពិសេសព្រះយេស៊ូដែល​ព្រះអង្គទទួលសិរីដ៏រុងរឿង​បញ្ជាក់​បង្ហាញ​ថា អ្វី​ៗដែលព្រះអង្គមា​នគឺព្រះអង្គមានជីវិតថ្មីដ៏រុងរឿង ធ្វើឱ្យពិភពលោកទាំងមូលមានពន្លឹ ​ធ្វើ​ឱ្យមនុស្ស​ទាំង​អស់​មានក្តី​សង្ឃឹមក្នុងជីវិត មានន័យថា​ពិភព​លោកដែលយើងកំពុងតែ​ធ្វើដំណើរសព្វថ្ងៃ​នេះគឺ​ព្រះ​យេ​ស៊ូ​​នាំ​យើង​វិល​ទៅ​រកព្រះបិតារបស់ព្រះអង្គវិញ។ ព្រះបិតា​ដែលបានប្រទានជីវិតឱ្យយើ​ងផ្តល់កំណើត​ឱ្យ​យើង ព្រះអង្គ​រង់​ចាំយើងឱ្យយើងទៅរស់នៅជា​មួយ​ព្រះ​អង្គអស់​កាលជា​អង្វែង នេះជាជីវិតអស់កល្បជានិច្ច។

ខ្ញុំពិតជាមានអំណរសប្បាយ​ដើម្បីទូលអង្វរព្រះ​ជា​ម្ចាស់នៅក្នុងរដូវបុណ្យចម្លងនេះ ជាពិសេសដល់​បង​ប្អូន​ដែល​បាន​ជ្រមុជទឹកហើយត្រៀម​ខ្លួន​ដើម្បី​​អប់រំទទួលអគ្គសញ្ញាលាបថ្ងាស ដើម្បីយើងបន្ត​បេស​​កកម្មរបស់​ព្រះយេស៊ូ។ យើងជាគ្រីស្តបរិស័ទ​យើង​ម្នាក់ៗ​ពិធីជ្រមុជទឹកធ្វើឱ្យយើងបានជីវិតថ្មី ហើយធ្វើឱ្យ​យើ​ង​មាន​សកម្មភាពថ្មី ធ្វើឱ្យយើងកែប្រែ​ចិត្ត​គំនិត​ផ្លាស់ប្តូរគំនិតរបស់យើង​គឺជាព្រះគ្រីស្តដែល​មាន​ព្រះ​ជន្ម​ថ្មី​ដ៏​រុង​រឿង ធ្វើឱ្យយើង​មានជីវិតថ្មី​រួមជា​មួយព្រះ​អង្គ។ អាម៉ែន៕ៃ