ថ្ងៃទី១០ ខែមេសា ឆ្នាំ២០២៥ អត្ថបទគម្ពីរ ( យ៉ូហាន ៨,៥១-៥៩)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល

បងប្អូនជាទីស្រឡាញ់! ដើម្បីយល់អត្ថបទដំណឹងល្អនៅថ្ងៃនេះឱ្យបានច្បាស់ យើងត្រូ​វតែ​ស្គាល់​សម្ព័ន្ធមេត្រីចាស់  នៅក្នុងសម្ព័ន្ធមេត្រីចាស់ព្រះជាម្ចាស់​ត្រាស់ហៅលោកម៉ូសេឱ្យរំដោះ​ប្រជាជនអ៊ីស្រាអែល ពេលនោះលោកម៉ូសេគាត់សួរ តើព្រះអង្គមានព្រះនាមអ្វី? ព្រះអង្គ​បាន​ឆ្លើយ​ថា “យើងមានព្រះជន្មគង់នៅ”។

ដូច្នេះនៅថ្ងៃនេះជនជាតិយូដាខឹងព្រះយេស៊ូដោយសារព្រះអង្គប្រាប់គេថាព្រះអង្គមិនប្រាប់គេថាព្រះអង្គជាព្រះបុត្រារបស់ព្រះជាម្ចាស់! សម្រាប់ជនជាតិអ៊ីស្រាអែលគេចាត់ទុកខ្លួនឯង​ជា​បុត្រាធីតារបស់ព្រះជាម្ចាស់គឺជាប្រជាជនដែលបូជាចារ្យបានជ្រើសរើស និងបានតែង​តាំង​ធ្វើ​ជា​បុត្ររបស់ព្រះអង្គ។  គេខឹងនៅពេលដែលព្រះយេស៊ូមានព្រះបន្ទូលថា ខ្ញុំមានជីវិត​រួច​ស្រេច​ទៅ​ហើយ ដូច្នេះគេមិនអាចទទួលសក្ខីភាពរបស់ព្រះយេស៊ូ។

ចំពោះយើងវិញ! ពេលខ្លះ​យើងវិនិច្ឆ័យអ្នកដទៃតែសំបកក្រៅទាំងដែលយើងមិនស្គាល់អត្ត​សញ្ញា​ណ​ច្បាស់របស់គេ អ្វីដែលយើងធើ្វវាហាក់ដូចជាយើងមិនបានឲ្យតម្លៃគេ  យើង​លាប​ពណ៌គេ យើងវិនិច្ឆ័យគេទាំងដែលខ្លួនមិនស្គាល់គេច្បាស់ និងមិនធ្លាប់មាន​ទំនាក់ទំនង​ជា​មួយ​គេ​។ ប្រហែលថ្ងៃនេះព្រះយេស៊ូសុំឱ្យយើងបើកចិត្តឱ្យទូលាយសម្រាប់អ្នកដទៃ និងស្វែង​រក​តើគេជានរណាឱ្យពិតប្រាកដ? ទោះបីគេបានធ្វើ​អំពើអាក្រក់​ជាមួយយើង​ប្រហែលគេ​ធ្វើអំពើ​អាក្រក់​ដោយមានមូលហេតុអ្វីមួយ។

ក្នុងរដូវអប់រំពិសេសនេះ សូម​ឱ្យយើងមើល​អ្នកដទៃ​តាម​របៀបថ្មី ​គឺតាម​រ​បៀប​របស់​ព្រះជា​ម្ចាស់ ព្រះជាម្ចាស់មិនដែលវិនិច្ឆ័យ និងមិនដែលលាបពណ៌​ឱ្យយើង ព្រះអង្គតែង​តែ​ជួយ​លើក​ទឹកចិត្តយើង។ ដូច្នេះយើងគួរតែចាប់អារម្មណ៍​ពីរបៀបដែលយើងមើលអ្នក​ដទៃ​ដូច្នោះ​ដែរ។