ថ្ងៃទី០6 ខែមីនា ឆ្នាំ២០២៥ អត្ថបទគម្ពីរ (លូកា៩,២២-២៥)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល
បាទបងប្អូនជាទីស្រឡាញ់! ពីម្សិលយើងបានចូលនៅក្នុងរដូវអប់រំពិសេស គឺមានពិធីរោយផេះ យើងមានរយៈពេល៤០ថ្ងៃ រួមដំណើរជាមួយព្រះយេស៊ូដែលត្រៀមខ្លួន និងរងទុក្ខលំបាកសោយទិវង្គត់នៅលើឈើឆ្កាងដើម្បីរស់ឡើងវិញ។
រដូវអប់រំពិសេស ដាស់តឿនយើងជាគ្រីស្តបរិស័ទឱ្យភ្ញាក់ខ្លួនឱ្យជម្រះចិត្តជម្រះកាយ ដើម្បីត្រៀមខ្លួនរួមស្លាប់ រួមរស់ជាមួយព្រះយេស៊ូ។ តាមពិតយើងដឹងថាជីវិតរបស់យើងមានទីបញ្ចប់ ទីបញ្ចប់មិនមែនជាទីបញ្ចប់ចុងក្រោយ ត្បិតគ្រីស្តបរិស័ទយើងជឿថា នៅពេលស្លាប់យើងនឹងរស់ឡើងវិញ។ ដូច្នេះយើងត្រូវតែត្រៀមខ្លួនមិនគ្រាន់តែដើម្បីស្លាប់ ប៉ុន្តែដើម្បីរស់ឱ្យមានជីវិត ក្នុងអត្ថបទដំណឹងល្អនៅថ្ងៃនេះព្រះយេស៊ូដាស់តឿនក្រុមគ្រីស្តទូតក្រុមសាវ័ករបស់ព្រះអង្គឱ្យលីឈើឆ្កាងរួមជាមួយព្រះយេស៊ូ អ្នកណាលីឈើឆ្កាងរបស់ព្រះអង្គរួមជាមួយព្រះអង្គអ្នកនោះនឹងមានជីវិតអស់កល្បជានិច្ច! គឺយើងសុខចិត្តរងទុក្ខលំបាកជាមួយព្រះយេស៊ូដើម្បីបានអំណរសប្បាយ សិរីរុងរឿងរួមជាមួយព្រះយេស៊ូនៅក្នុងអនាគត។
ពេលលីឈើឆ្កាងយើងរងទុក្ខលំបាករួមជាមួយព្រះយេស៊ូ តែក៏អាចមានអំណរសប្បាយ និងសិរីរុងរឿងដែរ។ រដូវអប់រំពិសេសបង្រៀនយើងឲ្យចេះលះបង់អ្វីៗទាំងអស់ដែលរារាំងយើងមិនឱ្យមានជីវិតពេញលក្ខណៈមិនឱ្យយើងទៅជាបុត្រធីតារបស់ព្រះជាម្ចាស់។ ដូច្នេះប្រហែលមានទម្លាប់អាក្រក់មានអំពើអាក្រក់ និងអាកប្បកិរិយាមិនគម្បីនេះជាឱកាសឱ្យយើងលះបង់ ពីព្រោះព្រះយេស៊ូប្រោសប្រទានព្រះវិញ្ញាណដ៏វិសុទ្ធដើម្បីឱ្យយើងមានកម្លាំងកាយកម្លាំងចិត្តអាចលះបង់ទម្លាប់ អាកប្បកិរិយាទង្វើអាក្រក់ទាំងប៉ុន្មានដែរយើងប្រព្រឹត្ត។
យើងត្រូវតែធ្វើអំពើល្អអំពើល្អនឹងជួយយើងឲ្យជៀសផុសពីអំពើអាក្រក់ ទីមួយគឺអធិដ្ឋានរួមជាមួយព្រះយេស៊ូ អធិដ្ឋានទូលអង្វរព្រះបិតាចំណាយពេលវេលាដើម្បីរិះគិតពិចារណាអំពីជីវិតខ្លួនឯងអំពីទំនាក់ទំនងខ្លួនឯងជាមួយព្រះជាម្ចាស់ ពីអ្វីដែលយើងកំពុងធ្វើនៅក្នុងជីវិតនេះ។
ដូច្នេះបងប្អូនអើយសុំទុកពេលវេលា ទុកពេលវេលាដើម្បីអធិដ្ឋានស្ងៀមស្ងាត់រិះគិតពិចារណា ហើយពេលនោះព្រះវិញ្ញាណដ៏វិសុទ្ធនិងជួយបំភ្លឺយើង តើយើងត្រូវធ្វើអ្វីខ្លះនៅរដូវអប់រំពិសេសអស់រយៈពេល៤០ថ្ងៃ? បងប្អូនអើយខ្ញុំសុំជូនពរឱ្យមានទុក្ខលំបាកយ៉ាងច្រើនជាមួយព្រះយេស៊ូម្ប៉ាង ដើម្បីឱ្យមានសិរីរុងរឿង ពន្លឺយ៉ាងត្រចះត្រចង់របស់ព្រះអង្គនិងអំណរសប្បាយ ពេលយើងរងទុក្ខលំបាកជាមួយព្រះយេស៊ូយើងក៏បង្ហាញថា យើងស្រឡាញ់ព្រះយេស៊ូ ពេលនោះយើងមានអំណរសប្បាយ ព្រោះយើងបានបង្ហាញថា យើងមានចិត្តស្រឡាញ់ចំពោះព្រះយេស៊ូ ប្រសិនបើព្រះយេស៊ូមានចិត្តសប្បាយយើងក៏សប្បាយដែរ។
ដូច្នេះសុំបងប្អូនចាប់អារម្មណ៍មែនទែននៅក្នុងរដូវអប់រំពិសេសនេះ ជាឱកាសដ៏ល្អដើម្បីធ្វើមនុស្សថ្មី ដើម្បីរស់នៅដោយមានព្រះជន្មរបស់ព្រះយេស៊ូផ្ទាល់នៅក្នុងខ្លួនរបស់យើង។ អាម៉ែន៕
Daily Program
