ថ្ងៃទី០៨ ខែឧសភា ឆ្នាំ២០២៥ អត្ថបទគម្ពីរ យ៉ូហាន៦,៥២-៥៩អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល

បងប្អូនជាទីស្រឡាញ់នៅក្នុងអត្ថបទដំណឹងល្អថ្ងៃនេះព្រះយេស៊ូមានព្រះបន្ទូលថា ខ្ញុំជានំបុ័ងជាអាហារ​ដែល​ចុះពីស្ថានបរមសុខ​​​ ហើយនឹងអ្នកណាពិសារអាហារនេះនឹងមានជីវិតអស់កល្បជានិច្ច។ យើងយល់​ថា​ព្រះយេស៊ូជាសាច់ឈាម ដែលព្រះអង្គប្រោសប្រទាន​ឱ្យមនុស្សទទួលទាន​ដើម្បីបានជីវិតអស់​កល្ប​ជា​និច្ច។ យើងដឹងថាព្រះយេស៊ូបានតែងតាំង​អគ្គសញ្ញាអរព្រះគុណ​គឺជាពិធីកាច់នំបុ័ងនៅ​ពេល​ជប់​លៀង​ចុង​ក្រោយ​ជាមួយក្រុមគ្រីស្តទូត ព្រះយេស៊ូយកនំបុ័ងមកកាន់ហើយអរព្រះគុណព្រះបិតា និងមានព្រះ​បន្ទូល​ថា នេះជារូបកាយរបស់ខ្ញុំដែលត្រូវបូជាសម្រាប់អ្នករាល់គ្នា។

សន្តយ៉ូហានដែលជាអ្នកនិពន្ធអត្ថបទដំណឹងល្អនៅក្នុងថ្ងៃនេះ មិនរៀបរាប់អំពីកាយវិការរបស់ព្រះយេស៊ូ​ដែលយក​នំបុ័ងមកកាន់ ប៉ុន្តែសម្រាប់លោកយ៉ូហានគាត់រៀបរាប់អំពីពិធីលាងជើងឱ្យក្រុមសាវ័ក ក្នុងជំពូក​ទី​មួយដែលយើងកំពុងអានអាទិត្យនេះសន្តយ៉ូហានជួយអប់រំ​ជួយបង្រៀន​អំពីអគ្គសញ្ញា​អរព្រះគុណ​ ពីពិធី​កាច់នំបុ័ង។ ព្រះយេស៊ូមានព្រះបន្ទូលថាខ្ញុំជាអាហរដែលផ្តល់ជីវិតអស់កល្បជានិច្ច អ្នកណាពិសារសាច់ និងលោហិតរបស់ខ្ញុំ អ្នកនោះមានជីវិតអស់កល្បជានិច្ចរួមជាមួយព្រះយេស៊ូ​ មានន័យថារាល់ពេល​ដែល​យើ​ង​ទទួលព្រះកាយ និងព្រះលោហិតរបស់ព្រះយេស៊ូនៅពេលអភិបូជាយើង​រួមរស់យ៉ាងស្និទ្ធស្នាល​ជាមួយព្រះអង្គ​​គឺយើងធ្វើជាអង្គតែមួយ។

អ្វីដែលកើតឡើងជាមួយព្រះយេស៊ូ និងកើតឡើងចំពោះយើងដែរ ដោយសារព្រះយេស៊ូជាព្រះសិរិសា យើង​​ជារូបកាយរបស់ព្រះគ្រីស្តយើងរួមជាអង្គតែមួយនិងទទួលជីវិតពីព្រះយេស៊ូ យើង​ទទួល​ព្រះជន្ម​​របស់​​ព្រះអង្គផ្ទាល់​តាមរយៈអគ្គសញ្ញាព្រះកាយ និងព្រះលោហិតរបស់ព្រះគ្រីស្ត។ ដូច្នេះបងប្អូនស្មឹង​​ស្មាតអំពីជំពូកទី៦​​នៃអត្ថបទដំណឹងល្អនៅថ្ងៃនេះ ដើម្បីរិះគិតអំពី តើអគ្គសញ្ញាអភិបូជា​មានន័យយ៉ាង​ដូច​ម្តេចសម្រាប់ខ្ញុំ និងសម្រាប់បងប្អូន?

តាមព្រះសហគមន៍កាតូលិកនៅមហាសន្និបាតវ៉ាទីកង់ទី២ អស់លោកអភិបាលបានប្រកាសយ៉ាង​ឱឡា​​រិតថា ពិធីបុណ្យជាពិសេសអគ្គសញ្ញាអរព្រះគុណជាប្រភពកំពូលនៃជីវិតជាគ្រីស្តបរិស័ទ។ ជាប្រភពដោយ​សារ​យើងទទួលព្រះជន្មរបស់ព្រះជាម្ចាស់ យើងទទួលអាហារ យើងទទួលព្រះបន្ទូល យើងទទួលកម្លាំង យើងទទួលអ្វីៗទាំងអស់ យើងទទួលព្រះហឫទ័យប្រណីសន្តោសនៅ​ពេលអគ្គសញ្ញាអរ​ព្រះគុណ​អស់​មួយ​ជីវិត ហើយជាគោលដៅ​ ពីព្រោះនៅពេលចុងក្រោយបំផុត ព្រះជាម្ចាស់នឹងត្រាស់ហៅយើង​ឱ្យបូជាជីវិត​​ដូចព្រះយេស៊ូ​បានបូជាព្រះជន្មនៅលើឈើឆ្កាង និងរាល់ពេលដែលយើងធ្វើពិធីកាត់នំបុ័ងព្រះយេស៊ូទទួល​បូជាព្រះជន្មខាងរបៀបអគ្គសញ្ញាខាងវិញ្ញាណ។ ដូច្នេះសូមប្រយ័ត្នអំពីការទទួលព្រះកាយ និង​ព្រះលោ​ហិត​របស់ព្រះគ្រីស្តគឺព្រះគ្រីស្តដែលមានតម្លៃមែនទែនសម្រាប់យើងទាំងអស់គ្នា ពីព្រោះពេលដែល​យើងទទួល​ព្រះកាយ និងព្រះលោហិតព្រះគ្រីស្តយើងត្រូវតែបម្រើអ្នកដទៃ។ អាម៉ែន៕