ថ្ងៃទី០៥ ខែឧសភា ឆ្នាំ២០២៥អត្ថបទគម្ពីរ (យ៉ូហាន ៦,២២-២៩)អត្ថាធិប្បាយគម្ពីរដោយ៖ លោកបូជាចារ្យ វី សំណាង

នៅក្នុងអត្ថបទព្រះគម្ពីរដំណឹងល្អតាមសន្តយ៉ូហានថ្ងៃនេះយើងបានស្តាប់ឮព្រះយេស៊ូមានព្រះបន្ទូលទៅកាន់បណ្តាជនដែលដើរតាមព្រះអង្គ។ ព្រះអង្គមានព្រះបន្ទូលថា៖​អ្នករាល់គ្នាដើរតា​មខ្ញុំដោយ​សារអ្នករាល់​គ្នាបា​នបរិភោគឆ្អែតតែប៉ុណ្ណឹង។ ប្រសិនបើយើងមើលដើមជំពូកទី៦យើង​នឹងឃើញព្រះយេស៊ូបានធ្វើ​ការ​អស្ចារ្យ ប្រោសឲ្យមាននំបុ័ង និងត្រីជាច្រើនដើម្បីចិញ្ចឹមបណ្តារជន ដូច្នេះពួកគេ​បានហូតឆ្អែតហើយ​នៅ​សេស​​សល់​ទៀត។

នេះជាអ្វីមួយដែលព្រះយេស៊ូចង់មានព្រះបន្ទូលសម្រាប់យើងម្នាក់ៗដែលជាគ្រីស្តបរិស័ទសព្វថ្ងៃនេះ ឱ្យ​យើង​​សួរបញ្ជាក់អំពីជំនឿរបស់យើង តើខ្ញុំជឿលើព្រះយេស៊ូ ខ្ញុំដើរតាមព្រះអង្គដោយសារមូលហេតុអ្វី? ពេលខ្លះដោយសារប្រយោជន៍ខាងរូបកាយរបស់យើង ដើម្បីប្រយោជន៍ជីវិតខាងលោកិយ៍ និង​សម្រាប់​ប្រយោជន៍ខាងក្រពះតែប៉ុណ្ណឹង ឬក៏យើងជឿទុកចិត្តទាំងស្រុងទៅលើព្រះជាម្ចាស់។

ដូច្នេះប្រសិនបើយើងមានហេតុផលផ្សេងខាងលោកិយ៍ ដើម្បីជឿលើព្រះយេស៊ូ​ចូរ​បងប្អូនត្រូវដឹងថា ​នៅ​លើ​លោកិយ៍នេះអ្វីៗ​មិនស្ថិតស្ថេរទេ! ជំនឿរបស់យើងក៏ដូចគ្នា ដូច្នេះកិច្ចការដែលយើ​ងត្រូវធ្វើ​គឺគ្រា​ន់តែ​ជឿ​​ទៅលើព្រះអង្គដែល​ជាព្រះ​បុត្រារបស់ព្រះជាម្ចាស់ឲ្យប្រាកដពីចិត្ត ដោយមិនពាក់​ព័ន្ធអ្វីមួយ​ក្នុង​លោកិ​យ៍​​នេះ​​ ដើម្បីជឿលើព្រះអង្គ នោះប្រសិនបើថ្ងៃណាមួយ​លោកិយ៍នេះផ្លាស់ប្តូរមិនស្ថិត​ស្ថេរ​​ជំនឿ​​របស់​យើង​ក៏នឹងផ្លាស់ប្តូរដែរ ។

ដូច្នេះសុំឱ្យជំនឿរបស់យើងដែលជាគ្រីស្តបរិស័ទ កុំពឹងលើអ្វីដែលនៅខាងលោកិយ៍នេះដើម្បីឱ្យយើង​ជឿ​លើ​​ព្រះអង្គតែ​ប៉ុណ្ណឹង ប៉ុន្តែឱ្យយើងចាក់ឫសយ៉ាងជ្រៅនៅក្នុងជំនឿរបស់យើង​ទទួលស្គាល់វត្តមាន​របស់​ព្រះអង្គដែលជាព្រះបុត្រារបស់ព្រះជាម្ចាស់ ទុកចិត្តលើព្រះអង្គនោះយើងនឹងឃើញវត្តមានរបស់ព្រះអង្គ យើងនឹងឃើញការអស្ចារ្យរបស់ព្រះអង្គនៅក្នុងជីវិតប្រចាំថ្ងៃរបស់យើង។

សុំព្រះជាម្ចាស់ប្រទានពរដល់យើងដែលជាគ្រីស្តបរិស័ទ ឱ្យយើងសួរខ្លួនឯងពីមួយថ្ងៃទៅមួយថ្ងៃអំពីជំនឿ​របស់​យើងដែលជឿទៅលើព្រះអង្គដោយសារអ្វី? សូមព្រះជាព្រះម្ចាស់ជួយ​បន្សុតជំនឿ​របស់យើង​ពីមួយ​ថ្ងៃទៅមួយថ្ងៃដើម្បីឱ្យជំនឿនេះនាំយើងទៅដល់ព្រះជាម្ចាស់ដែលជាប្រភពនៃអ្វីៗទាំងអស់។ អាម៉ែន៕