ថ្ងៃទី០៤ ខែមីនា ឆ្នាំ២០២៥ អត្ថបទគម្ពីរ (ម៉ាកុស ១០,២៨-៣១)អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

បាទជម្រាបសួរបងប្អូនជាទីស្រឡាញ់! ព្រះបន្ទូលថ្ងៃនេះជាព្រះបន្ទូលថ្ងៃចុងក្រោយរបស់រដូវធម្មតាមុនយើងចូលរដូវ៤០ថ្ងៃ ត្រូវនឹងថ្ងៃអង្គារ​ទី​០៨​អាទិត្យទី០៨ក្នុងរដូវធម្មតា។ បងប្អូន​បានស្តាប់ព្រះបន្ទូលថ្ងៃនេះ និយាយពីកា​រប្រឈមសម្រាប់អស់អ្នក​ដែលចង់ដើរតាមព្រះអង្គ អំ​ពី​ជំនឿយើងត្រូវលីឈើឆ្កាងលះបង់ខ្លួនឯង លះបង់ផ្ទះសម្បែង បងប្អូន កូន​ចៅ​គ្រួសារ កា​រងារ​ដើម្បីទៅ​ដើរតាមព្រះអង្គ។ អ្វីដែលយើងរំពឹងទុកគឺព្រះយេស៊ូបាន​សន្យាចំពោះយើង​​ថា​អស់អ្នកដែលដើរតាមព្រះអង្គគឺនឹងបានទទួលយ៉ាងច្រើននៅពេលក្រោយ។

បាទបងប្អូនជាទីស្រឡាញ់! ព្រះបន្ទូលថ្ងៃនេះ​បានជួយឱ្យយើងរិះគិតអំពីជីវិតនៃការត្រាស់ហៅ​របស់យើ​ង​ជាគ្រីស្តបរិស័ទ បងប្អូនអាចនឹកឃើញ​ជីវិតជាបូជាចារ្យ បងប្រុសបងស្រី ជាពិសេសសា​សនៈ​ទូត​ដែលលះ​បង់​គ្រួសារខ្លួនដែល​សុខ​ស្រួល បែរងាកមកបម្រើព្រះសហគមន៍នៅប្រទេសកម្ពុជាយើង។ ​បង​ប្អូន​​អាច​នឹក​ដល់សេចក្តីស្រឡាញ់ អ្វីដែលគាត់មានចំពោះជំនឿ ចំពោះបងប្អូន​ យើងក៏ឃើញថាការរស់នៅ​របស់​គាត់​ជា​ភស្តុតាងយ៉ាងជាក់ស្តែង បងប្អូនអាចនឹងឃើញការលះបង់ខ្លួនមិនគ្រាន់​តែជា​ជីវិត​​នៃ​ការ​បម្រើ​ព្រះ​សហ​គមន៍ប៉ុណ្ណោះទេ យើងអាចឃើញនៅក្នុងការរស់នៅជីវិតប្រចាំថ្ងៃរបស់​យើង ​ដូច​​ជានៅក្នុងក្រុម​គ្រួសារ នៅកន្លែងការងារ។

ពិតមែន​យើងត្រូវការលះ​បង់ដោយមិនគិតពីប្រយោជន៍ខ្លួន តែជាប្រយោជន៍រួម ជាពិសេស​ផល​ប្រយោជន៍​របស់​សង្គម​សន្តិសុខជាតិយើង ឯខាងផ្លូវវិញ្ញាណក៏ដូចគ្នាកាលណាយើងអត់​ជាប់​ជំពាក់​ចិត្ត​នៅ​អា​លះ​​អាល័យ​ជីវិតលោកិយ៍នេះពេកទេ យើងក៏នឹងអាចបន្តនៃ​ការ​ថ្វាយខ្លួនទៅព្រះជាម្ចាស់ ធ្វើកិច្ចការទាំ​ង​អស់​ថ្វាយទៅព្រះជាម្ចាស់ នោះយើងឃើញថា​ទោះបីនៅ​ពេល​ពិបាកជួបឧបសគ្គបញ្ហានានា បើឆន្ទៈឬ​គោល​ដៅច្បាស់​លាស់ ដោយសេចក្តីស្រឡាញ់ព្រះជាម្ចាស់នឹងជួយយើងឲ្យ​អាចបំពេញ​បេស​ក​កម្ម ឬការ​ងា​រ​ដែលទ្រង់បានត្រាស់ហៅឱ្យក្លាយជាពិតជាក់ជាពុំខានឡើយ។

បាទ!ដូច្នេះបងប្អូនជាពិសេសបងប្អូនដែលជាគ្រីស្តបរិស័ទសូមរិះគិតពិចារណាថា តើយើងអាចឆ្លើយតប​នៃការត្រាស់ហៅរបស់ព្រះអង្គនៅក្នុងការបម្រើកិច្ចការដែលព្រះអង្គត្រាស់ហៅយើងឬយ៉ាងណា? អាច​ក្លាយជាមេគ្រួសារ អាចជាគ្រីស្តបរិស័ទធម្មតា ឬក៏អាចទៅជាបុជិតបុជិតា បងប្រុសបងស្រី និងបូជា​ចារ្យ​ជាដើម​​ដើម្បីបម្រើព្រះសហគមន៍ ឬបម្រើព្រះជាម្ចាស់។ បងប្អូនមានអំណរសប្បាយ​បម្រើព្រះអង្គ! ​ទោះ​បី​យើង​ជួបការលំបាកអ្វីក៏​ដោយ​ព្រះ​អង្គនឹង​ឱ្យ​យើ​ង​ឆ្លង​កាត់​បាន ម្យ៉ាង​ទៀតសម្រាប់​ក្តី​សង្ឃឹមរ​បស់​យើង​អំពី​រង្វាន់នៅស្ថានបរមសុខ ពិតមែននេះគឺជាជំនឿនៅក្នុងលោកខាងមុខរបស់​យើងផងដែរ។

សូមឱ្យព្រះបន្ទូលថ្ងៃនេះជួយជំរុញឱ្យបងប្អូនអាចឆ្លើយតប និងបំពេញកាតព្វកិច្ច ក៏ដូចជា​តួនាទីរបស់​ខ្លួន​យ៉ា​ង​ល្អដើម្បីលើកតម្កើងសិរីរុងរឿងរបស់ព្រះជាម្ចាស់ និងទុកចិត្តលើព្រះអង្គ​ថែរក្សា​យើង។

សូមព្រះជាម្ចាស់ប្រទានពរឱ្យអស់បងប្អូន អាមែន៕