សិល្បៈគំនូរសហសម័យ និងគំនូរស្រមើរស្រមៃកំពុងទទួលបានប្រជាប្រិយភាពខ្លាំង ជាមួយនឹងការបញ្ចូលក្បាច់រចនាបុរាណខ្មែរ

គំនូរបែបស្រមើរស្រមៃ និងគំនូរសម័យទំនើប ដែលជាប្រភេទសិល្បៈសហសម័យ (Contemporary Art) កំពុងតែស្រូបទាញការចាប់អារម្មណ៍យ៉ាងខ្លាំងនៅក្នុងប្រទេសកម្ពុជា។ គេប្រទះឃើញស្នាដៃសិល្បៈច្នៃប្រឌិតទាំងនេះ ត្រូវបានយកទៅគូរលម្អនៅលើជញ្ជាំងភោជនីយដ្ឋាន ហាងកាហ្វេ និងរមណីយដ្ឋានទេសចរណ៍នានា ទាំងនៅក្នុងរាជធានីភ្នំពេញ និងខេត្តសៀមរាប។

លោក អ៊ុក ឈីវប៊ុនចិត្ត ម្ចាស់ហាងកាហ្វេ Coffee O’clock ក្នុងរាជធានីភ្នំពេញ បានឱ្យដឹងថា លោកបានសម្រេចចិត្តជ្រើសរើសគំនូរបែបស្រមើរស្រមៃមកលម្អក្នុងហាងរបស់លោក ដោយសារតែទម្រង់សិល្បៈនេះទើបតែចាប់ផ្តើមមានប្រជាប្រិយភាព និងនៅមានអ្នកចេះគូរតិចតួចក្នុងស្រុក។ លោកបន្ថែមថា ថ្វីដ្បិតតែទម្រង់នេះមានវត្តមាននៅបរទេសយូរមកហើយក្តី ប៉ុន្តែនៅកម្ពុជា វាជាអ្វីដែលប្លែកភ្នែក និងអាចទាក់ទាញអារម្មណ៍ភ្ញៀវឱ្យចាប់អារម្មណ៍យ៉ាងខ្លាំង។

កញ្ញា កែវ សុធាវី បុគ្គលិក និងជាវិចិត្រករគូររូបនៅក្នុងហាងកាហ្វេខាងលើ បានចែករំលែកថា កញ្ញាបានចាប់ផ្តើមរៀនមូលដ្ឋានគ្រឹះគំនូរតាំងពីឆ្នាំ ២០១៥ ហើយបានវិវឌ្ឍមកគូរគំនូរបែបស្រមើរស្រមៃនៅលើក្រដាស និងលើជញ្ជាំងធំៗក្នុងរយៈពេល ២ ឆ្នាំចុងក្រោយនេះ។ កញ្ញាបានបញ្ជាក់ថា ផលលំបាកនៃការគូររូបបែប ២D ស្រមើរស្រមៃនេះ គឺតម្រូវឱ្យមានគំនិតច្នៃប្រឌិតថ្មីៗរហូត និងមិនត្រូវយកគំនិតដដែលៗមកប្រើប្រាស់នោះឡើយ។

ដោយឡែក អ្នកនាង ម៉ម លីហ្សា វិចិត្រករគូរគំនូរបែបសម័យទំនើប និងជាអ្នកប្រឡូកក្នុងវិស័យគំនូរអឺរ៉ុបប្រមាណ ៨ ឆ្នាំ បានកត់សម្គាល់ឃើញថា វិស័យនេះមានការរីកចម្រើនយ៉ាងខ្លាំងប្រៀបធៀបនឹងពេលដែលអ្នកនាងចាប់ផ្តើមដំបូង។ បច្ចុប្បន្ន ក្រៅពីអតិថិជនក្នុងស្រុក អ្នកនាងក៏ទទួលបានការគាំទ្រពីអតិថិជននៅបរទេស ដូចជា ប្រទេសបារាំង និងអូស្ត្រាលី ផងដែរ។

អ្នកនាងបានបន្តទៀតថា កត្តាសំខាន់ដែលធ្វើឱ្យស្នាដៃរបស់វិចិត្រករខ្មែរទទួលបានការគាំទ្រពីអតិថិជនអន្តរជាតិ គឺភាពច្នៃប្រឌិត មិនចម្លងពីគេ និងការបញ្ចូលអត្តសញ្ញាណដើមនៃក្បាច់គំនូរបុរាណខ្មែរ។ អ្នកនាងបានលើកឡើងថា៖ «ក្នុងគំនូររបស់ខ្ញុំ គឺប្រើក្បាច់ផ្កាភ្ញី ក្បាច់ត្របកឈូក ឬក្បាច់ខ្យងដែលខ្ញុំឃើញក្នុងសៀវភៅ យកមកច្នៃប្រឌិតបន្ថែមឱ្យមានភាពសម័យទំនើប... ខ្ញុំចង់ឱ្យវាទៅជាគំនូរទាន់សម័យ និងក្លាយទៅជាអ្វីមួយដែលថ្មី»។

ជាចុងក្រោយ ក្រុមអ្នកជំនាញផ្នែកសិល្បៈគំនូរបានផ្តល់ការផ្ដាំផ្ញើដល់យុវជនខ្មែរដែលស្រឡាញ់វិស័យនេះថា គួរស្វែងយល់ឱ្យបានច្បាស់ពីវប្បធម៌ និងក្បាច់គំនូរបុរាណរបស់ជាតិខ្លួន រួចបូកផ្សំជាមួយគំនិតច្នៃប្រឌិតថ្មីៗ ដើម្បីឱ្យស្នាដៃខ្មែរអាចប្រកួតប្រជែង និងវាយលុកទីផ្សារគំនូរនៅលើឆាកអន្តរជាតិបានយ៉ាងមានប្រសិទ្ធភាព៕