ថ្ងៃទី១៧ ខែឧសភា ឆ្នាំ២០២៥ អត្ថបទគម្ពីរ (យ៉ូហាន ១៤,៧-១៤) អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

មុននិងចាប់ផ្តើមខ្ញុំមានសារមួយរបស់សម្តេចប៉ាបហ្វ្រង់ស៊ីស្កូ ដែលទើបនឹងទទួលមរណៈភាព សាររបស់​លោក​​​មានខ្លឹមសារដូចនេះថា ជីវិតរបស់យើងពិត​ជាសំខាន់ គឺអំពីធម្មជាតិទឹកទន្លេមិនផឹកខ្លួនឯងទេ ដើម​ឈើ​ក៏មិនទទួលទានផលផ្លែខ្លួនឯងដែរ អំពីព្រះអាទិត្យក៏មិនបញ្ជេញរស្មីសម្រាប់ខ្លួនឯងដែរ រីឯផ្កា​មាន​ក្លិន​ក្រអូប​​​ក៏មិនស្រង់យកក្លិនក្រអូបខ្លួនដែរ។

សេចក្តីនេះសឱ្យឃើញថាជីវិតរបស់យើងមានសារៈសំខាន់ ជីវិតយើងកើតមកសម្រាប់អ្នកដទៃ ដូចទៅនិង​ធម្ម​ជា​តិ​ដែលមិនទទួលផលប្រយោជន៍សម្រាប់ខ្លួនដែរ។ ពេលយើងធ្វើកិច្ចការចែកមេត្តា​ករុណា ចែក​ក្តី​ស្រឡា​ញ់ ​​ចែកការលើកលែងទោសដល់បងប្អូនឯទៀតៗ នឹងធ្វើឱ្យបងប្អូនទទួលសេចក្តីស្រឡាញ់ ធ្វើ​ឱ្យ​បង​ប្អូនទទួលអំណរសប្បាយ។

ជាងនេះទៅទៀតនៅពេលដែលយើងឃើញបងប្អូនទាំងនោះបានទទួល យើងរឹតតែទទួលអំណរសប្បាយ​នោះ​ដោយលើសលប់ ព្រោះបងប្អូនបានទទួលការស្រឡាញ់ ការរាប់អាន ការអាណិតអាសូរ​នឹងកា​​រលើកលែងទោស ទាំងនេះធ្វើឱ្យយើងឃើញថា យើងមានអំណរសប្បាយ​នៅ​ពេល​ដែលឃើញស្នាម​ញញឹម និងឃើញបងប្អូនដែលបានទទួល។

ខ្ញុំត្រឡប់មកព្រះបន្ទូលដំណឹងល្អថ្ងៃនេះព្រះយេស៊ូមានព្រះបន្ទូលថា អ្នកបានស្គាល់ខ្ញុំដូចអ្នក​បានស្គាល់​ព្រះ​ជាម្ចាស់! បានឃើញខ្ញុំដូចជាបានឃើញព្រះជាម្ចាស់! សេចក្តីនេះធ្វើឱ្យសាវ័កទាំងឡាយ​ចង់​ឃើញ គេ​ចង់​ជួបព្រះយេស៊ូ! ព្រះអង្គបានប្រាប់គេថា ពេលណាបងប្អូនបានស្តាប់ខ្ញុំ បានឃើញខ្ញុំ បាន​ជួប​ខ្ញុំ​ ​គឺ​ជា​ព្រះ​​បិតាដែលបងប្អូនបានជួប។ សេចក្តីទាំងប៉ុន្មានដែលព្រះយេស៊ូបានបង្រៀន សេចក្តីទាំងប៉ុ​ន្មាន​ដែល​ព្រះយេស៊ូធ្វើគឺព្រះអង្គធ្វើក្នុងនាមព្រះបិតារបស់ព្រះអង្គ។​

ចំពោះយើងនៅក្នុងបរិបទនៃបុណ្យចម្លងនេះ ព្រះយេស៊ូមានព្រះជន្មរស់ឡើងវិញយើងឃើញថាជំនឿតែ​មួយ ពិធីជ្រមុជទឹកដែលយើងបានទទួលគឺធ្វើឱ្យយើងកើតជា​ថ្មី ធ្វើឱ្យយើងទទួលព្រះវិញ្ញាណ​ដ៏វិសុទ្ធ​ដែ​ល​ណែ​នាំឱ្យយើងទទួលបេសកកម្ម គឺកិច្ចការដែលធ្វើឱ្យមនុស្សលោកស្គាល់ព្រះជាម្ចាស់ ធ្វើ​ឱ្យ​មនុស្ស​​​លោក​វិល​មករកព្រះជាម្ចាស់! ធ្វើឱ្យមនុស្សលោកស្រឡាញ់ព្រះជាម្ចាស់​ដែលបាន​បង្កើត​ខ្លួន ​ដែល​បាន​ផ្តល់​ជីវិ​ត​ឱ្យខ្លួន។

សូមអរព្រះគុណព្រះជាម្ចាស់នូវរាល់កិច្ចការដែលយើងបានធ្វើ គឺជាកិច្ចការដែលបង្ហាញពីសេចក្តី​ស្រឡាញ់​ដោយព្រះយេស៊ូមានព្រះជន្មរស់ឡើងវិញ។ សូមព្រះអង្គប្រទានពរឱ្យយើងមានជីវិតថ្មីរួមជាមួយព្រះអង្គ ព្រម​ទាំងកិច្ចការដែលយើងធ្វើគឺធ្វើក្នុងនាមព្រះគ្រីស្ត។ អាម៉ែន៕