អូគូបូ តូស្ហ៊ីមីជី គឺជារដ្ឋបុរសជប៉ុន និងជាអតីតសាម៉ឺរ៉ៃនៃដែនដីដ៏មានឥទ្ធិពល សាតស៊ូម៉ា នៅភាគខាងត្បូង ប្រទេសជប៉ុន។ លោកគឺជាវរជនមួយរូបនៃបដិវត្តន៍ឆ្នាំ១៨៦៨ ប្រឆាំងនឹងរដ្ឋាភិបាលស្ហ៉ូហ្គុន។ ដោយត្រូវបានចាត់ទុកជាស្ថាបនិកម្នាក់ដ៏សំខាន់នៃប្រទេសជប៉ុនទំនើប លោកអូគូបូ តូស្ហ៊ីមីជី ស្ថិតនៅក្នុងចំណោមឥស្សរជនបីរូបល្បីល្បាញបំផុតនៃសម័យកាលបដិវត្តន៍ម៉ីជីជប៉ុន។
ជាកូនប្រុសរបស់អូគូបូ ហ្ស៉ឺម៉ូន អ្នកបម្រើនៃលោកម្ចាស់ដី ស្ហ៊ីម៉ាហ្ស៊ូ ណារីយ៉ាគីរ៉ា នៃដែនដីសាតស៊ូម៉ា ភាគខាងត្បូងជប៉ុន លោកអូគូបូ តូស្ហ៊ីមីជី បានចាប់កំណើតនៅខេត្តសាតស៊ូម៉ា ដែលសព្វថ្ងៃគឺជាខេត្តកាហ្គ៉ូស្ហ៊ីម៉ា។
នៅថ្ងៃទី៣ ខែមករា ឆ្នាំ១៨៦៨ ជាការប្រកាសបដិវត្តន៍ម៉ីជី។ ឥស្សរជនកំពូលទាំងបី នៃយុគសម័យម៉ឺជី ដែលមាន លោកអូគូបូ តូស្ហ៊ីមីជី លោកសៃហ្គូ និងលោកគីដូ បានបង្កើតរដ្ឋាភិបាលថ្មីបណ្តោះអាសន្ន។
នៅឆ្នាំ១៨៧១ ក្នុងនាមជារដ្ឋមន្រ្តីហិរញ្ញវត្ថុ លោកអូគូបូ តូស្ហ៊ីមីជី បានដាក់ឲ្យដំណើរការនូវកំណែទម្រង់ពន្ធដីធ្លី។ នៅកម្រិតទំនាក់ទំនងអន្តរជាតិ លោកអូគូបូ បានធ្វើការដើម្បីត្រួតពិនិត្យឡើងវិញនូវសន្ធិសញ្ញាមិនយុត្តិធម៌ទាំងឡាយ ដែលត្រូវបានដាក់លើជប៉ុនចាប់តាំងពីការបើកប្រទេស ហើយលោកអូគូបូក៏បានចូលរួមក្នុងបេសកកម្មអ៊ីវ៉ាគូរ៉ា គឺធ្វើដំណើរនៅជុំវិញពិភពលោកពីឆ្នាំ១៨៧១ ដល់ឆ្នាំ១៨៧៣។ នេះជាបេសកកម្មដើម្បីពិនិត្យមើលលើវិស័យវិទ្យាសាស្រ្ត និងសង្គម នៃប្រទេសរីកចម្រើនទំនើបៗ នៅសម័យនោះ។
លោកអូគូបូ តូស្ហ៊ីមីជី ត្រឡប់មកជប៉ុនវិញនៅថ្ងៃទី១៣ ខែកញ្ញា ឆ្នាំ១៨៧៣ ទាន់ពេលវេលាដើម្បីរារាំងការឈ្លានពានកូរ៉េ ដែលលើកតម្កើងសកម្មភាពនេះដោយលោកសៃហ្គូ តាកាម៉ូរី។ នៅឆ្នាំ១៨៧៤ លោកបានបង្រ្កាបការបះបោរសាហ្គា ដែលដឹកនាំដោយអតីតរដ្ឋមន្រ្តីយុត្តិធម៌ អេតូ ស្ហ៊ីមប៉ៃ។ ដោយត្រូវបានតែងតាំងជារដ្ឋមន្រ្តីក្រសួងមហាផ្ទៃ លោកអូគូបូមានអំណាចច្រើនដោយសារលោកគ្រប់គ្រងប៉ូលីស និងការតែងតាំងរដ្ឋាភិបាលតំបន់។ លោកក៏យកប្រយោជន៍ពីអំណាចនេះដើម្បីលើកកម្ពស់ការអភិវឌ្ឍឧស្សាហកម្មជាតិ។ លោកអូគូបូ បានចូលរួមក្នុងសន្និសីទអូសាកា នៅឆ្នាំ១៨៧៥ នៅក្នុងក្តីសង្ឃឹមនឹងផ្សះផ្សាររវាងសមាជិកនៃក្រុមឧកញ៉ានៃយុគសម័យម៉ឺជី។
នៅឆ្នាំ១៨៧៧ ការបះបោរសាតស៊ូម៉ា បានផ្ទុះឡើង ដែលដឹកនាំដោយសៃហ្គូ។ ក្រុមអ្នកបះបោរសាតស៊ូម៉ា បានប្រយុទ្ធប្រឆាំងនឹងទាហានរៀបរយរបស់រដ្ឋាភិបាលដែលបញ្ជាដោយរដ្ឋមន្រ្តីក្រសួងមហាផ្ទៃ លោកអូគូបូ។ បន្ទាប់ពីការបរាជ័យនៃដែនដីសាតស៊ូម៉ា លោកអូគូបូ ត្រូវបានចាត់ទុកជាជនក្បត់ដែនដីកំណើតរបស់លោក និងដោយអតីតសាម៉ឺរ៉ៃចាស់ៗ ជាច្រើន។ នៅថ្ងៃទី១៤ ខែឧសភា ឆ្នាំ១៨៧៨ លោកត្រូវបានធ្វើឃាត ដោយស្ហ៊ីម៉ាដា អ៊ីជីរ៉ូ និងសាមឺរ៉ៃ ៦នាក់ ទៀតនៃដែនដីសាតស៊ូម៉ា នៅខណៈដែលលោកវិលត្រឡប់មកទីក្រុងតូក្យូ។
លោកអូគូបូ គឺជាអ្នកនាំមក ដ៏មានឥទ្ធិពលបំផុតនៃយុគសម័យបដិវត្តន៍ម៉ីជី។ លោកដាក់ឲ្យដំណើរការនូវរចនាសម្ព័ន្ធរដ្ឋាភិបាលទំនើប ទោះបីជាមានរយៈពេលខ្លី ក៏នៅពេលវេលានោះ លោកអូគូបូ គឺជាបុគ្គលដែលមានអំណាចបំផុតនៅជប៉ុន។ ជាអ្នកស្មោះត្រង់ និងជាតិនិយមដែលមានការលះបង់ លោកត្រូវបានទទួលការគោរពពីសហការីរបស់លោក ក៏ដូចជាសត្រូវរបស់លោកផងដែរ។
នៅក្នុងសង្គមប្រជាប្រិយ ដោយដើរតួដោយតារាសម្តែងជប៉ុន លោកអារ៉ាតា អ៊ីអ៊ូរ៉ា លោកលោកអូគូបូ តូស្ហ៊ីមីជី បានលេចមុខនៅក្នុងរឿងភាគ Last Samurai Standing ឬសាមឺរ៉ៃនៅសល់ចុងក្រោយ ដែលផលិតដោយក្រុមហ៊ុន ណេតហ្វ្លិក (Netflix)។
Daily Program
