លោកស្ហ៉ាវកាត មៀហ្ស៊ីយ៉ូយេវ កើតនៅថ្ងៃទី២៤ ខែកក្កដា ឆ្នាំ១៩៥៧ នៅក្នុងខេត្ត ឌីហ្ស៊ីហ្ស៉ាក ប្រទេសអូបេគីស្តង់។ លោកគឺជារដ្ឋបុរសប្រទេសអូបេគីស្តង់ នៅតំបន់អាស៊ីកណ្តាល។ លោកស្ហ៉ាវកាត មៀហ្ស៊ីយ៉ូយេវ ធ្វើជាប្រធានាធិបតីនៃសាធារណរដ្ឋអូបេគីស្តង់ ពីថ្ងៃទី៨ ខែកញ្ញា ឆ្នាំ២០១៦។
នៅអំឡុងការកាន់អំណាច លោកស្ហ៉ាវកាត មៀហ្ស៊ីយ៉ូយេវ បានដាក់ចេញនូវកំណែទម្រង់ផ្នែកនយោបាយ សេដ្ឋកិច្ច និងសង្គម ជាបន្តបន្ទាប់។ តួយ៉ាង ការងាររបស់កុមារ និងការងារបង្ខំនៅក្នុងឧស្សាហកម្មកប្បាស ត្រូវបានហាមឃាត់ ដែលនេះគឺជាការបញ្ចប់ការងារប្រភេទដែលរាយប៉ាយយ៉ាងទំលំទូលាយនៅក្នុងប្រទេស។
នៅឆ្នាំ២០២៣ កំណែទម្រង់របស់លោកមៀហ្ស៊ីយ៉ូយេវ គឺសំដៅធ្វើឲ្យប្រទេសអូបេគីស្តង់ មានសេដ្ឋកិច្ចបើកចំហដែលទាក់ទាញសហគ្រាស និងការវិនិយោគពីបរទេស។ នៅក្នុងចំណោមអាទិភាពនានារបស់លោកមៀហ្ស៊ីយ៉ូយេវ គឺមានដូចជា ការប្រឆាំងនឹងអំពើពុករលួយ ប្រឆាំងការិយាល័យធិបតេយ្យ ព្រមទាំងការលុបបំបាត់រនាំងពាណិជ្ជកម្ម។
លោកមៀហ្ស៊ីយ៉ូយេវ មានសញ្ញាបត្រវិស្វករមេកានិក និងបណ្ឌិតផ្នែកវិទ្យាសាស្រ្តតិកនិកពីរដ្ឋធានី តាចខេន ប្រទេសអូបេគីស្តង់ នៅឆ្នាំ១៩៨១។
បន្ទាប់ពីឯករាជ្យភាពប្រទេសអូបេគីស្តង់នៅថ្ងៃទី៣១ ខែសីហា ឆ្នាំ១៩៩១ លោកមៀហ្ស៊ីយ៉ូយេវ នៅរក្សាតំណែងនាយករដ្ឋមន្រ្តី និងចូលរួមជាមួយគណបក្សប្រជាធិបតេយ្យប្រជាជនអូបេគីស្តង់ (NDPU)។ នៅខណៈដែលលោកធ្វើការនៅអង្គភាពអនុវត្តន៍នយោបាយ លោកក៏ជា តំណាងរាស្រ្តនៅសភា អូលីយ ម៉ាលីស នៃសាធារណរដ្ឋអូបេគីស្តង់ ពីឆ្នាំ១៩៩៥ ដល់ឆ្នាំ២០០៣។ នៅថ្ងៃទី១២ ខែធ្នូ ឆ្នាំ២០០៣ លោកត្រូវបានតែងតាំងជានាយករដ្ឋមន្រ្តីដោយប្រធានាធិបតី ឥស្លាម ការីម៉ូវ។
នៅថ្ងៃទី១៦ ខែកញ្ញា ឆ្នាំ២០១៦ លោកដាក់ខ្លួនជាបេក្ខភាពសម្រាប់ការបោះឆ្នោតនៅថ្ងៃទី៤ ខែធ្នូ ដែលលោកបានជាប់ឆ្នោតជាប្រធានាធិបតីអូបេគីស្តង់ជាមួយនិងសម្លេង ៨៨,៦%។
លោកមៀហ្ស៊ីយ៉ូយេវ បានដាក់ចេញនូវកម្មវិធីនយោបាយសេរីនិយម បន្ទាប់ពីការចូលកាន់តំណែង។ នៅថ្ងៃទី៧ ខែកុម្ភៈ ឆ្នាំ២០១៧ យុទ្ធសាស្រ្តសកម្មភាពលើអ័ក្សអាទិភាពចំនួន ៥ នៃការអភិវឌ្ឍសាធារណរដ្ឋអូបេគីស្តង់ ត្រូវបានអនុម័ត ដែលក្នុងនោះ រួមមាន ការធ្វើឲ្យល្អប្រសើរឡើងនូវការស្ថាបនារដ្ឋ និងសង្គម ការធានានីតិរដ្ឋ និងការបន្តធ្វើកំណែទម្រង់ប្រព័ន្ធយុត្តិធម៌ និងតុលាការ ការអភិវឌ្ឍ និងសេរីនិយមលើសេដ្ឋកិច្ច ការអភិវឌ្ឍវិស័យសង្គម ការធានាសន្តិសុខ និងសុខដុមរមនីយកម្មជនជាតិភាគតិច និងការអនុគ្រោះសម្រាប់សាសនា ព្រមទាំងការដាក់ឲ្យដំណើរការនូវនយោបាយការបរទេសឲ្យមានតុល្យភាព ដោយឈលើផលប្រយោជន៍ទៅវិញទៅមក និងការស្ថាបនា។
ការប្រែប្រួលត្រូវបានឃើញនៅក្នុងសេដ្ឋកិច្ច នៅក្នុងវិស័យនៃសេរីភាពការបញ្ចេញមតិ និងសិទ្ធមនុស្ស នៅក្នុងនយោបាយផ្ទាល់ខ្លួនរបស់រដ្ឋ នៅក្នុងការអបរំ និងនៅក្នុងកងកម្លាំងប៉ូលីស កម្លាំងយោធា និងកងកម្លាំងពិសេស។
លោកមៀហ្ស៊ីយ៉ូយេវផ្តើមលើកទឹកចិត្តឲ្យប្រជាពលរដ្ឋរិះគន់អំណាចសាធារណៈ។ ហើយកំណែទម្រង់ខាងសាសនាដែលសំដៅផ្តល់សេរីភាពដល់សាសនាដល់ប្រជាពលរដ្ឋក៏បានចាប់ផ្តើមធ្វើ។ ប្រទេសអូបេគីស្តង់ក៏ដាក់ឲ្យដំណើរការនូវខ្សែទំនាក់ទំនងផ្ទាល់ជាមួយប្រធានាធិបតី ប្រព័ន្ធផ្សព្វផ្សាយឯករាជ្យ និងអ្នកធ្វើមាតិកា ព្រមទាំងសន្និសីទសារព័ត៌មានជាទៀតទាត់ផង។
នៅឆ្នាំ២០១៩ ទស្សនាវដ្តី ឌឹ អេកូណូមីស្ត៍ (The Economist) បានចាត់ទុកប្រទេសអូបេគីស្តង់ ជាប្រទេសប្រចាំឆ្នាំ និងទទួលស្គាល់កំណែទម្រង់ដែលបានកើតមានឡើងនៅក្នុងប្រទេសនេះ។
អូបេគីស្តង់ គឺជាប្រទេសមួយក្នុងចំណោមប្រទេសនានាដ៏កម្រ ដែលអាចរក្សាបាននូវកំណើនសេដ្ឋកិច្ឋក្នុងអំឡុងពេលរោគរាតត្បាត។ ជីឌីភី (GDP) បានកើនឡើង ១០១,៦%។
Daily Program
