ថ្ងៃទី​២៥ ខែធ្នូ ឆ្នាំ២០២៤ អត្ថាធិប្បាយគម្ពីរ លូកា ២,១៥-២០បកស្រាយដោយ៖ លោកបូជាចារ្យ រ៉ាជេត ហាសាពូទី

បងប្អូនជាទីគោរព! ព្រះសហគមន៍កាតូលិក និងពិភពលោកទាំង​មូលនឹករំលឹកបុណ្យ​ឱឡារិត ​គឺជា​ខួប​ព្រះយេស៊ូប្រសូត្រ ឬខួបកំណើតព្រះអង្គ។ ខួបកំណើតព្រះយេស៊ូជាបុណ្យនៃអំណរសប្បាយ សេចក្តី​សុខ​សាន្ត សេចក្តីស្រឡាញ់ ការលើកលែងទោស និងសេចក្តីសង្ឃឹម។ ព្រះយេស៊ូប្រសូត្រជាមនុស្ស​រួម​សាមគ្គី និងរួមវាសនាជាមួយមនុស្សយើង គ្រីស្តបរិស័ទ ​គោរព​ព្រះគ្រីស្តទុកជា​ពន្លឺនៃ​ពិភព​លោក​ដូច​ជា​ថ្ងៃរះឡើង​ដែរ​។ អត្ថបទថ្ងៃនេះនិយាយពីដំណើរកំណើតព្រះយេស៊ូ និងទេវទូតប្រកាសពីកំណើត​ព្រះ​យេ​ស៊ូ​ប្រាប់​ពួក​គង្វាល។ ព្រះយេស៊ូប្រសូត្រជាមនុស្សនៅភូមិបេក្លេហឹមនៅថ្ងៃទី២៥ ខែធ្នូ ២០០០​ឆ្នាំ​មុន​។​

ពេលលោកយូសែប និងនាងម៉ា​រី​ទៅដល់​ភូមិ​បេក្លេហឹម នាង​ម៉ារីគ្រ​ប់ខែ​ហើយ​សម្រាល​បាន​បុត្រមួយ​ជា​បុត្រ​ច្បង នាងរុំបុត្រនោះ​នឹង​សំពត់​រួច​ដាក់ឱ្យផ្ទុំនៅក្នុងស្នូកសត្វ ត្បិតគ្មានសំណាក់នៅក្នុងផ្ទះសោះ។ ទោះ​បី​ជាព្រះយេស៊ូជាព្រះបុត្រា​របស់​ព្រះជាម្ចាស់មែន តែទ្រង់បានប្រសូត្រ​ជាមនុស្សក្រីក្រដូចពួកយើង។ អត្ថ​បទថ្ងៃនេះ​ចង់សង្កត់ធន់លើភាពក្រីក្រមានន័យថា ឱ្យគុណតម្លៃ ឬគុណធម៌របស់​ព្រះជា​ម្ចាស់​ដល់​ព្រះយេ​ស៊ូដែលបានចាក់ឫសនៅក្នុងជីវិតរបស់យើងត្បិតទ្រង់បានប្រសូតជាមនុស្សសាមញ្ញ។

បុណ្យព្រះយេស៊ូប្រសូត្រគឺជាអំណរសប្បាយ សេចក្តីសុខសាន្ត សេចក្តីស្រឡាញ់ ការលើក​លែង​ទោស និងសេចក្តីសង្ឃឹមផ្ទាល់ មួយវិញទៀតការចែករំលែកព្រះអំណោយទានទាំងអស់នេះជាមួយអ្នកដទៃ​​ពិសេស​​ជាមួយអ្នកដែលខ្វះខាត។ បងប្អូនជាទីគោរព! នាឱកាសបុណ្យព្រះយេស៊ូប្រសូត្រ​សូមបងប្អូន​ព្រម​ទាំង​​ក្រុមគ្រួសារមានអំណរសប្បាយ សុខសន្តិភាព សេចក្តីស្រឡាញ់ និងសេចក្តី​សង្ឃឹម​ពី​ព្រះ​ឱរស់​យេ​ស៊ូ​។

សូមព្រះជាម្ចាស់ណែនាំពួកយើងឲ្យចេះបន្ទាបខ្លួនដូចព្រះយេស៊ូ និងពួកគង្វាលព្រមទាំងបើកចិត្តគំ​និត​របស់​យើងឱ្យបានទូលំទូលាយដើម្បីទទួលស្វាគមន៍ព្រះឱរស់យេស៊ូ និងព្រះអំណោយទានរបស់ព្រះអង្គ។ រីករាយបុណ្យព្រះយេស៊ូប្រសូត្រ។ សូមព្រះជាអម្ចាស់ប្រទានពរយើង៕ អាមែន