ថ្ងៃទី១៣ ខែឧសភា ឆ្នាំ២០២៥ អត្ថបទគម្ពីរ (យ៉ូហាន១០,២២-៣០)អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

អាទិត្យនេះយើងរំលឹកដល់ព្រះយេស៊ូជាគង្វាយដ៏សប្បរុស ក្នុងសប្តាហ៍​នេះ​យើង​អាច​ស្តាប់​ព្រះ​បន្ទូល​អំពី​ព្រះយេ​ស៊ូជាអ្នកគង្វាយដ៏ល្អ ឬក៏ជាទ្វារនៃចៀម។ ថ្ងៃនេះមានគេឆ្ងល់ថា តើត្រូវធ្វើយ៉ាងម៉េចទៀតដើម្បី​ជឿ​ព្រះអង្គ ឬក៏រង់ចាំអ្នកណាទៀត? ប៉ុន្តែព្រះយេស៊ូបានរំលឹកពួកគេថា អ្វីដែល​ព្រះអង្គ​និយាយ អ្វីដែល​ព្រះ​អង្គ​បង្រៀន ព្រះអង្គប្រាប់ថាសូមមើលកិច្ចការដែលព្រះអង្គបានធ្វើដែរ ដោយសារកិច្ច​ការរបស់​​ព្រះ​អង្គ​គឺ​ជា​កិច្ចការនៃការសង្គ្រោះ។

បងប្អូនដឹងហើយថា​នៅពេលព្រះយេស៊ូបង្រៀន ព្រះអង្គមានកិច្ចការដើម្បី​បញ្ជាក់អំពីដំណឹងល្អនោះ​ឱ្យ​ប្រជា​ជនគេជឿថា ព្រះយេស៊ូជាព្រះបុត្រារបស់ព្រះជាម្ចាស់ ឬជាអ្នកដែលព្រះជាម្ចាស់​បានចាត់​ឱ្យ​មក​ក្នុង​លោ​កនេះ។ និយាយរួមគឺព្រះគ្រីស្តដែលគេអាចទទួលយកបាន ប៉ុន្តែរបៀបដែលព្រះអង្គ​ធ្វើហាក់ដូច​ជា​មិន​ត្រូវដូចអ្វីដែលគេរំពឹងគិត។ ដូច្នេះបានជាគេមានសំណួរជាមួយព្រះយេស៊ូ? ព្រះយេស៊ូបាន​រំលឹក​ពួក​គេ​ថា អ្នកណាស្រឡាញ់ព្រះអង្គនឹងយកចិត្តទុកដាក់ថែរក្សាជាប់នឹងព្រះអង្គ នោះនឹង​គ្មាននរណា​ឆក់យក​ពី​ព្រះអង្គបានឡើយ។

ដូច្នេះយើងឃើញថានៅក្នុងជីវិតជាគ្រីស្តបរិស័ទរបស់យើង ​យើងមានគង្វាលដ៏សប្បុរសគឺព្រះ​យេស៊ូ​គ្រីស្ត! មុនពេលដែលព្រះអង្គទៅក៏ព្រះអង្គប្រទានឱ្យមានសម្តេចប៉ាបដែលជាអ្នកបន្តវេនពីព្រះអង្គ ហើយ​រហូត​ដល់ប៉ុន្មានសប្តាហ៍នេះយើងបានដឹងហើយថាយើងបានសម្តេចប៉ាបថ្មីដែលជាអ្នកគង្វាលរបស់ព្រះសហគមន៍។ គង្វាលដែលព្រះអង្គបានណែនាំ​គឺបន្តនៅ​ក្នុងស្ថាប័នសម្តេចប៉ាបដែល​បន្តពីសន្តសិលារហូត​ដល់​យើង​​សព្វថ្ងៃនេះ។

ទោះបីយើងមិនឃើញថាព្រះយេស៊ូដឹកនាំហ្វូងចៀមរបស់ព្រះអង្គយ៉ាងណា តែយ៉ាងតិចយើងបាន​ឃើញ​ថា មានសម្តេចប៉ាបដែលបន្តការដឹកនាំនេះចាប់ពីព្រះអង្គបន្តឱ្យលោកសិលា រហូតដល់យើងសព្វថ្ងៃនេះគឺ​សម្តេច​ប៉ាបឡេ​អូទី១៤ ហើយក៏ជាសម្តេចប៉ាបទី២៦៧។ នេះជាលក្ខណៈមួយ​ដែលយើងឃើញថា​ព្រះសហ​​គមន៍​របស់យើងមិនដែលដាច់គង្វាលសម្រាប់ដឹកនាំព្រះសហគមន៍ទេ។ សម្រាប់យើង​ត្រូវ​ធ្វើ​យ៉ាង​ម៉េចប្រសិនបើព្រះយេស៊ូបានសួរថា ដោយសារយើងមិន​នៅក្នុងហ្វូងចៀម​របស់ព្រះអង្គបាន​ជា​យើង​មិន​ជឿ!។

បាទ! ជាការរំលឹកយើងម្យ៉ាងថា ប្រសិនយើងជាហ្វូងចៀមរបស់ព្រះអង្គមែនអ្វីដែល​ព្រះជាម្ចាស់បាន​ប្រ​ទាន​​​ឱ្យយើងតាមរយៈការណែនាំការបកស្រាយ ការពន្យល់ពីសម្តេចប៉ាបក៏ជាអ្វីមួយដែលយើងត្រូវ​តែ​ដើរ​តាម​ផងដែរ។ ព្រះអង្គបានអនុវត្តតាមព្រះបន្ទូលរបស់ព្រះអង្គ តាមព្រះបន្ទូលរបស់ព្រះយេស៊ូ យើង​ជា​ហ្វូង​ចៀមក៏ត្រូវអនុវត្តតាមព្រះបន្ទូលដែលព្រះអង្គប្រទាន​ឱ្យយើង និងអនុវត្តតាមការណែនាំរបស់គង្វាល​ដែលយើងមានសព្វថ្ងៃនេះគ្រប់លំដាប់។ មានន័យថានៅក្នុងព្រះសហគមន៍សកលយើងមានសម្តេចប៉ាប យើងមានភូមិភាគដ៏ធំរបស់យើងមានលោកអភិបាល ឬក្នុងព្រះសហគមន៍របស់យើងនីមួយៗយើង​ក៏​​មាន​លោក​បូជាចារ្យដែលទទួលខុសត្រូវ។

ដូច្នេះទាំងអស់សុទ្ធតែជាគង្វាលដើម្បីដឹកនាំព្រះសហគមន៍! យើងជឿ ធ្វើតាម សហការគ្នា រួម​ដៃ​គ្នា​ធ្វើ​ម៉េច​ដើម្បី​ឱ្យហ្វូង​ចៀមរបស់ព្រះជាម្ចាស់ទៅកាន់ព្រះបិតាបាន នេះជាទិសដៅរបស់យើង ហើយ​ធ្វើ​ម៉េច​ដើម្បីឱ្យយើងឆ្លងកាត់ពីលោកនេះតាមរបៀបត្រឹមត្រូវល្អ​ដោយមានព្រះយេស៊ូជួយការពារថែ​រក្សា​យើង​ ដូច​ព្រះបិតាបានប្រគល់តួនាទីនេះឱ្យព្រះយេស៊ូបន្តបន្ទាប់ឱ្យយើងសព្វថ្ងៃនេះដែរ។ សូមព្រះជាម្ចាស់ប្រទា​ន​ពរ​ឱ្យបងប្អូន និងសូមឱ្យយើងរួមដំណើរជាមួយគ្នាជាមួយគង្វាលរបស់យើងគ្រប់លំដាប់ផង។ អាម៉ែន៕