​បេសកជនឌីជីថលអាស៊ីស្វែងរកកិច្ចសហប្រតិបត្តិការ និងការសិក្សារៀនសូត្រក្នុងមហាសន្និបាតលើកដំបូងនៅទីក្រុងម៉ានីល

បេសកជន និងអ្នកសារព័ត៌មានឌីជីថលកាតូលិកមកពីផ្នែកផ្សេងៗនៃទ្វីបអាស៊ី កំពុងជួបជុំគ្នានៅវិទ្យុ Radio Veritas Asia ក្នុងសង្កាត់ Fairview Park ក្រុង Quezon ដើម្បីចូលរួមក្នុង «មហាសន្និបាតបេសកជនឌីជីថលកាតូលិកអាស៊ី» (Asian Catholic Digital Missionary Assembly) ដែលប្រព្រឹត្តទៅចាប់ពីថ្ងៃទី ១០ ដល់ថ្ងៃទី ១៣ ខែកញ្ញា។

មហាសន្និបាតរយៈពេល ៤ ថ្ងៃនេះ ដែលរៀបចំឡើងដោយវិទ្យុ Radio Veritas Asia បានប្រមូលផ្តុំអ្នកចូលរួមមកពីបណ្តាប្រទេសផ្សេងៗនៅអាស៊ី ដើម្បីពិភាក្សាអំពីតួនាទីកាន់តែរីកធំឡើងនៃប្រព័ន្ធផ្សព្វផ្សាយឌីជីថល នៅក្នុងបេសកកម្មផ្សព្វផ្សាយសាសនា និងការទំនាក់ទំនងរបស់ព្រះសហគមន៍កាតូលិក។

ការជួបជុំនេះធ្វើឡើងក្រោមប្រធានបទ «ពីអ្នកមានឥទ្ធិពល ទៅជាសាក្សី៖ ផ្លូវរួមដំណើរសម្រាប់បេសកកម្មឌីជីថលនៅអាស៊ី» (Influencers to Witnesses: Synodal Way for Digital Mission in Asia) ដោយផ្តោតលើការអំពាវនាវឲ្យអ្នកទំនាក់ទំនងឌីជីថលកាតូលិក ដើរហួសពីគ្រាន់តែជាអ្នកមានឥទ្ធិពលលើបណ្តាញសង្គម ហើយក្លាយជាសាក្សីដ៏ពិតប្រាកដនៃជំនឿនៅក្នុងបរិបទឌីជីថល។

ក្នុងចំណោមអ្នកចូលរួម លោកបូជាចារ្យ Ritchie Vincent មកពីភូមិភាគ Madras និង Mylapore ប្រទេសឥណ្ឌា បាននិយាយថា ចាប់អារម្មណ៍ចូលរួមមហាសន្និបាតនេះ ដោយសារបទពិសោធន៍ដែលលោកធ្លាប់បានចូលរួមការជួបជុំបេសកជនឌីជីថលអន្តរជាតិនៅបុរីវ៉ាទីកាំង។

លោកបូជាចារ្យ Ritchie បានបន្ថែមថា កាលនោះមានអ្នកចូលរួមមកពីអាស៊ីតិចតួចណាស់ ដែលធ្វើឲ្យលោកចោទសួរថា តើអ្នកបេសកជនឌីជីថលអាស៊ីនៅឯណាអស់ហើយ?

លោកបានបន្តថា «នោះគឺជាបំណងប្រាថ្នាយ៉ាងមុតមាំមួយនៅក្នុងចិត្តរបស់ខ្ញុំ»។

លោកបានបន្ថែមថា មហាសន្និបាតនៅទីក្រុងម៉ានីលនេះ បានផ្តល់ឱកាសសម្រាប់អ្នកបេសកជនឌីជីថលអាស៊ី ក្នុងការជួបជុំគ្នា សហការគ្នា និងរៀនសូត្រពីគ្នាទៅវិញទៅមក។

បច្ចុប្បន្ន លោកបូជាចារ្យ Ritchie កំពុងធ្វើការជាមួយសហគមន៍បេសកជនឌីជីថលនៅក្នុងប្រទេសឥណ្ឌា រួមទាំងអ្នកមានឥទ្ធិពលកាតូលិកដែលកំពុងទទួលការហ្វឹកហ្វឺន និងអ្នកបេសកជនឌីជីថលដែលកំពុងសិក្សាស៊ីជម្រៅអំពីសាសនាកាតូលិក។ លោកទន្ទឹងរង់ចាំការរៀនសូត្របច្ចេកទេស និងបច្ចេកវិទ្យាថ្មីៗ ព្រមទាំងទទួលបានគំនិតដែលវិជ្ជមាន ដើម្បីពង្រឹងកិច្ចការបំរើព្រះរបស់លោកនៅក្នុងប្រទេសឥណ្ឌា។

សម្រាប់កញ្ញា Gie Rhea Jadulco មកពីប្រទេសហ្វីលីពីន មហាសន្និបាតនេះគឺជាឱកាសមួយដើម្បីសិក្សាអំពីរបៀបដែលប្រព័ន្ធផ្សព្វផ្សាយសង្គម និងការទំនាក់ទំនងសង្គម ត្រូវគេយកទៅប្រើប្រាស់នៅក្នុងបណ្តាប្រទេសផ្សេងទៀតនៅអាស៊ី។

កញ្ញាបាននិយាយថា «ខ្ញុំគ្រាន់តែចង់រៀនសូត្រពីវប្បធម៌ផ្សេងទៀត និងរបៀបដែលប្រព័ន្ធផ្សព្វផ្សាយសង្គម និងការទំនាក់ទំនងសង្គមដំណើរការនៅក្នុងបណ្តាប្រទេសផ្សេងទៀតក្នុងទ្វីបអាស៊ី»។ កញ្ញាក៏បានសម្តែងក្តីរំពឹងទុកក្នុងការជួបអ្នកចូលរួមមកពីប្រទេសផ្សេងៗ និងបង្កើតមិត្តភាពក្នុងអំឡុងពេលនៃការជួបជុំនេះផងដែរ។

ទន្ទឹមនឹងនេះ កញ្ញា Mika Ellah L. Tabada ដែលមកពីប្រទេសហ្វីលីពីនដែរនោះ បាននិយាយថា កញ្ញាទន្ទឹងរង់ចាំការពិភាក្សា និងការជួបជាមួយមិត្តភក្តិបេសកជនឌីជីថលមកពីទូទាំងទ្វីបអាស៊ី។ កញ្ញាបានបន្ថែមថា អ្នកចូលរួមអាចមានវប្បធម៌ (platforms) និងការអនុវត្តខុសៗគ្នា ប៉ុន្តែមហាសន្និបាតនេះអាចផ្តល់ឱកាសក្នុងការសហការ និងរៀនសូត្រពីគ្នាទៅវិញទៅមក។

កញ្ញាបាននិយាយថា «ទោះបីជាយើងទាំងអស់គ្នាជាជនជាតិអាស៊ីក៏ដោយ យើងមានវប្បធម៌ខុសគ្នា យើងមានផ្លាតហ្វមខុសគ្នា និងមានការអនុវត្តខុសៗគ្នា»។ កញ្ញាក៏បានគូសបញ្ជាក់ពីភាពរាក់ទាក់ និងគំនិតច្នៃប្រឌិតរបស់ប្រទេសហ្វីលីពីន ថាជាគុណសម្បត្តិមួយក្នុងចំណោមគុណសម្បត្តិទាំងឡាយ ដែលប្រតិភូហ្វីលីពីនអាចចែករំលែកជាមួយប្រតិភូដទៃទៀត។

កញ្ញា Jennifer Odelia Meredith មកពីប្រទេសឥណ្ឌូនេស៊ី បាននិយាយថា កញ្ញាទន្ទឹងរង់ចាំការជួបជាមួយមិត្តភក្តិអ្នកចូលរួម និងពិភាក្សាអំពីវិធីសាស្ត្រក្នុងការពង្រឹងបេសកកម្មឌីជីថលនៅក្នុងប្រទេសរៀងៗខ្លួន។ កញ្ញាបានបន្ថែមថា ការជួបជុំនេះអាចជួយឲ្យអ្នកចូលរួមរៀនសូត្រពីវិធីថ្មីៗក្នុងការបង្កើតប្រព័ន្ធផ្សព្វផ្សាយ និងមាតិកាសម្រាប់សហគមន៍របស់ពួកគេ។

នៅពេលសួរថាតើកញ្ញានឹងនាំយកអ្វីខ្លះពីប្រទេសឥណ្ឌូនេស៊ីមកកាន់មហាសន្និបាតនេះ កញ្ញា Meredith បានសង្កត់ធ្ងន់លើសារៈសំខាន់នៃ «ការអធិស្ឋានឲ្យគ្នាទៅវិញទៅមក»។

អ្នកចូលរួមទាំងអស់ត្រូវបានរំពឹងថានឹងចូលរួមក្នុងការពិភាក្សា វគ្គបណ្តុះបណ្តាល និងការផ្លាស់ប្តូរទស្សនៈស្តីពីការផ្សព្វផ្សាយសាសនាតាមឌីជីថល ការអនុវត្តការទំនាក់ទំនង និងកិច្ចសហប្រតិបត្តិការក្នុងចំណោមអ្នកបេសកជនឌីជីថលកាតូលិកនៅអាស៊ី។

ថ្ងៃដំបូងនៃមហាសន្និបាតបានបើកឆាកដោយពិធីអភិបូជា (Holy Mass) ដែលក្នុងនោះប្រតិភូទាំងឡាយបានចូលរួមដោយស្លៀកសម្លៀកបំពាក់ប្រពៃណីតាមវប្បធម៌របស់ពួកគេ ដើម្បីអបអរសាទរនូវភាពចម្រុះដ៏សម្បូរបែប និងភាពជាធ្លុងមួយនៃព្រះសហគមន៍កាតូលិកនៅទូទាំងទ្វីបអាស៊ី។