អ្នកជំនាញកូរ៉េប្រាប់ហើយរំលឹកយុវជនកាតូលិក កុំឱ្យពិភពឌីជីថលកំណត់តម្លៃរបស់ខ្លួន

អ្នកជំនាញផ្នែកទំនាក់ទំនងកូរ៉េខាងត្បូងម្នាក់ មុនកិច្ចប្រជុំប្រព័ន្ធផ្សព្វផ្សាយឌីជីថលកាតូលិកអាស៊ីលើកដំបូង បានរំលឹកថា យុវជនកាតូលិកមិនគួរអនុញ្ញាតឱ្យប្រជាប្រិយភាពតាមអ៊ីនធឺណិត ចំនួនអ្នកតាមដាន ឬភាពមើលឃើញតាមឌីជីថលកំណត់អារម្មណ៍នៃតម្លៃរបស់ពួកគេឡើយ។

លោកស្រីបណ្ឌិត អេនណា ជីហុន យូ (Anna Jihyun You) អ្នកសារព័ត៌មាន និងជាអ្នកជំនាញផ្នែកទំនាក់ទំនងដែលមានបទពិសោធន៍ បាននិយាយថា បេសកកម្មឌីជីថលរបស់ព្រះសហគមន៍ ត្រូវតែជួយយុវជនឱ្យរកឃើញអារម្មណ៍កាន់តែស៊ីជម្រៅនៃអត្តសញ្ញាណ និងសេចក្តីថ្លៃថ្នូររបស់មនុស្ស នៅក្នុងវប្បធម៌អនឡាញដែលកាន់តែខ្លាំងឡើងត្រូវបានបង្កើតឡើងដោយក្បួនខ្នាត។

លោកស្រីបានរំលឹកយុវជនកាតូលិកនៅក្នុងបទសម្ភាសន៍ មុនកិច្ចប្រជុំដែលគ្រោងរៀបចំរយៈពេល ៣ថ្ងៃ គឺពីថ្ងៃទី១០ ដល់ថ្ងៃទី១៣ ខែកញ្ញា ថា៖ «អ្នកមិនត្រូវការអ្នកតាមដានរាប់ពាន់នាក់ ឬភាពល្អឥតខ្ចោះដែលបានកែច្នៃលើបណ្តាញសង្គម ដើម្បីធ្វើជាសាក្សីនៃព្រះរាជ្យរបស់ព្រះអង្គនោះទេ។ អ្វីដែលត្រូវការគឺការសន្ទនាដ៏ស្ងប់ស្ងាត់ ប៉ុន្តែស្មោះត្រង់ ឬវត្តមានដ៏អាណិតអាសូរដែលអាចប៉ះពាល់ដល់ព្រលឹងតាមរបៀបដែលអ្នកប្រហែលជាមិនធ្លាប់ដឹង»។

តាមការគ្រោងទុក យុវជន និងអ្នកបង្កើតមាតិកានៅលើបណ្តាញសង្គមកាតូលិកប្រមាណ ១០០នាក់ មកពីអាស៊ី នឹងជួបជុំគ្នានៅពេលនោះ ដើម្បីឆ្លុះបញ្ចាំងពីរបៀបដែលព្រះសហគមន៍អាចក្លាយជាវត្តមានដែលមានអត្ថន័យជាងមុន នៅក្នុងលំហឌីជីថលដែលយុវជនរស់នៅ ទំនាក់ទំនង និងស្វែងរកអត្ថន័យពិតនាពេលបច្ចុប្បន្ន។

នៅក្នុងបទសម្ភាសន៍នោះ លោកស្រីបានលើកឡើងជាសំឡេងក្នុងតំបន់ស្តីពីទំនាក់ទំនងសីលធម៌ សេចក្តីថ្លៃថ្នូររបស់មនុស្ស និងការទំនាក់ទំនងក្នុងយុគសម័យនៃបញ្ញាសិប្បនិម្មិត ហើយបានរំលឹកយុវជនអំពីបញ្ហាប្រឈមចម្បងមួយដែលពួកគេកំពុងប្រឈមមុខ គឺសម្ពាធដែលត្រូវតែបង្ហាញវត្តមានជានិច្ចតាមអ៊ីនធឺណិត។

លោកស្រីបានបន្តថា វេទិកាឌីជីថលអាចលើកទឹកចិត្តអ្នកប្រើប្រាស់ឱ្យវាស់ស្ទង់តម្លៃខ្លួនឯងតាមរយៈការចុចប៊ូតុង «ចូលចិត្ត» (Like) ការតាមដាន (Follow) ការមើល (View) និងទម្រង់នៃការចូលរួមផ្សេងទៀត ប៉ុន្តែសក្ខីភាពជាគ្រិស្តបរិស័ទតម្រូវឱ្យមានការយល់ដឹងខុសគ្នាស្រឡះអំពីតម្លៃរបស់មនុស្ស។