សារវីដេអូ របស់សម្តេចប៉ាប​៖ «ចូរលើកកម្ពស់​ផ្លូវវិញ្ញាណតាម​រយៈ​អភិបូជា នៅតាមព្រះសហគមន៍ក្នុងស្រុករបស់អ្នក»

សម្តេចប៉ាប ឡេអូ ទី ១៤ បានទាមទារ និងដាស់តឿនព្រះសហគមន៍កាតូលិកក្នុងតំបន់អាស៊ី ឱ្យលើកកម្ពស់​ផ្លូវវិញ្ញាណតាម​រយៈ​អភិបូជា ឱ្យកាន់តែជ្រាលជ្រៅនៅតាមសហគមន៍កាតូលិកក្នុងស្រុកនីមួយៗ ដោយទ្រង់មានបន្ទូលថា វាជាគ្រឹះនៃឯកភាពនៃព្រះសហគមន៍ង ជាសោរដ៏សំខាន់ក្នុងការក្លាយជាអ្នកកសាងស្ពានមេត្រីភាពពិតប្រាកដនៅទូទាំងទ្វីប។

សារវីដេអូរបស់សម្តេចប៉ាប​ ត្រូវបានពាំនាំតាមរយៈវីដេអូខ្លីមួយ ដែលបានចាក់ផ្សាយនៅរសៀលថ្ងៃទី ២៥ ខែកក្កដា នៅបន្ទប់វ៉ាន់ដា (Vanda Room) នៃសណ្ឋាគារ Mulia ក្រុងហ្សាការតារ ក្នុងឱកាសមហាសន្និបាតពេញអង្គលើកទី ១២ នៃសភា​លោកអភិបាលកាតូលិកអាស៊ី (FABC)។

មានបន្ទូលទៅកាន់លោកអភិបាល ក្រុមបូជាចារ្យ គ្រហស្ថ និងប្រតិភូតំណាងមកពីទូទាំងតំបន់អាស៊ី សម្តេចប៉ាប ឡេអូ បានបញ្ជាក់ពីការគង់នៅជិតស្និទ្ធខាងវិញ្ញាណរបស់ទ្រង់ ជាមួយពួកគេ ខណៈដែលពួកគេកំពុងសញ្ជឹងគិតអំពីបេសកកម្មនាពេលអនាគតរបស់ព្រះសហគមន៍នៅលើទ្វីបនេះ។

«បងប្អូនប្រុសស្រីជាទីស្រឡាញ់នៅក្នុងព្រះគ្រីស្ត ខ្ញុំសូមជម្រាបសួរយ៉ាងកក់ក្តៅបំផុតដល់បងប្អូនទាំងអស់គ្នា ដែលកំពុងចូលរួមក្នុងមហាសន្និបាតពេញអង្គ នៃសភា​លោកអភិបាលកាតូលិកអាស៊ី នៅក្រុងហ្សាការតារ»។

ដោយយោងទៅលើឯកសារ​ណែនាំ​របស់​ព្រះអង្គ​ដែល​បានបោះពុម្ពផ្សាយកាលពីពេលថ្មីៗនេះ មានចំណងជើងថា Magnifica Humanitas សម្តេចប៉ាប ឡេអូ បានរំលឹកប្រតិភូទាំងឡាយថា សាមគ្គីភាពរបស់គ្រីស្តបរិស័ទគឺមានឫសគល់នៅក្នុងព្រះគ្រីស្ត និងត្រូវបានចិញ្ចឹមបីបាច់តាមរយៈអភិបូជា។

«ខ្ញុំបានសរសេរថា សាមគ្គីភាពរបស់គ្រីស្តបរិស័ទស្វែងរកប្រភពដើមរបស់ខ្លួននៅក្នុងអាថ៌កំបាំងនៃព្រះគ្រីស្ត និងកើតចេញពីការរួមផ្សំគ្នារបស់យើងនៅក្នុងពិធីអភិបូជា ជាពិសេសគឺពិធីអរព្រះគុណ» នេះជាបន្ទូលរបស់សម្តេចប៉ាប។

បន្ទាប់មក ទ្រង់បានធ្វើការអំពាវនាវដោយផ្ទាល់ទៅកាន់លោកអភិបាលទាំងឡាយ៖

«ដោយសារហេតុផលនេះ ខ្ញុំចង់លើកទឹកចិត្តអ្នករាល់គ្នា ឱ្យបន្តលើកកម្ពស់​ផ្លូវ​វិញ្ញាណ​តាមរយៈពិធីអភិបូជា​ នៅតាមសហគមន៍កាតូលិកក្នុងស្រុករបស់អ្នក»។

សម្តេចប៉ាបបានពិពណ៌នាអំពីផ្លូវ​វិញ្ញាណនេះថា ជាវិធី​ដែលលើកកម្ពស់ឯកភាពនៃព្រះសហគមន៍ តាមរយៈសេចក្តីមេត្តាករុណាដែលហូរចេញពីអំណោយទានរបស់ព្រះអម្ចាស់ នៅក្នុងពិធីអរព្រះគុណ។

«វាគឺជាវិញ្ញាណនៃឯកភាពព្រះសហគមន៍ ដែលផ្អែកលើសេចក្តីស្រឡាញ់ មេត្តា ដែលហូរចេញពីអំណោយទាននៃព្រះអម្ចាស់របស់យើងនៅក្នុងពិធីអរព្រះគុណ»។

យោងតាមសម្តេចប៉ាប ឡេអូ ពិធី​អភិបូជាបាន​ជួយឲ្យ​ជីវិត​ព្រះសហគមន៍​ក្នុង​ស្រុក ក៏ដូចជា​តំបន់នៅអាស៊ី អាចធ្វើជាសាក្សីដល់ដំណឹងល្អកាន់តែ​ប្រសើរ​បន្ថែមទៀត។

«ខ្ញុំសង្ឃឹមថា ចំណងព្រះកាយព្រះគ្រីស្ត​ទាំងមូលដ្ឋាន​ និងរវាងសហគមន៍កាតូលិកក្នុងស្រុក នឹងត្រូវបានពង្រឹង ហើយក្លាយជាទីសំគាល់កាន់តែធំធេងនៃវត្តមានរបស់ព្រះជាម្ចាស់នៅក្នុងប្រទេសផ្សេងៗរបស់អ្នក ដែលជាថ្នូរនឹងជួយអ្នកឱ្យក្លាយជាអ្នកកសាងស្ពានជាមួយគ្នានៅទូទាំងតំបន់អាស៊ី»។

សម្តេចប៉ាបបានភ្ជាប់ទស្សនវិស័យនេះទៅនឹងប្រធានបទនៃមហាសន្និបាត FABC ដែលដកស្រង់ចេញពីបន្ទូលរបស់ព្រះយេស៊ូទៅកាន់លោក ណាថាណាអែល៖ «អ្នកនឹងបានឃើញការអស្ចារ្យលើសពីនេះ​ទៅទៀត»។ ទ្រង់មានបន្ទូលថា ព្រះគ្រីស្តមិនត្រឹមតែជាប្រភពនៃការរួមផ្សំគ្នារបស់មនុស្សជាតិជាមួយព្រះជាម្ចាស់ប៉ុណ្ណោះទេ ប៉ុន្តែទ្រង់ក៏ជាប្រភពទាក់ទង​រវាងយើង​និង​ព្រះអង្គ និង​យើង​និងអ្នកដទៃ​ផងដែរ។

សារលិខិតរបស់ទ្រង់បានឆ្លុះបញ្ចាំងពីប្រធានបទស្នូលមួយនៃសន្និបាតរយៈពេលមួយសប្តាហ៍នេះ ដែលប្រតិភូបានសញ្ជឹងគិតអំពីការប្រែចិត្ត​​គំនិតបែបស៊ីណូដាល និងការអនុវត្តស៊ីណូដាលស្តីពីភាពជាស៊ីណូដាល។ នៅរាល់ការជួបជុំគ្នា អ្នកចូលរួមបានសង្កត់ធ្ងន់ថា ការរួមផ្សំគ្នាកាន់តែរឹងមាំរវាងសហគមន៍កាតូលិកក្នុងស្រុក គឺជារឿងចាំបាច់ ប្រសិនបើព្រះសហគមន៍នៅអាស៊ីត្រូវបំពេញបេសកកម្មរបស់ខ្លួនជាអ្នកកសាងស្ពានមេត្រីភាព នៅក្នុងសង្គមដែលមានបក្សពួក វប្បធម៌ និងសាសនាចម្រុះ។

នៅចុងបញ្ចប់នៃសារលិខិត សម្តេចប៉ាប ឡេអូ បានផ្ញើមហាសន្និបាតនេះទៅក្រោមការជួយជ្រោមជ្រែងពីព្រះនាងម៉ារី ជាព្រះមាតានៃព្រះសហគមន៍ «មិត្តភក្តិជាទីស្រឡាញ់ ក្នុងការផ្ញើអ្នករាល់គ្នា និងការពិភាក្សារបស់អ្នកទៅព្រះនាងម៉ារី ជាព្រះមាតានៃព្រះសហគមន៍ ខ្ញុំសូមប្រសិទ្ធពរជ័យ និងប្រទានពរ​ដល់គ្រីស្តបរិស័ទ​ នូវអំណោយទាននៃប្រាជ្ញា និងភាពក្លាហានស៊ូទ្រាំពីព្រះអម្ចាស់ជូនចំពោះអ្នករាល់គ្នា»។

ទ្រង់បានបញ្ចប់ដោយការប្រទានពរ​ក្នុងនាមជា​គ្រីស្តទូត​ ជូនដល់អ្នកចូលរួមទាំងអស់នៅក្នុងមហាសន្និបាត៕