សហរដ្ឋអាមេរិកបានលើកឡើងពីភាពចាំបាច់នៃ “ការផ្លាស់ប្តូរ” បន្ទាប់ពីម៉ាឌូរ៉ូ នៅ វ៉េណេហ្ស៊ុអេឡា
ប្រមុខថ្មីនៃបេសកកម្មការទូតរបស់សហរដ្ឋអាម៉េរិកសម្រាប់វ៉េណេហ្ស៊ូអេឡា លោកស្រីឡូរ៉ា ដូហ្គូ បានលើកឡើងកាលពីថ្ងៃទី២ ខែកុម្ភៈ នៅអំឡុងជំនួបលើកទី១ របស់លោកស្រីជាមួយប្រធានាធិបតីស្តីទីវ៉េណេហ្ស៊ូអេឡា លោកស្រី ដេលស៊ី រ៉ូឌ្រីហ្គេ អំពីភាពចាំបាច់នៃការផ្លាស់ប្តូរនៅវ៉េណេហ្ស៊ូអេឡា បន្ទាប់ពីមួយខែនៃការចាប់ខ្លួនប្រធានាធិបតីវ៉េណេហ្ស៊ូអេឡា លោកនីកូឡា ម៉ាឌូរ៉ូ ដោយទាហានអាម៉េរិក។
នៅពេលមកដល់ទីក្រុងការ៉ាកាស លោកស្រីឡូរ៉ា ដូហ្គូ បានសរសេរនៅលើបណ្តាញសង្គម អ៊ិក X របស់លោកស្រីថា លោកស្រីបានជួបលោកស្រីដេលស៊ី រ៉ូឌ្រីហ្គេ និងលោក ហ្ស័ហ្ស រ៉ូឌ្រីហ្គេ ប្រធានសភាជាតិ ដើម្បីនិយាយម្តងទៀតអំពីដំណាក់កាលទាំងបី ដែលប្រមុខការទូតអាម៉េរិក លោកម៉ាកូ រូប៊ីយ៉ូ បានស្នើសម្រាប់វ៉េណេហ្ស៊ូអេឡា នោះគឺ ស្ថិរភាព ការចាប់ផ្តើមដំណើរការសេដ្ឋកិច្ច និងផ្សះផ្សារជាតិឡើងវិញ និងការផ្លាស់ប្តូរ (អន្តរកាលអំណាច)។
ទន្ទឹមពេលជាមួយគ្នាដែរ លោកស្រីដេលស៊ី រ៉ូឌ្រីហ្គេ បានតែងតាំងអតីតរដ្ឋមន្រ្តីកិច្ចការបរទេសលោកហ្វ៉េលីក ប្លាសង់ស្យា ជាប្រមុខបេសកកម្មការទូតនៅសហរដ្ឋអាម៉េរិក។ ការតែងតាំងលោកហ្វ៉េលីក ប្លាសង់ស្យា គឺជាការកត់សម្គាល់នូវរបត់នៅក្នុងទំនាក់ទំនងរវាងទីក្រុងវ៉ាស៊ីនតុន និងទីក្រុងការ៉ាកាស។ ទំនាក់ទំនងនេះត្រូវបានកាត់ផ្តាច់នៅឆ្នាំ២០១៩ នៅពេលសហរដ្ឋអាម៉េរិក ក្រោមអណត្តិលើកទី១ នៃប្រធានាធិបតីអាម៉េរិក លោកដូណាល់ ត្រាំ បានតវ៉ាអំពីការជាប់ឆ្នោតម្តងទៀតរបស់ប្រធានាធិបតីលោកនីកូឡា ម៉ាឌូរ៉ូ និងបានជ្រើសរើសទទួលស្គាល់ជំនួសវិញនូវរដ្ឋាភិបាលស្របគ្នា(parallèle) ដែលដឹកនាំដោយបក្សប្រឆាំង លោក ហ្ស័ន ហ្គៃដូ។
លោកអ៊ីវ៉ាន់ ហ្ស៊ីល រដ្ឋមន្រ្តីការបរទេសវ៉េណេហ្ស៊ូអេឡា បានបញ្ជាក់ថា ៖ “ការចាប់ដំណើរការ ទាំងតំណាងការទូតរបស់រដ្ឋាភិបាលសហរដ្ឋអាមេរិកនៅវ៉េណេហ្ស៊ូអេឡា ដែលនឹងដឹកនាំដោយលោកស្រីឡូរ៉ា ដូហ្គូ និងទាំងតំណាងការទូតរបស់យើងនៅវ៉ាស៊ីនតោន នឹងប្រព្រឹត្តទៅក្នុងរយៈពេលពីរបីថ្ងៃខាងមុខនេះ។ លោកអ៊ីវ៉ាន់ ហ្ស៊ីល បានបន្តថា រដ្ឋាភិបាលវ៉េណេហ្ស៊ូអេឡា បានបញ្ជាក់អំពីភាពចាំបាច់នៃការស្ថាបនារបៀបវារៈក្នុងន័យស្ថាបនា សន្តិភាព ការគោរព និងរបៀបវារៈដែលស្របតាមយ៉ាងល្អឥតខ្ចោះទៅនឹងគោលការណ៍នៃច្បាប់អន្តរជាតិដើម្បីយើងអាចកំណត់ទិសដៅម៉ឺងម៉ាត់លើទំនាក់ទំនងរវាងសហរដ្ឋអាម៉េរិក និងវ៉េណេហ្ស៊ូអេឡា និងឆ្ពោះទៅកាន់ផ្លូវនៃសុភមង្គល់សម្រាប់ប្រជាជននៃប្រទេសទាំងពីរ។
លោកអ៊ីវ៉ាន់ ហ្ស៊ីល ក៏បានអំពាវនាវនៅក្នុងបំណងប្រាថ្នារបស់លោកឲ្យមានការដកទណ្ឌកម្មសេដ្ឋកិច្ចរបស់អាម៉េរិកនៅក្នុងក្របខណ្ឌការទូត។
ចំណែកប្រមុខបក្សប្រឆាំងវ៉េណេហ្ស៊ូអេឡា លោកស្រីម៉ារីយ៉ា កូរីណា ម៉ាចាដូ ពានរង្វាន់ណូបែលសន្តិភាព ក៏បានប្រើពាក្យ ផ្លាស់ប្តូរ ដោយលើកឡើងអំពីលទ្ធភាពនៃជំនួបជាមួយលោកស្រីដេលស៊ី រ៉ូឌ្រីហ្គេផងដែរ។ យោងតាមសារចម្លងនៃជំនួបជាមួយសារព័ត៌មានកូឡុំប៊ី ដែលបានផ្សាយជាសាធារណៈ លោកស្រី ម៉ារីយ៉ា កូរីណា ម៉ាចាដូ បានបញ្ជាក់ថា វានឹងមានការចាំបាច់ដើម្បីផ្លាស់ប្តូរយោបល់ក្នុងអំឡុងជំនួបមួយដើម្បីកំណត់បរិច្ឆេទក្នុងការផ្លាស់ប្តូរអំណាច ដែលរឿងនេះនឹងត្រូវធ្វើ។ លោកស្រីបានបន្ថែមថា ប៉ុន្តែរដ្ឋាភិបាលបណ្តោះអាសន្នរបស់លោកស្រីដេលស៊ី រ៉ូឌ្រីហ្គ៉េ នៅតែជាម៉ាហ្វីយ៉ា។
នៅខណៈដែលលោកដូណាល់ ត្រាំ ធ្វើឲ្យមានភាពធម្មតានូវទំនាក់ទំនងរបស់លោកជាមួយរដ្ឋអំណាចវ៉េណេហ្ស៊ូអេឡា បន្ទាប់ពីអាម៉េរិកចាប់ខ្លួនលោកប្រធានាធិបតីម៉ាឌូរ៉ូ និងភរិយានៅអំឡុងប្រតិបត្តិការយោធាដ៏អស្ចារ្យមួយនៅទីក្រុងការ៉ាកាស តួនាទីដែលបានកំណត់សម្រាប់លោកស្រីម៉ារីយ៉ា កូរីណា ម៉ាចាដូ នៅក្នុងទិដ្ឋភាពអនាគតនយោបាយនៃប្រទេសវ៉េណេហ្ស៊ូអេឡា នៅតែដឹងមិនពិតប្រាកដ។
Daily Program
