លោក ស៊ុន ចន្ទី ប្រធានគណបក្សកម្លាំងជាតិ ត្រូវបាន​សមត្ថកិច្ចឃាត់ខ្លួន​

លោក ស៊ុន ចន្ទី អាយុ ៤៤ឆ្នាំ ដែលជា​ប្រធានគណបក្សកម្លាំងជាតិ ត្រូវ​បាន​កម្លាំងសមត្ថកិច្ច​ចាប់ឃាត់ខ្លួន​ នាព្រឹក​ថ្ងៃទី​៩ ខែឧសភា ឆ្នាំ​២០២៤ ​នៅអាកាសយានដ្ឋានអន្តរជាតិភ្នំពេញ តាមអនុវត្ត​ដីកាបញ្ជាឱ្យចូលខ្លួន ចុះថ្ងៃទី០៧ ខែឧសភា ឆ្នាំ២០២៤។

អ្នកនាំពាក្យនៃស្នងការដា្ឋននគរបាលរាជធានីភ្នំពេញ លោក សំ វិច្ឆិកា បានឱ្យដឹងតាមរយៈ​សេចក្តីប្រកាសព័ត៌មាន​ថា ​ករណីឃាត់ខ្លួនឈ្មោះ ស៊ុន ចន្ទី សមត្ថកិច្ចអនុវត្តដោយទទួលបានការអនុញ្ញាតពីតំណាងអយ្យការ អមសាលាដំបូងរាជធានីភ្នំពេញ ចេញដីកាបញ្ជាឱ្យចូលខ្លួន ពាក់ព័ន្ធសំណុំរឿង ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។

លោកបានបញ្ជាក់ថា ៖ «នៅវេលាម៉ោង ០៩:០០នាទី ថ្ងៃទី០៩ ខែឧសភា ឆ្នាំ២០២៤ សមត្ថកិច្ចបានឃាត់ខ្លួនជនសង្ស័យឈ្មោះ ស៊ុន ចន្ទី ភេទប្រុស អាយុ ៤៤ឆ្នាំ ប្រធានគណបក្សកម្លាំងជាតិ នៅអាកាសយានដ្ឋានអន្តរជាតិភ្នំពេញ ដែលបានប្រព្រឹត្តតាមរយៈបង្ហោះផ្សព្វផ្សាយ ព័​ត៌មានលើបណ្តាញសង្គម ក្នុងចេតនាញុះញង់បំភ្លឺព័ត៌មានមិនពិត នាំឱ្យប្រជាពលរដ្ឋមានការយល់ច្រឡំបង្កឱ្យ មានភាពវឹកវរក្នុងសង្គម»​។

បច្ចុប្បន្ន សមត្ថកិច្ចជំនាញកំពុងបន្តនីតិវិធី កសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញ។​​​

ទាក់ទងនឹង​ករណីនេះដែរ លោក ទូច សុខៈ អ្នកនាំពាក្យរងនៃក្រសួង​មហាផ្ទៃ បានថ្លែងប្រាប់ឱ្យដឹងនៅថ្ងៃទី​៩ ខែឧសភា នេះថា ការលើកឡើង​របស់​អ្នកវិភាគ ឬ​គណបក្សនយោបាយណាមួយ​ថាការចាប់ខ្លួន​របស់សកម្មជននយោបាយ​ថ្នាក់ដឹកគណបក្សនយោបាយ​ សុទ្ធតែជារឿងនយោបាយនោះ គឺវាមិនមាន​លក្ខណៈវិទ្យាសាស្រ្តទេ។

លោកបាន​បន្តថា តែនេះជាទំលាប់​របស់​ពួកគាត់ហើយដែលតែងតែ​ភ្ជាប់ករណីព្រហ្មទណ្ឌទៅជារឿងនយោបាយ​ដើម្បី​សម្រាលនូវ​ស្ថានការណ៍ ហើយដាក់បន្ទុកស្ថានការណ៍មកលើកម្ពុជា ជាដើម។

លោក ទូច សុខៈ បានបញ្ជាក់ថា ៖ «យើងត្រូវ​បែងចែក​ឱ្យដាច់​រវាង​​នយោបាយ និង​បទល្មើសព្រហ្មទណ្ឌ បើសកម្មភាព​ បើអំពើ​របស់​អ្នកនរណាម្នាក់ចូលបទល្មើសព្រហ្មទណ្ឌគឺគេត្រូវ​អនុវត្តទៅតាម​នីតិវិធី ហើយនឹងច្បាប់ព្រហ្មទណ្ឌហើយ»៕