រដូវអប់រំពិសេស និង បុណ្យរ៉ាម៉ាដាន ជាកាតាលីករសម្រាប់ពិភពលោកថ្មីមួយ

នៅក្នុងសារផ្ញើជូនបងប្អូនសាសនិកឥស្លាមពាក់ព័ន្ធនឹងបុណ្យ រ៉ាម៉ាដាន ក្រុមប្រឹក្សាសម្រាប់កិច្ចសន្ទនាអន្តរសាសនាបានគូសបញ្ជាក់ពីការត្រួតស៊ីគ្នានៃព្រឹត្តិការណ៍នេះនឹងរដូវអប់រំពិសេសនៃព្រះសហគមន៍កាតូលិក។

តាមរយៈវ៉ាទីកង់ សារនោះបានអះអាងថា ឱកាសដ៏កម្រនេះ បង្ហាញនូវក្តីសង្ឃឹមថារយៈពេលដ៏ពិសិដ្ឋទាំងពីរអាច ក្លាយជាកាតាលីករសម្រាប់ពិភពលោកថ្មីមួយ ជាពិសេសនៅក្នុងតំបន់ដែលមានជម្លោះនិងសង្រ្គាម រិះគិតអំពីតម្លៃនៃសន្តិភាព។

សារដែលចុះហត្ថលេខារួមគ្នាដោយលោក កាឌីណាល់ ចច ចាកូប គូវ៉ាកាដ  ( George Jacob Koovakad) បានបញ្ជាក់ថា​ នោះគឺសាររបស់ក្រុមប្រឹក្សាសម្រាប់កិច្ចសន្ទនាអន្តរសាសនាសម្រាប់បុណ្យរ៉ាម៉ាដាន។  

លោកកាឌីណាល់បានលើកឡើងថា សន្តិភាព ជាបំណងប្រាថ្នាដ៏ក្លៀវក្លារបស់មនុស្សជាតិ សម្រាប់អ្នករាល់គ្នាជាពិសេស សម្រាប់គ្រួសាររបស់អ្នក និងសម្រាប់ប្រជាជាតិដែលកំពុងតែរងគ្រោះ។

លោកកាឌីណាល់បានសង្កត់ធ្ងន់ថា សន្តិភាពកើតចេញពី ការរំសាយអាវុធដោយ បេះដូង ចិត្ត និងជីវិត ហើយវាជាអំណោយមួយពីព្រះដែលត្រូវបានចិញ្ចឹមបីបាច់ដោយការសន្ទនា យុត្តិធម៌ និងសេចក្តីស្រឡាញ់ប្រកបដោយការអត់ឱន៕