ស៊ីរ៉ែនប្រកាសអាសន្ន បានបន្លឺសម្លេងនៅទីក្រុងអាមម៉ាន់ រដ្ឋធានីនៃប្រទេសហ្ស៉កដានី កាលពីថ្ងៃចន្ទ ទី២០ ខែកក្កដា ហើយកងទ័ពហ្ស៉កដានី បានប្រកាសថា ពួកគេបានបាញ់ទម្លាក់មីស៊ីលអ៊ីរ៉ង់ចំនួនបីគ្រឿង។
បើយោងតាមទូរទស្សន៍រដ្ឋអ៊ីរ៉ង់បានឲ្យដឹងថា ទីក្រុងតេអេរ៉ង់បានបាញ់មីស៊ីលក្នុងដំណាក់កាលថ្មី ដែលសំដៅវាយប្រហារលើយន្តហោះរបស់កងទ័ពអាមេរិក នៅអាកាសយានដ្ឋាន អាកាប៉ា ភាគខាងត្បូងប្រទេសហ្ស៉កដានី និងបង្កឲ្យមានការខូចខាតយ៉ាងធ្ងន់ធ្ងរលើយន្តហោះជាច្រើន។
យោងតាមអ្នកជំនាញនានាបានឲ្យដឹងថា ការបង្កើនជាច្រើនដងនៃការបាញ់ប្រហាររបស់អ៊ីរ៉ង់ មកលើដែនដីនៃនៃព្រះរាជាណាចក្រ ហាចេមីត (ហ្ស៉កដានី) គឺជាការឆ្លើយតបចំពោះការពង្រឹងតួនាទីរបស់កងទ័ពអាម៉េរិកនៅទីនោះ។
លោកអេម៉ានូអែល ឌុយពួយ ដែលជាប្រធានវិទ្យាស្ថានទស្សនវិស័យ និងសន្តិសុខនៅអឺរ៉ុប (IPSE) វិភាគថា ៖ “យើងកំពុងឃើញមានការកើនឡើងនៃអំណាច និងវត្តមានរបស់អាម៉េរិកនៅប្រទេសហ្ស៉កដានី”។ “វាមានភាពឡូហ្ស៉ិកដោយគិតថា អ៊ីរ៉ង់ចង់វាយប្រហារឲ្យកាន់តែធ្ងន់ធ្ងរលើមូលដ្ឋាននានានៅទីណាដែលវត្តមានរបស់អាម៉េរិកបានពង្រឹងឡើងចាប់តាំងពីថ្ងៃទី២៨ ខែកុម្ភៈ។ ដូច្នេះប្រទេសហ្ស៉កដានីបានក្លាយជាផ្ទាំងស៊ីបនៅក្នុងជម្រើស។
ទាហានអាម៉េរិកប្រមាណ ៤០០០នាក់ ត្រូវបានដាក់ពង្រាយនៅលើទឹកដីប្រទសហ្ស៉កដានី ដែលនេះបានក្លាយជាកងទ័ពបរទេសដែលមានច្រើនបំផុតនៅក្នុងប្រទេសនេះ។
នៅឆ្នាំ២០២១ ព្រះមហាក្សត្រហ្ស៉កដានី អាបដាឡាហ៍ ទី២ បានចុះហត្ថលេខាលើកិច្ចព្រមព្រៀងការពារជាតិ ដោយរំលងការបោះឆ្នោតរបស់សភា ដែលផ្តល់ឲ្យកងទ័ពអាម៉េរិកអាចចូលប្រើប្រាស់មូលដ្ឋានយោធាហ្ស៉កដានីជាច្រើនកន្លែង ដោយគ្មានឧបសគ្គ។
ដោយមិនមានប្រេងឥន្ធនៈដែលធ្វើឲ្យមានបាន ដូចជាប្រទេសជិតខាងនៅឈូងសមុទ្រ ប្រទេសហ្ស៉កដានីរស់នៅក្រោមជំនួយអាមេរិក។ ជំនួយពីទីក្រុងវ៉ាស៊ីនតោន ដែលបានចាប់ផ្តើមតាំងពីទសវត្សរ៍ ឆ្នាំ១៩៥០ បានកើនឡើងបីដងក្នុងរយៈពេល ១៥ឆ្នាំ។ ជាមួយនឹងទឹកប្រាក់ ១,៤៥ពាន់លានដុល្លារ ដែលទទួលបាននៅក្នុងឆ្នាំ២០២៥ ប្រទេសហ្ស៉កដានី បានក្លាយជាកូនបំណុលធំជាងគេមួយរបស់សហរដ្ឋអាម៉េរិកនៅលើផែនដី។
លោកស្រី រ៉ាជីដា ចាហ៊ីដា អាបាសា អ្នកស្រាវជ្រាវឯករាជ្យ ឯកទេសខាងនយោបាយអាម៉េរិកនៅមជ្ឈិមបូព៌ា បានវិភាគថា ៖ “ទីក្រុងតេអេរ៉ង់ កំពុងខិតខំប្រឹងប្រែងបំផ្លាញស្ថិរភាពនៃរាជាណាចក្រហ្ស៉កដានី ដែលគេមើលឃើញថា ប្រទេសនេះគឺជាឧបករណ៍របស់អ៊ីស្រាអែល និងអាម៉េរិក។” លោកស្រីអ្នកសិក្សាស្រាវជ្រាវបង្ហាញថា ៖ “ប្រទេសហ្ស៉កដានីគឺជាប្រទេសតែមួយគត់នៅក្នុងពិភពអារ៉ាបដែលបានប្រកាសជាសាធារណៈថា គេបានចាប់មីស៊ីលរបស់អ៊ីរ៉ង់ដែលបាញ់សំដៅទៅអ៊ីស្រាអែល”។
ប្រទេសជិតខាងទាំងពីក៏មានទំនាក់ទំនងគ្នាតាមរយៈធនធានជាអាយុជីវិត។ សម្រាប់ទឹក អ៊ីស្រាអែល បានផ្គត់ផ្គង់ ៥០លានម៉ែត្រគូប ក្នុងមួយឆ្នាំទៅឲ្យហ្ស៉កដានី តាមកិច្ចព្រមព្រៀងសន្តិភាព នៅឆ្នាំ១៩៩៤ ដែលជាឆ្នាំដែលព្រះមហាក្សត្រ ហូសសេន បិតារបស់ក្សត្របច្ចុប្បន្ន បានក្លាយជាមេដឹកនាំរដ្ឋអារ៉ាប់ ទី២ បន្ទាប់ពីអេហ្ស៊ីប ដែលបានទទួលស្គាល់រដ្ឋអ៊ីស្រាអែល។
បរិមាណទឹកបានកើនជាង ២ដងនៅឆ្នាំ២០២១ ប៉ុន្តែកិច្ចព្រមព្រៀងបន្ថែម បានផុតកំណត់នៅចុងឆ្នាំ២០២៥ ហើយអ៊ីស្រាអែលបានដាក់លក្ខខណ្ឌថា ការបន្តផ្គត់ផ្គង់ទឹកនឹងអាស្រ័យលើការកាត់បន្ថយការរិះគន់របស់ហ្ស៉កដានី ចំពោះនយោបាយអ៊ីស្រាអែល។
Daily Program
