មន្រ្តីជាន់ខ្ពស់វ៉ាទីកង់! សង្គ្រាមមិនអាចបង្កាគ្រោះថ្នាក់ដល់ពិភពលោកបានទេ

លោកកាឌីណាល់ ព្យែត្រូ ផារ៉ូលីន នាយករដ្ឋមន្រ្តីនៃសន្តអាសនៈបានថ្លែងទៅកាន់ វាទីកង់ញូវថា សង្រ្គាមមិនអាចបង្ការគ្រោះថ្នាក់ដល់ពិភពលោកបានទេ ខណៈដែលគ្រោះមហន្តរាយនៅមជ្ឈិមបូព៌ាកាន់តែធំ។

លោកកាឌីណាល់ បានលើកឡើងថា ការរិចរិលនៃច្បាប់អន្តរជាតិនេះពិតជាគួរឱ្យព្រួយបារម្ភណាស់ ខណៈ យុត្តិធម៌មិនគួរត្រូវផ្តល់ផ្លូវដល់កម្លាំង ហើយកម្លាំងច្បាប់មិនត្រូវបានជំនួសដោយច្បាប់នៃកម្លាំងនោះឡើយ។

នៅក្នុងបទសម្ភាសន៍នោះ លោកកាឌីណាល់បានសម្តែងការព្រួយបារម្ភថា ពហុប៉ូលនិយម ដែលសម្គាល់ដោយអាទិភាពនៃអំណាច និងការពឹងផ្អែកលើខ្លួនឯង កំពុងកើតឡើងយ៉ាងគ្រោះថ្នាក់។

លោកកាឌីណាល់បានលើកឡើងថា ប្រជាជននៅមជ្ឈិមបូព៌ា រួមទាំងសហគមន៍គ្រីស្តសាសនាគឺពួកគេស្ថិតនៅក្នុងស្ថានភាពដែលផុយស្រួយរួចទៅហើយ ឥឡូវនេះ ត្រូវបានបន្តធ្លាក់ចូលទៅក្នុងភាពភ័យរន្ធត់នៃសង្គ្រាមម្តងទៀត ដែលបំផ្លាញជីវិតមនុស្សយ៉ាងឃោរឃៅ។

លោកកាឌីណាល់បានលើកឡើងថា លោកមានជំនឿ ថាសន្តិភាព និងសន្តិសុខត្រូវតែត្រូវបានបណ្ដុះ និងបន្តតាមរយៈលទ្ធភាពដែលផ្តល់ដោយការទូត ជាពិសេសការទូតដែលអនុវត្តនៅក្នុងស្ថាប័នពហុភាគី ដែលរដ្ឋនានាមានលទ្ធភាពដោះស្រាយជម្លោះតាមរបៀបដែលគ្មានការបង្ហូរឈាម និងយុត្តិធម៌។

លោកបានបន្តថា សព្វថ្ងៃនេះ កិច្ចខិតខំប្រឹងប្រែងទាំងនោះហាក់ដូចជាត្រូវបានលុបចោល។ មិនត្រឹមតែប៉ុណ្ណោះទេ ដូចដែលសម្តេចប៉ាបបានរំលឹកដល់ក្រុមអ្នកការទូតនៅដើមឆ្នាំនេះថា ការទូតដែលលើកកម្ពស់ការសន្ទនា និងស្វែងរកការឯកភាពគ្នាក្នុងចំណោមមនុស្សទាំងអស់ កំពុងត្រូវបានជំនួសដោយការទូតនៃកម្លាំងនៃបុគ្គល ឬក្រុមសម្ព័ន្ធមិត្ត ហើយមនុស្សគិតថាសន្តិភាពអាចត្រូវបានបន្តតាមរយៈអាវុធ។

លោកបានបន្ថែមទៀតថា នៅពេលនិយាយអំពីមូលហេតុនៃសង្គ្រាម វាស្មុគស្មាញក្នុងការកំណត់ថាអ្នកណាត្រូវ និងអ្នកណាខុស។ ទោះជាយ៉ាងណាក៏ដោយ អ្វីដែលប្រាកដនោះគឺថា សង្គ្រាមនឹងបង្កើតជនរងគ្រោះ និងការបំផ្លិចបំផ្លាញក៏ដូចជាផលប៉ះពាល់ដ៏បំផ្លិចបំផ្លាញលើជនស៊ីវិល៕