ស្ថានភាពនៃជីវភាពរស់នៅប្រចាំថ្ងៃក្នុងប្រទេសនេប៉ាល់កំពុងវិលមករកភាពប្រក្រតីវិញបន្តិចម្ដងៗ បន្ទាប់ពីរលកនៃការតវ៉ាដ៏ហិង្សាកាលពីដើមខែនេះបានកើតឡើង។
សាលារៀន រួមទាំងមណ្ឌលសកម្មភាពព្រះសហគមន៍កាតូលិកនានាបានបើកដំណើរការឡើងវិញ ប៉ុន្តែផ្លូវនៅមានភាពស្ងប់ស្ងាត់ នៅពេលដែលប្រទេសនេះសម្របខ្លួនទៅនឹងការដឹកនាំរបស់នាយករដ្ឋមន្ត្រីថ្មី ស៊ូស៊ីឡា កាគី (Sushila Karki)ដែលត្រូវបានគេរំពឹងថានឹងដឹកនាំរដ្ឋាភិបាលអន្តរកាលរយៈពេល៦ខែមុនការបោះឆ្នោតនៅឆ្នាំក្រោយ។
ថ្លែងទៅកាន់ទីភ្នាក់ងារព័ត៌មាន ហ្វីដេស លោកបូជាចារ្យ សិលាស បូហ្គាទី (Silas Bogati) អ្នកគ្រប់គ្រងរដ្ឋបាលភូមិភាគនៃព្រះសហគមន៍កាតូលិកនៅ ប្រទេសនេប៉ាល់ បាននិយាយថា ព្រះសហគមន៍កាតូលិកដាក់ការជឿទុកចិត្តរបស់ខ្លួនលើនាយករដ្ឋមន្ត្រីថ្មី។
លោកបានអះអាងថា ពួកយើងជាព្រះសហគមន៍កាតូលិក ក៏មានទំនុកចិត្តលើលោកស្រី ស៊ូស៊ីឡា កាគី ដែលកាលពីមុន លោកស្រីគឺជាចៅក្រមដែលធ្លាប់បានការពារបូជាចារ្យរបស់យើង និងបងស្រីសាសនទូតមួយចំនួនដែលត្រូវបានចោទប្រកាន់ខុសក្នុងសំណុំរឿងតុលាការជាច្រើន។
លោកបូជាចារ្យមានប្រសាសន៍ថា យើងជឿជាក់លើការងាររបស់លោកស្រីក្នុងរយៈពេលប៉ុន្មានខែខាងមុខនេះ ដើម្បីធ្វើសកម្មភាពស្របតាមនីតិរដ្ឋ និងគោលការណ៍លទ្ធិប្រជាធិបតេយ្យ។
ប៉ុន្តែទោះបីជាយ៉ាងណាលោកបូជាចារ្យបានទទួលស្គាល់ថា ប្រទេសនេះនៅតែស្ថិតក្នុងស្ថានភាពមិនច្បាស់លាស់ ប៉ុន្តែ លោកបានសង្កត់ធ្ងន់ថា ជំហររបស់ព្រះសហគមន៍កាតូលិកនៅប្រទេសនេប៉ាល់គឺច្បាស់ណាស់ គឺ យើងនិយាយថា "ទេ" ចំពោះទម្រង់នៃអំពើហិង្សាណាមួយ ហើយធ្វើការដើម្បីការអភិវឌ្ឍន៍ដោយសន្តិវិធី។ យើងក៏សង្ឃឹមថានឹងមានរដ្ឋាភិបាលល្អដែលអាចប្រយុទ្ធប្រឆាំងនឹងគ្រោះមហន្តរាយដែលប៉ះពាល់ដល់ប្រទេសគឺអំពើពុករលួយ។
នេប៉ាល់មានប្រជាពលរដ្ឋប្រមាណជា ៣៣ លាននាក់ ប៉ុន្តែកាតូលិកមានប្រមាណជា ៨០០០ នាក់ប៉ុណ្ណោះ៕
Daily Program
