តុលាការឥណ្ឌាគាំពារសិទ្ធិស្ត្រីពេញវ័យក្នុងការចូលរួមក្នុងជីវិតសាសនា

តុលាការឥណ្ឌាថ្មីៗនេះបានសម្រេចចេញសាលក្រមថា ការមិនពេញចិត្តរបស់ឪពុកម្តាយចំពោះការសម្រេចចិត្តរបស់កូនស្រីពេញវ័យក្នុងការចូលរួមសកម្មភាពសាសនាណាមួយគឺជារឿងមិនត្រឹមត្រូវ នេះបើយោងតាមការចុះផ្សាយរបស់ សារព័ត៌មាន Catholic Connect។

តាមការសម្រេចដោយ តុលាការជាន់ខ្ពស់នៅរដ្ឋកេរ៉ាឡា( Kerala) ភាគខាងត្បូងប្រទេសឥណ្ឌា បានច្រានចោលញត្តិដែលដាក់ដោយឪពុកម្តាយបីគ្រួសារ ដែលបានចោទប្រកាន់ថាកូនស្រីរបស់ពួកគេត្រូវបានឃុំខ្លួនដោយខុសច្បាប់ដោយដូនជីនៅក្នុងព្រះសហគមន៍មួយ។

តុលាការបានសម្រេចថា ជម្រើសរបស់បុគ្គលម្នាក់ៗទាក់ទងនឹងជំនឿ និងសមាគមសាសនាស្ថិតនៅក្នុងដែនឯកជនយ៉ាងរឹងមាំរបស់បុគ្គល ហើយត្រូវបានការពារសេរីភាពដូចដែលបញ្ជាក់នៅក្នុងរដ្ឋធម្មនុញ្ញ។ មិនតែប៉ុណ្ណោះ តុលាការក៏បានព្រមានថា ការជ្រៀតជ្រែកក្នុងបញ្ហាបែបនេះអាចមានឥទ្ធិពលគួរឱ្យភ័យខ្លាចលើសេរីភាពផ្ទាល់ខ្លួនបុគ្គល។

តុលាការបានកត់សម្គាល់ថា ការមិនពេញចិត្តរបស់ឪពុកម្តាយចំពោះកូនស្រីពេញវ័យដែលជ្រើសរើសជម្រើសនៃជីវិតនិងសាសនា មិនអាចឲ្យឪពុកម្តាយឫអាណាព្យាបាលយកធ្វើជាមូលដ្ឋានសម្រាប់អន្តរាគមន៍ផ្នែកច្បាប់បានឡើយ។

នេះគឺជាការសម្រេចផ្នែកច្បាប់មួយ ក្រោយពេលដែលតុលាការ មិនបានរកឃើញភស្តុតាងណាមួយដើម្បីគាំទ្រការចោទប្រកាន់អំពីការឃុំខ្លួនខុសច្បាប់ ឬឥទ្ធិពលមិនត្រឹមត្រូវដែលឪពុកម្តាយស្រ្តីបីរូបបានចោទប្រកាន់នោះឡើយ ។

ដោយបញ្ជាក់ជាថ្មីនូវគោលការណ៍ច្បាប់ដែលបានបង្កើតឡើង តុលាការបាននិយាយថា សាលក្រម នេះគឺជាចម្លើយ មិនធម្មតាមួយដែលគួរតែត្រូវបានលើកឡើងដោយ មានភស្តុតាងច្បាស់លាស់ ហើយ ក្នុងករណីដែលពាក់ព័ន្ធនឹងមនុស្សពេញវ័យ តុលាការត្រូវតែប្រុងប្រយ័ត្ន និងគោរពស្វ័យភាពបុគ្គល ជាពិសេសនៅក្នុងបញ្ហាដែលប៉ះពាល់ដល់សិទ្ធិជាមូលដ្ឋានរបស់មនុស្ស ។

ការស៊ើបអង្កេតរបស់ប៉ូលីសដែលដកស្រង់ដោយតុលាការបានបញ្ជាក់ថា ស្ត្រីទាំងនោះបានជ្រើសរើសដោយស្ម័គ្រចិត្ត ជាមួយនឹងសណ្តាប់ធ្នាប់តាមផ្លូវសាសនាដែលពួកនាងស្ម័គ្រចិត្ត។ សេចក្តីថ្លែងការណ៍ដែលបានកត់ត្រារបស់ពួកគេបានបញ្ជាក់ថា ការសម្រេចចិត្តរបស់ពួកគេត្រូវបានធ្វើឡើងដោយសេរី និងដោយគ្មានការបង្ខិតបង្ខំ។