សភាលោកអភិបាលព្រះសហគមន៍កាតូលិកហ្វីលីពីន បានជំរុញឱ្យគ្រីស្តបរិស័នៅភូមិភាគទាំងអស់ទូទាំងប្រទេសឲ្យរៀបចំអធិស្ឋានសម្រាប់សន្តិភាពពិភពលោកនៅថ្ងៃទី១១ ខែមេសា ឆ្នាំ ២០២៦ ដើម្បីឆ្លើយតបទៅនឹងការអំពាវនាវរបស់សម្តេចប៉ាបឡេអូទី១៤។
លោកអភិបាល ជីលបឺត ហ្គាសេរ៉ា (Gilbert A. Garcera) ប្រធានក្រុមអន្តរសភាលោកអភិបាលព្រះសហគមន៍កាតូលិកហ្វីលីពីនបានចេញប្រកាសមួយ ចុះថ្ងៃទី៧ ខែមេសា ដោយអំពាវនាវដល់លោកអភិបាល លោកបូជាចារ្យ និង គ្រីស្តបរិស័ទទាំងអស់នាំគ្នា ចូលរួមក្នុងគំនិតផ្តួចផ្តើម ដែលស្របគ្នានឹងការអញ្ជើញរបស់សម្តេចប៉ាបឡេអូ។
លោកអភិបាលបានសរសេរថា នៅក្នុងនាមព្រះសហគមន៍ យើងលើកទឹកចិត្តដោយការគោរពដល់ភូមិភាគទាំងអស់ឱ្យរៀបចំកម្មវិធី អធិស្ឋាននៅថ្ងៃទី ១១ ខែមេសា ដើម្បីរិះគិតអំពីសន្តិភាព។
ពាក់ព័ន្ធនឹងកម្មវិធីនេះ ថ្នាក់ដឹកនាំព្រះសហគមន៍ទាំងអស់ បានសង្កត់ធ្ងន់ថា សកម្មភាពរួមគ្នានៃការអធិស្ឋាននៅពេលខាងមុខនេះនឹងមិនត្រឹមតែជាការបង្ហាញពីសាមគ្គីភាពជាមួយសម្តេចប៉ាបប៉ុណ្ណោះទេ ប៉ុន្តែក៏ជាសាក្សីចំពោះក្តីសង្ឃឹមរួមថា សន្តិភាពដែលចាក់ឫសក្នុងព្រះគ្រីស្ទអាចនឹងមាននៅក្នុងចិត្តមនុស្សជាតិទាំងអស់ រួមទាំងហ្វីលីពីនផងដែរ៕
Daily Program
