ការប៉ះទង្គិចគ្នានៅតាមព្រំដែនជាមួយប្រទេសថៃកាលពីឆ្នាំ២០២៥ បានបន្សល់ទុកនូវគ្រាប់មិនទាន់ផ្ទុះបន្ថែមទៀត ដែលជំរុញឱ្យមានការចុះស្ទង់មតិស្វែងរកហានិភ័យនៃគ្រាប់មីន គ្របដណ្តប់លើផ្ទៃដីជិត ៣៨៧.២០៦ហិកតា ស្ថិតក្នុងខេត្តជាប់ព្រំដែនចំនួន៦ រួមមាន ខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ និងខេត្តកោះកុង។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានរាយការណ៍ពីតួលេខទាំងនេះ ក្នុងកិច្ចប្រជុំបូកសរុបលទ្ធផលការងារពាក់កណ្តាលឆ្នាំ កាលពីថ្ងៃព្រហស្បតិ៍ នាសារមន្ទីរសន្តិភាពតេជោ ក្នុងខេត្តសៀមរាប។ ឯកឧត្តមបានកត់សម្គាល់ថា ជាលទ្ធផល ក្រុមការងារស្ទង់មតិមូលដ្ឋាន (Baseline Survey) បានចុះធ្វើការស្ទង់មតិនៅក្នុងភូមិដែលរងផលប៉ះពាល់ចំនួន ៣៣៥ ក្នុងចំណោម ៣៤៩ភូមិ ដោយគ្របដណ្តប់លើផ្ទៃដីរងផលប៉ះពាល់សរុបជិត ៣៨៧.២០៦ហិកតា។
លោកបានបន្ថែមថា ក្នុងអំឡុងពេលនេះ ដើម្បីគាំទ្រដល់ប្រជាពលរដ្ឋដែលត្រឡប់មកលំនៅឋានវិញ ទីបញ្ជាការស៊ីម៉ាក់សម្រេចបាននូវការងារអាទិភាព ក្នុងការបោសសម្អាតដីសម្រាប់សាងសង់ផ្ទះចំនួន ៥.៩១១ខ្នង (ជិត ១.៤៥៥ហិកតា) ដីសាលារៀនចំនួន ៨៧កន្លែង (១៥៤ហិកតា) មណ្ឌលសុខភាពចំនួន ២០កន្លែង វត្តអារាមចំនួន ៦កន្លែង និងគម្រោងហេដ្ឋារចនាសម្ព័ន្ធស៊ីវិលដទៃទៀតចំនួន ១១៤។
លោកបានគូសបញ្ជាក់ថា ប្រតិបត្តិការរបស់អង្គភាពស៊ីម៉ាក់ ស្វែងរកឃើញ និងបំផ្លាញចោលនូវគ្រាប់យុទ្ធភណ្ឌមិនទាន់ផ្ទុះបានជាង ៨.៤០០គ្រាប់ ដែលក្នុងនោះរួមមានគ្រាប់បែកចង្កោមចំនួន ៤.៤៣៦គ្រាប់។
ទន្ទឹមនឹងនេះដែរ ជំនាញការស៊ីម៉ាក់ក៏បានបើកវគ្គអប់រំផ្សព្វផ្សាយពីការយល់ដឹងអំពីគ្រោះថ្នាក់ដោយសារមីនចំនួន ១៤.៤៧៧លើក ដល់ប្រជាពលរដ្ឋជាង ១,៣លាននាក់ផងដែរ។
សូមបញ្ជាក់ថា ប្រទេសកម្ពុជានៅតែស្ថិតក្នុងចំណោមប្រទេសដែលរងផលប៉ះពាល់ខ្លាំងជាងគេបំផុត ដោយសារសំណល់ជាតិផ្ទុះពីសង្គ្រាម។ គ្រាប់មីន និងយុទ្ធភណ្ឌមិនទាន់ផ្ទុះប្រមាណពី ៤លាន ទៅ ៦លានគ្រាប់ ត្រូវបានគេប៉ាន់ប្រមាណថា នៅសេសសល់ពីជម្លោះអស់រយៈពេលបីទសវត្សរ៍ ដែលបានបញ្ចប់ទៅវិញនៅក្នុងឆ្នាំ១៩៩៨៕
Daily Program
