យោងតាមវិមានក្រឹមឡាំង ការពិភាក្សារវាងលោកវ្លាឌីមៀ ពូទីន និងលោកស្តេវ វីតកូហ្វ មានន័យស្ថាបនា
ទីភ្នាក់ងារព័ត៌មានផ្លូវការរុស្ស៊ី តាស (Tass) បានរាយការណ៍ឲ្យដឹងថា ជំនួបរវាងលោកវ្លាឌីមៀ ពូទីន និងលោកស្តេវ វីតកូហ្វ បេសកជនពិសេសរបស់លោកដូណាល់ ត្រាំ មានរយៈពេលជិត ៣ម៉ោង និងបានបញ្ចប់នៅថ្ងៃពុធទី៦ ខែសីហា។
ទីប្រឹក្សាការទូតនៃប្រមុខរដ្ឋរុស្ស៊ី លោកលូរី អ៊ូចាកូវ បានថ្លែថា ៖”កិច្ចសន្ទនាដ៏មានសារ ប្រយោជន៍ និងស្ថាបនាបានរៀបចំឡើងនៅវិមានក្រឹមឡាំងអំពីសង្រ្គាមនៅអ៊ុយក្រែន និង ទំនាក់ទំនងរុស្ស៊ី អាម៉េរិក។” លោកអះអាងថា រុស្ស៊ី បានបញ្ជូននូវសញ្ញាខ្លះលើសំណុំរឿង អ៊ុយក្រែន។
យោងតាមរូបភាពដែលផ្សព្វផ្សាយដោយសេវាសារព័ត៌មាននៃប្រធានាធិបតីរុស្ស៊ី បានឲ្យដឹងថា ក្នុងជំនួបជាមួយលោកពូទីន បេសកជនពិសេសអាម៉េរិក ត្រូវបានទទួលនៅពេលលោកមកដល់ពេលព្រឹកនៅទីក្រុងមូស្គូដោយតំណាងពិសេសនៃប្រធានាធិបតីរុស្ស៊ី លោកគីវីល ឌីមីទ្រីវ។ លោកស្តេវ វីតកូហ្វ ដែលជាមនុស្សទទួលបានការទុកចិត្តពីលោកដូណាល់ ត្រាំ សម្រាប់បេសកកម្មសន្តិភាព បានជួបប្រធានាធិបតីរុស្ស៊ីជាច្រើនដងមកហើយ ប៉ុន្តែមិនមានជំនួបណាមួយនាំទៅដល់ការប្រែប្រួលជាផ្លែផ្កាទេ។
ដូច្នេះតើគេអាចរំពឹងពិតប្រាកដពីអ្វីសម្រាប់ជំនួបលើកចុងក្រោយនេះដែរឬទេ? លោកមីស្ហ៉ែល ឌុយក្លូ គឺជាអតីតអគ្គរដ្ឋទូត និងសព្វថ្ងៃជាទីប្រឹក្សាពិសេសនៅវិទ្យាស្ថានម៉ុងទែង វិទ្យាស្ថានក្រុមអ្នករិះគិតនៅទីក្រុងប៉ារីសប្រទេសបារាំង។ លោកមីស្ហ៉ែល ឌុយក្លូ វាយតម្លៃថា វានឹងភ្ញាក់ផ្អើលបើឃើញមានការឈានទៅមុខពិតប្រាកដនៃសន្តិភាព។
ជំនួបនេះ ប្រព្រឹត្តទៅមុនពីរថ្ងៃ មុននឹងដល់ថ្ងៃចុងក្រោយនៃឱសានវាទដែលដាក់ដោយលោកដូណាល់ ត្រាំ កាលពីសប្តាហ៍មុន។ ចាប់តាំងពីថ្ងៃសុក្រមុន ប្រធានាធិបតីអាម៉េរិក បានផ្តល់ពេលឲ្យរុស្ស៊ីសម្រាប់ឲ្យរុស្ស៊ីបញ្ជប់ការវាយប្រហារលើអ៊ុយក្រែន ក្រោមទម្ងន់នៃទណ្ឌកម្មថ្មីៗ។ លោកគំរាមដាក់ច្បាប់ពន្ធគយបន្ថែមសម្រាប់ប្រទេសដែលបន្តធ្វើពាណិជ្ជកម្មជាមួយទីក្រុងមូស្គូ ដូចជាចិន និងឥណ្ឌា។ ចំណែកប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី កាលពីថ្ងៃពុធ ទី៦ ខែសីហា បានលើកទឹកចិត្តឲ្យពង្រឹងគ្រប់ទណ្ឌកម្មដែលត្រូវដាក់ដោយសហរដ្ឋអាម៉េរិក អឺរ៉ុប និងក្រុមប្រទេស ជី៧ (G7) ប្រឆាំងរុស្ស៊ី មុនបន្តិចពីការទៅដល់របស់លោកស្តេវ វីតកូហ្វ ទៅកាន់រដ្ឋធានីរបស់រុស្ស៊ី។ កាលពីថ្ងៃអង្គារលោកហ្សេឡេនស្គីបានអំពាវនាវយ៉ាងខ្លាំងឲ្យមានទណ្ឌកម្មប្រឆាំងនឹងរុស្ស៊ី និងសន្ទនាធ្វើកិច្ចសហប្រតិបត្តិការយោធាតាមទូរសព្ទជាមួយលោកដូណាល់ ត្រាំ និងមានការលើកអំពីគម្រោងនៃកិច្ចព្រមព្រៀងអំពីដ្រូនផងដែរ។
ជំនួបនេះកើតមានឡើងនៅខណៈដែលទំនាក់ទំនងរវាងរុស្ស៊ី និងសហរដ្ឋអាម៉េរិកបានកើនឡើងនូវភាពតានតឹងដល់កំពូលចាប់តាំងពីសប្តាហ៍មុនជាមួយនិងការដាក់ពង្រាយនាវាមុជទឹកនុយក្លេអ៊ែរពីរគ្រឿងពីលោកដូណាល់ ត្រាំ ក្រោយពីលោកមានជម្លោះតាមបណ្តាញសង្គមជាមួយលោកឌីមីទ្រី ម៉េវ៉េដេវ អតីតប្រមុខរដ្ឋរុស្ស៊ី។ ប៉ុន្តែប្រធានាធិបតីអាម៉េរិកមិនបានបញ្ជាក់ថា កន្លែងដែលនាវាមុជទឹកទាំងនោះនឹងត្រូវបញ្ជូនទៅនោះទេ។ ទាំងនោះគឺជានាវាមុជទឹកដែលដើរដោយកម្លាំងរុញច្រាននុយក្លេអ៊ែរ និងអាចបំពាក់ក្បាលគ្រាប់នុយក្លេអ៊ែរផងដែរ។
លើសពីនេះ ប្រធានាធិបតីអាម៉េរិកបានសម្តែងកាន់តែបើកចំហនូវការខូចចិត្តរបស់លោកចំពោះលោកវ្លាឌីមៀ ពូទីន។ ឆ្លើយតបចំពោះអ្នកកាសែតដែលធ្លាប់បានសួរលោកថា តើមានមធ្យោបាយដើម្បីឲ្យគាត់បញ្ចៀសទណ្ឌកម្មដែរឬទេ? លោកដូណាល់ ត្រាំបានឆ្លើយថា គឺគេទៅបង្ហើយកិច្ចព្រមព្រៀងដើម្បីកុំឲ្យមានមនុស្សស្លាប់បន្តទៀត។
ចំណែកវិមានក្រឹមឡាំងបានបរិហារការគំរាមដែលមិនស្របច្បាប់។ ទោះបីមានសំពាធដែលដាក់ចុះដោយទីក្រុងវ៉ាស៊ីនតុន ការវាយប្រហាររបស់រុស្ស៊ីប្រឆាំងនឹងប្រទេសអ៊ុយក្រែននៅតែបន្ត។
Daily Program
