នៅក្នុងសារសំណេរ មេដឹកនាំកំពូលអ៊ីរ៉ង់ លោកម៉ូជតាបា ខាមឺនៃអះអាងថា សត្រូវបានវិនាសហើយ

កាលពីចុងសប្តាហ៍ លោកម៉ូជតាបា ខាមឺនៃ បានអះអាងថា ៖ “សត្រូវបានវិនាសហើយ។” នៅ ក្នុងសារជាសំណេរ​សម្រាប់រដូវកាលចូលឆ្នាំថ្មីពែរ្ស៍ និងកត់សម្គាល់ដោយការផ្ទុះ នៅទីក្រុង តេអេរ៉ង់ និងប្រតិបត្តិការយោធាបន្តរបស់អ៊ីស្រាអែលលើមន្រ្តីមានអំណាចអ៊ីរ៉ង់ មេដឹកនាំ កំពូល​អ៊ីរ៉ង់ថ្មី​បានថ្លែងថា ៖ “អ៊ីរ៉ង់បានវាយប្រហារដ៏មានឥទ្ធិពលខ្លាំងក្លាលើសត្រូវ។”

លោកអាយ៉ាតូឡា បានសរសេរថា ៖ “អ៊ីរ៉ង់បានវាយប្រហារសត្រូវដ៏គួរឱ្យភ្ញាក់ផ្អើល ដល់ កម្រិត​ដែលឥឡូវនេះសត្រូវនិយាយពាក្យសម្តីផ្ទុយគ្នា និងមិនមានភាពសមរម្យ។”

អ្នកបន្តវេនលោកអាលី ខាមឺនៃ ដែលត្រូវធ្វើឃាតដោយកងកម្លាំងអ៊ីស្រាអែលកាលពីថ្ងៃទី២៨ ខែកុម្ភៈ ជាថ្ងៃចាប់ផ្តើមការប្រទូស្តរាយ​ដែលដឹកនាំដោយកងកម្លាំងអាម៉េរិកប្រឆាំងនឹងអ៊ីរ៉ង់ គឺ​នៅស្ថិតជាគោលដៅរបស់អ៊ីស្រាអែលជានិច្ច។

ប្រហែលជាត្រូវរងរបួស​នៅពេលចាប់ផ្តើមនៃសង្រ្គាម លោកម៉ូជតាបា មិនបានបង្ហាញខ្លួនជា​សាធារណៈចាប់តាំងពីការតែងតាំងឡើងកាន់ដំណែងមក។

កាលពីថ្ងៃសុក្រ ចុងសប្តាហ៍ យោធាអ៊ីស្រាអែល បានបញ្ជាក់ថា បានសម្លាប់​ក្នុងអំឡុង​ការ​វាយ​​​ប្រហារទៅលើទីក្រុងតេអេរ៉ង់ នូវប្រមុខចារកម្មនៃកងកម្លាំងយោធាប៉ារ៉ា បាសស៊ីដជីស​អ៊ីរ៉ង់។ ត្រឹមតែប៉ុន្មានម៉ោងបន្ទាប់ពីការប្រកាស ដែល​បាន​បញ្ជាក់​ដោយ​កងឆ្មាំបដិវត្តន៍អ៊ីរ៉ង់ តាម​រយៈអ្នកនាំពាក្យរបស់ពួកគេ ដែលបានហៅថា ជាមរណភាពនៃវរបុរស។ អ្នកនាំពាក្យ​រូបនេះ​ត្រូវ​បានសម្លាប់ផងដែរ។

បើតាមទីភ្នាក់ងារសារព័ត៌មានបារាំង បានឲ្យដឹងថា មានឮសម្លេងផ្ទុះ​ជាច្រើន​​នៅក្នុងរដ្ឋធានីនៃ​ប្រទេស​អ៊ីរ៉ង់ ដែលឮចេញពីភាគខាងកើត និងភាគ​ខាងជើង​នៃ​ទីក្រុង។

នៅទីក្រុងហ្ស៉េរូសាឡឹម ប្រទេសអ៊ីស្រាអែល គ្រាប់មីស៊ីលត្រូវបានបាញ់ទម្លាក់​នៅខាងក្នុង​សង្កា​ត់ហ្ស្វីហ្វ នៅជិត​កំផែង និងទីតាំងពិសិដ្ឋ។ មជ្ឈមណ្ឌលនេះ​ភ្លាមៗ ត្រូវបានមកកកកុញ​ដោយ​កង​កម្លាំង​សន្តិសុខ។ រូបភាពរបស់ទីភ្នាក់ងារសារព័ត៌មានបារាំង បានបង្ហាញនូវផ្លូវមួយ ដែលត្រូវបាន​បំផ្លាញ និងរាយប៉ាយដោយសំណល់ ព្រមទាំងមានរន្ធធំមួយនៅលើជញ្ជាំង​ផង​ដែរ។

សង្រ្គាមដែលមានរយៈពេល ៣សប្តាហ៍ មិនមានបង្ហាញនូវសញ្ញាណាមួយថមថយទេ ដាក់​សំពាធ​​លើសកម្មភាពពិភពលោក និងអាចបង្កឲ្យមានការភ័យខ្លាចអំពីវិបត្តិសេដ្ឋកិច្ច​ដ៏មាន​សក្តានុពល​ផងដែរ ជាពិសេស​ជាមួយនឹងការបិទខ្ទប់តាមជាក់ស្តែងដោយអ៊ីរ៉ង់​លើការធ្វើ​នាវាចរណ៍​​នៅក្នុងច្រក​សមុទ្រ​អ័រមូស ដែលជាច្រកឆ្លងកាត់ខាងផ្លូវសមុទ្រយុទ្ធសាស្រ្ត​សម្រាប់​ប្រេង និងឧស្ម័ន។

ស្ថានការណ៍នេះបានជំរុញឲ្យ ដូណាល់ ត្រាំ បង្ហាញការរិះគន់ កាលពីថ្ងៃសុក្រ ចំពោះប្រទេស​សមាជិក​អង្គការណាតូ ដែលលោកបានហៅពួកគេថា ‘កំសាក’ ព្រោះតាមការយល់ឃើញ​របស់​លោក ពួកគេមិនចង់ជួយបើកផ្លូវឆ្លងកាត់ច្រកសមុទ្រអ័រមូស’។

ចំណែកលោកស្រី អានណា ខេលី អ្នកនាំពាក្យនៃសេតវិមាន បាន​បញ្ជាក់​ក្នុង​សេចក្តី​ថ្លែង​ការណ៍​មួយថា កងទ័ពអាម៉េរិកអាច ‘ធ្វើឲ្យអសកម្ម’លើកោះខាហ្សរបស់អ៊ីរ៉ង់ គឺ​ធ្វើឲ្យលែង​មាន​គ្រោះថ្នាក់ នៅពេលណាក៏បាន ប្រសិនបើប្រធានាធិបតី ត្រាំ ផ្តល់បញ្ជា ហើយ​ដែល​កោះ​នេះ​ក៏ជាគោលដៅប្រេងសំខាន់សម្រាប់អ៊ីរ៉ង់’។ សេចក្តីបញ្ជាក់នេះ បានធ្វើឡើងគាប់ជួន​នឹង​ការ​ប្រកាសដោយប្រព័ន្ធផ្សព្វផ្សាយរបស់អាម៉េរិក​ជាច្រើនអំពីការដាក់ពង្រាយកងកម្លាំងបន្ថែម​របស់​អាម៉េរិក​​នៅក្នុងតំបន់មជ្ឈិមបូព៌ានៅពេលខាងមុខ។